27 MARS 2024 | PËRDITËSUAR MË 13 MAJ 2024
RUSI

PËRDITËSIM—VËLLEZËRIT TANË I SHPALLIN FAJTORË | Vëllezërit janë të sigurt, të përgatitur dhe me një qëndrim pozitiv

LUAJ

Më 13 maj 2024, Gjykata Krahinore e Leninskit në Barnaul, Territori i Altait, shpalli fajtorë vëllezërit Juri Kolotinski, Mihail Reshentikov dhe Anatoli Sariçev dhe e dënoi secilin me 2 vjet e 3 muaj vënie në provë. Për momentin nuk duhet të futen në burg.

Të dhëna

Juri Kolotinski

Lindur: 1955 (Moldavi)

Biografia: Ka punuar me makineri të rënda në industrinë e minierave

U martua me Nataljan më 1977

Pyeste veten pse ka kaq shumë vuajtje. Mori përgjigje të qarta nga Bibla pasi studioi me Dëshmitarët e Jehovait. Të dy, Juri dhe Natalja, u pagëzuan më 1995

Komente personale

Cila ngjarje nga Bibla të siguron se ke mbështetjen e Jehovait?

Shpesh mendoj për izraelitët kur dolën nga Egjipti. Gjatë gjithë kohës që ishin në shkretëtirë, Jehovai i drejtoi dhe i mbrojti. E ndiej që po bën njësoj edhe me mua. Sa herë më thërrasin në gjykatë, imagjinoj Jehovain që ecën para meje. Ngaqë ndiej mbështetjen e tij, jam i bindur se më do dhe do të më japë forcën të qëndroj dhe të ruaj besnikërinë ndaj tij, të ndodhë ç’të ndodhë. Besimi im është më i fortë se kurrë; e di që po bëj atë që është e drejtë dhe jam i përgatitur ta mbroj emrin e Jehovait me gjithçka mundem.

Mihail Reshentikovi

Lindur: 1949 (Maksiner, Rajoni i Kirovit)

Biografia: Ka punuar si shofer autobusi dhe kamioni për më se 50 vjet

Ka rritur 1 djalë dhe 1 vajzë me gruan e parë, që më vonë i vdiq nga kanceri. U martua me Antoninën më 2021

Kishte pyetje rreth Biblës, por nuk mori përgjigje nga kisha e tij. U kënaq kur i gjeti përgjigjet gjatë studimit me Dëshmitarët e Jehovait. U pagëzua më 2000

Komente personale

Si të ka ndihmuar përgatitja për të përballuar përndjekjen?

Sapo filluan të arrestonin dhe të burgosnin vëllezërit e motrat, nisa t’i lutesha Jehovait që të më jepte mençuri dhe vetëkontroll për të qenë i përgatitur. E kam ndier dorën e tij sa e sa herë, dhe kjo më ka vërtetuar se Jehovai u përgjigjet lutjeve gjithnjë në kohën e duhur. Nuk kam pikë dyshimi se e kam përkrah. Prandaj nuk kam frikë nga vendimi i gjykatës. E di se me ndihmën e Jehovait do t’ia dal të qëndroj besnik.

Anatoli Sariçevi

Lindur: 1949 (Karpovo, Territori i Altait)

Biografia: Ka punuar si grafik dizajner para se të dilte në pension

U martua me Nadjezhdën më 1990. Kanë një djalë

U takua me Dëshmitarët e Jehovait ndërsa po e merrte veten nga një ndërhyrje kirurgjikale. Mori zemër kur mësoi se Jehovai premton t’i japë fund dhunës dhe vuajtjeve. Nadjezhda u pagëzua më 2001, ndërsa Anatoli më 2002

Komente personale

Çfarë të ndihmon të kesh një qëndrim pozitiv?

Mendoj për 1 Pjetrit 3:14: «Edhe sikur të vuani për hir të drejtësisë, lum ju!» Farisenjtë i përndoqën apostujt, sepse këta refuzuan të ndalnin predikimin. Ndonëse i turpëruan për hir të emrit të Jezuit, apostujt e konsideruan këtë arsye për të qenë të gëzuar. Dua të jem si ata. Nuk gjej ndonjë arsye që të ndihem i shkurajuar nga përndjekja. Përkundrazi jam i lumtur që po ndjek gjurmët e të krishterëve të hershëm dhe të vetë Jezu Krishtit.

U jemi mirënjohës këtyre vëllezërve që na lënë shembuj të tillë besimi e qëndrueshmërie. Jemi të sigurt se Jehovai do të vazhdojë t’i ndihmojë, sepse i do dhe nuk mund t’i harrojë.—Psalmi 25:10.

Tabelë kronologjike

25 maj 2021

Ngrihet çështja penale kundër Mihailit
27 maj 2021

Mihailit i kontrollojnë shtëpinë. Atë dhe Antoninën i marrin në pyetje. Mihailit i vendosin kufizime për udhëtimet
6 tetor 2022

Ngrihet çështja penale kundër Anatolit dhe Jurit, e cila bashkohet me çështjen e Mihailit
7 tetor 2022

Anatolit dhe Jurit u vendosin kufizime për udhëtimet
19 janar 2023

Fillon procesi penal

Shih edhe

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME