29 MARS 2023 | PËRDITËSUAR MË 18 PRILL 2023
RUSI

PËRDITËSIM—VËLLEZËRIT I BURGOSIN | Ndiejnë dorën e Jehovait në burg

LUAJ

Më 17 prill 2023 Gjykata Krahinore e Aktubinskit në Rajonin e Astrakanit shpalli fajtorë vëllezërit Rinat Kiramov, Sergei Koroljov dhe Sergei Kosjanenko dhe dënoi secilin me 7 vite burg. Të 3 vëllezërit janë në paraburgim që prej nëntorit 2021 dhe vazhdojnë të mbeten nën arrest.

Të dhëna

Rinat Kiramovi

Lindur: 1987 (Moskë, Rajoni i Moskës)

Biografia: Para se ta arrestonin, po studionte që të bëhej krijues faqesh web-i. Është muzikant i talentuar. Punoi si postier për të kryer shërbim alternativ civil

E mësoi të vërtetën nga e ëma dhe u prek nga uniteti dhe dashuria mes Dëshmitarëve të Jehovait. U pagëzua më 2001

Në vitin 2009 u martua me Galinën

Komente personale nga bashkëshortja e Rinatit, Galina a

Çfarë po e ndihmon Rinatin të tregojë qëndrueshmëri në burg?

Rinati ka vënë synim që të lutet me emër për çdo vëlla e motër që është në burg kudo në botë. Çdo muaj i jap një listë me të gjithë ata që janë të burgosur për shkak të besimit. Lutjet e gjata dhe specifike për të tjerët i forcojnë miqësinë me Jehovain dhe e ndihmojnë të mos përqendrohet tepër te vështirësitë e tij. Gjithashtu i rikujtojmë njëri-tjetrit vlerën e qëndrueshmërisë: po japim një dëshmi të mirë dhe po mbështetim sovranitetin e Jehovait. Në një nga letrat, Rinati ka shkruar: «S’ka rëndësi sa i fortë mund të duket armiku, me ndihmën e Atit tonë do të dalim fitimtarë. Por fitorja nuk nënkupton medoemos lirinë. Për ne fitore do të thotë të qëndrojmë besnikë deri në fund.»

Si e ke ndier ti dorën e Jehovait?

Rinati më shkroi në një letër diçka që ka dalë shumë e vërtetë: «Për momentin e kam të pamundur të kujdesem për ty, prandaj Jehovai po e përmbush vetë këtë përgjegjësi.» Madje kam përjetuar mbështetjen e fuqishme të frymës së Jehovait që në momentin e parë që nisi sprova. Psalmi 91:1 premton: «Ai që banon në vendin e fshehtë të Më të Lartit, do të gjejë strehë nën hijen e krahëve të të Plotfuqishmit.» Kisha lexuar edhe më parë për këtë ‘vend të fshehtë’, por tani e ndiej mbrojtjen e Jehovait si asnjëherë më parë! E gjithë kjo ma ka shtuar tej mase besimin tek Ai dhe më ndihmon të tregoj qëndrueshmëri me gëzim.

Sergei Koroljovi

Lindur: 1973 (Penzë, Rajoni i Penzës)

Biografia: I pëlqen fotografia dhe të bëjë mobilie

Ndryshoi opinionin negativ që kishte për fenë kur njohu nga afër Dëshmitarët e Jehovait dhe mësoi për Krijuesin. U pagëzua më 1996

Në vitin 2005 u martua me Jekaterinën

Komente personale

Si të është forcuar miqësia me Jehovain gjatë kësaj kohe?

Kur je në burg, është goxha sfidë të mos mendosh negativisht për atë që po ndodh. Qëndrueshmëria, besimi, shpresa dhe dashuria po më sprovohen deri në pikën e fundit. Por ajo që më ndihmon veçanërisht është lutja. Tani kam kohë sa të duash që t’i zbraz plotësisht zemrën Atit tim. Kurrë nuk jam lutur kaq shumë e me kaq zjarr sa këtu në burg. Tani e kuptoj pse Jezui kalonte tërë natën duke iu lutur Atit të tij. Kjo situatë më ka mësuar të mbështetem pa rezerva te Perëndia, dhe mbase është mësimi më i vyer që po nxjerr në burg.

Sergei Kosjanenko

Lindur: 1961 (Jelan, Rajoni i Volgogradit)

Biografia: Punon si mësues i edukimit fizik

U martua me Olgën në vitin 1983. E bëri për vete saktësia historike dhe profetike e Biblës. U pagëzua në vitin 2002

Komente personale nga bashkëshortja e Sergeit, Olga b

Çfarë të ka ndihmuar të luftosh shkurajimin?

Përpiqem ta mbush kohën me gjëra të dobishme. Lexoj botime të bazuara në Bibël dhe i lutem Jehovait të më japë forcë që të luftoj çdo ndjenjë shkurajimi. Lexoj e rilexoj letrat e Sergeit dhe imagjinoj takimin tonë pasi të ketë mbaruar gjithçka. Gjithashtu marr shumë zemër kur këndoj këngët tona të bazuara në Bibël.

A ka ndonjë varg specifik nga Bibla që të ka ndihmuar të mos dorëzohesh?

Më pëlqen jashtë mase ajo që thotë 1 Korintasve 10:13, ku Perëndia premton se ‘nuk do të lejojë që të sprovohemi përtej asaj që mund të mbajmë’. E kuptoj se nuk mund t’ia dal e vetme në këtë situatë dhe jam e sigurt se Jehovai do të më ndihmojë të qëndroj besnike. Nëse po na ndodh një situatë e tillë, kjo do të thotë se mund t’ia dalim. Sprovat nuk do të zgjatin përgjithmonë.

Ngushëllohemi kur dimë se Jehovai vazhdon të jetë strehë për shërbëtorët e tij besnikë, duke ‘i mbajtur me krahët e tij të përjetshëm’.—Ligji i përtërirë 33:27.

Tabelë kronologjike

9 nëntor 2021

Nis çështja penale. Autoritetet kontrollojnë 15 shtëpi të Dëshmitarëve të Jehovait në Aktubinsk dhe Znaminsk, ndër to edhe shtëpitë e vëllezërve Kiramov, Koroljov dhe Kosjanenko
10 nëntor 2021

Arrestojnë Sergei Koroljovin
11 nëntor 2021

Arrestojnë Rinat Kiramovin dhe Sergei Kosjanenkon. Tre vëllezërit i fusin në paraburgim
14 nëntor 2022

Nis procesi penal

a b Nuk ishte e mundur të kishim komente nga vëllezërit Kiramov dhe Kosjanenko.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME