1 TETOR 2021 | PËRDITËSUAR MË 29 GUSHT 2023
RUSI

PËRDITËSIM—VËLLEZËRIT TANË I SHPALLIN FAJTORË | Pesë vëllezër janë të vendosur të qëndrojnë besnikë pavarësisht nga përndjekja

LUAJ

Më 28 gusht 2023, Gjykata e Krahinës së Promishlinit në Orenburg shpalli fajtorë vëllezërit Vladimir Koçnëvi, Vladislav Kolbanovi, Pavel Lekoncjevi, Sergej Logunovi dhe Nikolaj Zhugini dhe i dënoi me vënie në provë. Dënimet variojnë nga 2 vjet e 6 muaj deri në 3 vjet e 6 muaj. Për momentin nuk u kërkohet të futen në burg.

Tabelë kronologjike

1 mars 2021

Më shumë se një vit pasi çështja iu kthye zyrës së prokurorisë, nisën seancat gjyqësore në Gjykatën e Krahinës së Promishlenijt në Orenburg
14 janar 2020

Çështja penale i rikthehet zyrës së prokurorisë për shkak të natyrës së paqartë të akuzës
3 gusht 2018

Vladimirin e liruan nga një qendër paraburgimi pas 79 ditësh dhe e kaluan në arrest shtëpie
16 maj 2018

Autoritetet kontrolluan shtëpitë e 19 familjeve në rajonin e Orenburgut. Vladimirin dhe Vladislavin i çuan në një burg të përkohshëm. Tri ditë më vonë, Vladislavin e kaluan në arrest shtëpie
14 maj 2018

Drejtoria Investigative e Komitetit Hetimor të Federatës Ruse për rajonin e Orenburgut ngriti një çështje penale kundër pesë vëllezërve

Të dhëna

Vladimir Koçnëvi

Lindur: 1979 (Orenburg)

Biografia: Kur ishte i vogël, i pëlqente peshkimi dhe futbolli. Ka punuar si metalpunues dhe riparues radiosh e televizorësh. U pagëzua si Dëshmitar i Jehovait në vitin 1993. Në vitin 2003 u martua me Galinën

Komente personale

Si është forcuar miqësia jote me Jehovain gjatë kësaj sprove?

Mund të them me plot bindje se koha që kalova në paraburgim ishte periudha më e mirë në marrëdhënien time me Perëndinë. Mësova të besoj më shumë te Jehovai, sepse isha krejt i vetëm dhe s’bëja dot asgjë për ta ndryshuar situatën.

Cilën këshillë do t’u jepje të tjerëve se si ta përdorin kohën që të përgatiten për përndjekjen?

E vërteta është se përndjekja nuk e bën një person automatikisht më të mirë ose më të keq. Në fakt, ajo thjesht tregon si është vërtet personi nga brenda. Nëse i përmbahemi një programi të mirë adhurimi, pra nëse lutemi, studiojmë Biblën dhe ndjekim mbledhjet rregullisht, atëherë besimi ynë do të jetë përherë i fortë. Nuk duhet të presim për një periudhë të veçantë që të fillojmë të forcojmë miqësinë tonë me Jehovain. Për shembull, s’duhet të presim që të ndodhë diçka e jashtëzakonshme që të fillojmë të lexojmë Biblën çdo ditë ose që t’i lutemi Perëndisë rregullisht.

Vladislav Kolbanovi

Lindur: 1992 (Orenburg)

Biografia: E ëma filloi të studionte Biblën kur ai ishte gjashtë vjeç. Vladislavi u pagëzua si Dëshmitar i Jehovait në vitin 2008. Në moshën 18-vjeçare kërkoi të kryente shërbim alternativ në vend të shërbimit ushtarak. E kreu shërbimin alternativ duke u kujdesur për të moshuarit në një shtëpi të moshuarish

Komente personale

Si ta ka forcuar kjo sprovë vendosmërinë për t’i shërbyer Jehovait?

Shpesh më pyesin nëse do ta shmangia këtë përndjekje penale po të më jepej mundësia. Duke menduar për këtë pyetje, kam kuptuar se nuk ndiej asnjë keqardhje për atë që po më ndodh. . . . Po e dalloj qartë dorën e Jehovait në jetën time dhe mbështetjen e vëllezërve dhe të motrave.

E kam provuar vetë se falë sprovave zhvillojmë qëndrueshmëri, besimi ynë te Jehovai forcohet dhe dashuria për të rritet.

Pavel Lekoncjevi

Lindur: 1981 (Kitat, Territori i Krasnojarskut)

Biografia: Që kur ishte i vogël, e tërhiqte shumë krijimi. I pëlqen të shëtitë në natyrë, të peshkojë dhe të mbledhë kërpudha. Është marrë me ndërtim. Filloi të studionte Biblën me Dëshmitarët e Jehovait në fund të viteve 90. Kuptoi se çelësi për një jetë të lumtur është të jetosh në përputhje me normat e Biblës. Në vitin 1999 u pagëzua dhe në vitin 2017 u martua me Oksanën

Komente personale

Si reagove ndaj kontrolleve, marrjeve në pyetje dhe përndjekjes penale?

Kur policët na hynë me forcë në shtëpi, thjesht u habita sa shpejt iu përgjigj Jehovai lutjes sime, që ka shumë mundësi të ishte lutja më e shkurtër që kam bërë ndonjëherë. U luta për qetësi. Përgjigjja nuk erdhi pas orësh ose minutash, por pas pak sekondash. Isha i qetë dhe arrija të mendoja shumë qartë.

Për çfarë je i vendosur pavarësisht se si do të shkojë gjyqi?

Është e pamundur të dimë se çfarë vendimi do të marrë gjykata. Por jam i sigurt se Jehovai do të vazhdojë të më japë forcë. Sepse ne jemi fitimtarë pavarësisht se çfarë vendimi merr gjykata! Sado e vështirë të jetë sprova, Jehovai na jep aq frymë të shenjtë sa na duhet. E kam provuar vetë këtë sa e sa herë gjatë viteve në shërbim të Jehovait. Prandaj jam i vendosur të vazhdoj garën deri në fund.—2 Timoteut 4:7.

Sergej Logunovi

Lindur: 1962 (Orenburg)

Biografia: Mori stërvitje të specializuar për të drejtuar makineri të rënda. Pasi shërbeu në ushtri, u bë fotograf profesionist. Kohët e fundit ka punuar si kopshtar. Merret akoma me fotografi për hobi. Gjithashtu luan në kitarë. Në fillim të viteve 90 filloi të studionte Biblën me Dëshmitarët e Jehovait. Në vitin 1992 u pagëzua dhe në vitin 1994 u martua me Larisën

Komente personale

Çfarë do t’u sugjeroje të tjerëve që të përgatiten për përndjekjen?

Dihet që besnikëria jonë duket kur lindin situata të vështira. Që të jemi të përgatitur për këto vështirësi, duhet ta forcojmë që më përpara marrëdhënien tonë me Jehovain dhe me Jezu Krishtin. Është si me një shpatë: që ajo të bëjë punë në betejë, metali i saj duhet forcuar që të mos thyhet gjatë luftës. Kur ushtari ka një shpatë të fortë, ndihet shumë më i sigurt gjatë betejës. Jezui tha se «kush është i besueshëm në gjëra të vogla, është i besueshëm edhe në të mëdha». (Luka 16:10) Prandaj, nëse dikush stërvitet që tani që t’i bindet Perëndisë në gjithçka, ka më shumë mundësi që të qëndrojë besnik gjatë përndjekjes.

Nikolaj Zhugini

Lindur: 1976 (Kazakistan)

Biografia: Kur ishte fëmijë, i pëlqente të merrej me sport. Punon si saldator. Filloi të studionte Biblën me Dëshmitarët e Jehovait në mes të viteve 90. U pagëzua më 1996. Edhe pse e shoqja, Galina, nuk ka të njëjtat bindje fetare si ai, të dy bashkë kanë ndërtuar një familje të lumtur dhe kanë rritur një djalë dhe një vajzë

Komente personale

Për çfarë i je lutur Jehovait gjatë kësaj periudhe?

Jehovai nuk do të na çlirojë nga të gjitha problemet ose përndjekjet. Ai lejon që gjëra të tilla t’u ndodhin shërbëtorëve të tij. Megjithatë, iu luta dhe vazhdoj t’i lutem Jehovait të më japë frymën e shenjtë që të qëndroj në të gjitha këto sprova. Jehovai më ka ndihmuar shumë që të ruaj gëzimin gjatë hetimit dhe gjyqit. Një gjë është e sigurt: s’do t’ia kisha dalë dot pa të.

Edhe pse beteja për besimin e tyre vazhdon nga më se tre vjet, duket qartë se vëllezërit tanë janë të vendosur t’i qëndrojnë besnikë Jehovait. Po ashtu, duket qartë edhe se Jehovai po vepron me besnikëri ndaj tyre.—2 Samuelit 22:26.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME