24 JANAR 2022 | PËRDITËSUAR MË 29 DHJETOR 2023
RUSI

PËRDITËSIM—VËLLEZËRIT TANË I SHPALLIN FAJTORË | Përndjekja nuk i pengon dot bekimet për vëllezërit Aleksandër Polozov dhe Stjepan Shjevjeljev

LUAJ

Më 29 dhjetor 2023, Gjykata e Qytetit të Norilskit në Territorin e Krasnojarskut shpalli fajtorë vëllezërit Aleksandër Polozov dhe Stjepan Shjevjeljev. Secili u dënua me 6 vjet vënie në provë. Për momentin nuk u duhet të futen në burg.

Tabelë kronologjike

20 tetor 2019

Forcat speciale rrethojnë një zonë kampingu në qytetin e Norilskit. Ndalohen më tepër se 50 Dëshmitarë
26 tetor 2019

Aleksandrin e arrestojnë dhe e fusin në paraburgim
21 janar 2020

Aleksandrin e lirojnë pas afro 3 muajsh në paraburgim
19 shkurt 2020

Aleksandrin e fusin në listën e ekstremistëve dhe i bllokojnë llogaritë bankare
6 maj 2021

Stjepanin e akuzojnë për «konspiracion kriminal» në bashkëpunim me Aleksandrin. «Krimi» i Stjepanit ishte lutja dhe predikimi

Të dhëna

Aleksandër Polozovi

Lindur: 1970 (Torzhok, Rajoni i Tverit)

Biografia: Kur ishte i ri, i pëlqente hokej dhe noti. Ka punuar në shërbimet e shpëtimit në rast emergjence. U martua me Svjetlanën në vitin 1998. Të dyve u pëlqen të shëtitin me biçikletë dhe të udhëtojnë

Nisi të studionte Biblën me Dëshmitarët e Jehovait në fillim të viteve 90 dhe u pagëzua në vitin 1995

Komente personale

Si të ndihmoi Jehovai kur ishe në paraburgim?

Pas herës së parë që më morën në pyetje, më çuan në qeli. . . . Shoku i qelisë më pyeti pse më kishin futur brenda. I shpjegova se më kishin akuzuar për krim, ngaqë besoja te Perëndia. . . . Ai më tha: «Shiko pak poshtë tavolinës.» Kur pashë, në një raft kishte 2 Bibla. S’u besoja dot syve! . . . Sa shkela në burg dhe kisha një kopje të Fjalës së Perëndisë! S’di si ta falënderoj Jehovain që më mbështeti në këtë mënyrë kaq të jashtëzakonshme.

Si ke nxjerrë dobi nga mbështetja e bashkëbesimtarëve?

Nuk kam fjalë ta përshkruaj sa më kanë ndihmuar dhe inkurajuar vëllezërit dhe motrat. Mëngjesin e një dite të acartë, kur po më çonin nga qendra e paraburgimit në sallën e gjyqit, vëllezërit kishin ardhur dhe po duartrokitnin për mua. Pastaj në orën 6 të pasdites po duartrokitnin sërish ndërsa po futesha në makinën që do të më kthente në qendrën e paraburgimit. U preka jashtë mase dhe ishte një dëshmi e shkëlqyer për këdo aty.

Stjepan Shjevjeljevi

Lindur: 1982 (Masljanino, Rajoni i Novosibirskut)

Biografia: Punon si montues kabllosh elektrike. Në vitin 2013 u martua me Oksanën dhe të dyve u pëlqen të lexojnë dhe të udhëtojnë

Në vitin 1996, mamaja dhe motra e Stjepanit filluan të studionin Biblën. Edhe pse asnjëra nuk e pranoi të vërtetën, Stjepani filloi studimin dhe u mahnit nga mësimet e Dëshmitarëve të Jehovait. U inkurajua shumë kur mësoi se si Bibla ua ndryshon jetën për mirë njerëzve. U pagëzua më 2001

Komente personale

Si ju ka ndihmuar një program i rregullt adhurimi ty dhe bashkëshorten?

Për ne, adhurimi familjar është tejet i rëndësishëm. Vite më parë caktuam një ditë specifike për adhurimin dhe nuk lëmë asgjë të na ndërhyjë. Jam i sigurt se kjo do ta ndihmojë time shoqe ta mbajë të fortë besimin. Gjithashtu përpiqem ta bëj sa më interesant leximin e përditshëm të Biblës. Për shembull, një vit e lexoj Biblën nga fillimi në fund. Herën tjetër e lexoj sipas radhës kronologjike të ngjarjeve. Më pas i grupoj librat sipas shkrimtarëve e kështu me radhë. Në këtë mënyrë leximi i Biblës nuk më bëhet monoton dhe arrij t’i shoh në dritë të re edhe vargje të njohura.

Me çfarë syri i sheh tani ata që të përndjekin?

Jehovai po më ndihmon të kem pikëpamjen e duhur [për ta]. Bashkë me gruan e shohim shpeshherë që ata janë njerëz si gjithë të tjerët, që thjesht po bëjnë punën e tyre. Edhe ata kanë halle dhe kanë nevojë për shpresën freskuese që predikojmë.

Jemi të sigurt se Jehovai do të vazhdojë t’i mbështetë vëllezërit tanë të dashur që me besnikëri ‘po vazhdojnë të ndjekin’ drejtësinë, pavarësisht nga përndjekja.—Gjykatësit 8:4.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME