30 MAJ 2023 | PËRDITËSUAR MË 6 MARS 2024
RUSI

PËRDITËSIM—VËLLEZËRVE U VENDOSIN GJOBA | Vëllezërit në Tejkovo i mbajnë sytë te ndihma e Jehovait

LUAJ

Më 29 shkurt 2024, Gjykata Krahinore e Tejkovskit në Rajonin e Ivanovos shpalli fajtorë vëllezërit Sergej Galjamin, Anatolij Ljamo, Vladimir Spivak dhe Aleksandër Vasiçkin dhe u vendosi gjoba. Vladimirin e gjobiti me 600.000 rubla (6.564 dollarë amerikanë), Sergejin e gjobiti me 650.000 rubla (7.111 dollarë amerikanë), kurse Aleksandrin dhe Anatolijin i gjobiti me 1.100.000 rubla secilin (12.034 dollarë amerikanë).

Të dhëna

Sergej Galjamini

Lindur: 1967 (Tejkovo, Rajoni i Ivanovos)

Biografia: Ka një dyqan për rregullimin e këpucëve ku punon vetë

U martua me Ludmillën më 1991 dhe kanë 3 vajza

U prek thellë kur mësoi se Perëndia ka emër. Ndoqi një mbledhje të Dëshmitarëve të Jehovait, dhe mirësia që i treguan, e bindi se kishte gjetur të vërtetën. Sergeji u pagëzua më 2001, kurse Ludmilla më 2002

Komente personale

Çfarë mësimi me vlerë ke nxjerrë nga kjo situatë e vështirë?

Në fillim, kur mora vesh si po i trajtonin vëllezërit e motrat tona, u indinjova dhe u acarova. Pastaj, normalisht m’u fut ankthi edhe për të ardhmen time. Por më erdhën ndër mend fjalët e Psalmit 73:26: «Trupi e zemra mund të më treten, por Perëndia është shkëmbi i zemrës sime.» Tamam për këto fjalë kisha nevojë. Kuptova se s’ka arsye të merakosemi e të imagjinojmë gjithë gjërat e këqija që mund të na ndodhin. Gjëja më e mençur për mua është të vazhdoj të forcoj miqësinë me Jehovain dhe të mbështetem plotësisht tek Ai.

Anatolij Ljamo

Lindur: 1963 (Pogar, Rajoni i Brianskut)

Biografia: Ka punuar në ndërtimin e metrove

U martua me Galinën më 1993. Kanë dy fëmijë dhe dy nipër

E ka kërkuar gjithmonë të vërtetën dhe i bëri përshtypje logjika e fortë e Biblës. Anatoliji u pagëzua më 1995, kurse Galina më 1997

Komente personale

Si të kanë mbështetur bashkëbesimtarët?

Tani i çmoj shumë më tepër motrat e vëllezërit. Nuk e shpreh dot me fjalë sa shumë më ka ndihmuar Jehovai përmes tyre. Gjatë periudhës së hetimit, kam hasur shumë sfida, por Jehovai ka përdorur vëllezërit e motrat që të kujdeset për familjen time. Madje ata vijnë edhe në gjykatë që të më gjenden pranë, dhe për këtë u duhet guxim i jashtëzakonshëm. Veç kësaj, çdo ditë më dërgojnë mesazhe dhe më thonë se po luten për mua dhe për familjen time. Kjo më ka shtyrë edhe mua të shfrytëzoj çdo mundësi për t’u dhënë zemër të tjerëve që po kalojnë sprova.

Vladimir Spivaku

Lindur: 1955 (Litin, Ukrainë)

Biografia: Ka shërbyer në ushtri para se të bëhej Dëshmitar i Jehovait

U martua me Nelën më 1979. Ajo filloi të studionte Biblën e para. Në vitin 1992 ndoqën të dy një kongres të Dëshmitarëve të Jehovait dhe Vladimirit i bëri përshtypje ajo që pa e që dëgjoi. Nela u pagëzua më 1994, kurse Vladimiri më 1997

Komente personale

Çfarë të ndihmon të luftosh shkurajimin?

Një nga gjërat që më mungon shumë është pjesëmarrja në asamble e kongrese. Kjo dhe disa kufizime të tjera ndonjëherë mund të më shterin forcat dhe të më shkurajojnë pak. Por e di që nuk jam vetëm. Jehovai dhe motrat e vëllezërit e mi të shtrenjtë më gjenden gjithnjë pranë. S’kam pikë dyshimi se Jehovai përherë do të më mbështetë, do të më mbrojë dhe do të më ndihmojë të qëndroj besnik në sprova.

Aleksandër Vasiçkini

Lindur: 1969 (Briansk, Rajoni i Brianskut)

Biografia: Ka shërbyer në ushtri para se të bëhej Dëshmitar i Jehovait. Kohët e fundit ka punuar në mirëmbajtjen e ambienteve të jashtme

Në vitin 1993 u martua me Natalinë dhe kanë dy fëmijë

I la mbresa mirësia që i treguan kur ndoqi mbledhjet e Dëshmitarëve të Jehovait. Filluan të studionin Biblën si çift. Natalia u pagëzua më 1994, kurse Aleksandri më 1995

Komente personale

Çfarë të ndihmon të mos e mbash mendjen gjithë kohës te sprovat?

Kam vënë re se kur filloj të mëshiroj veten, pikërisht atëherë ndiej se më vë poshtë shkurajimi. Në vend se të vras mendjen pse po më ndodh mua kjo sprovë, përqendrohem te privilegji që kam për të dëshmuar për Jehovain. Gjithashtu i kujtoj vetes se vështirësitë që po kaloj sot, janë veçse një faqe në historinë e jetës sime. Shumë shpejt do ta kthej faqen. Por nëse qëndroj besnik, do të kem mundësi ta shijoj në përjetësi miqësinë e ngushtë me Jehovain dhe me motrat e vëllezërit e mi.

Jemi të bindur se çfarëdolloj sprovash të hasim në këtë sistem, janë thjesht të përkohshme në krahasim me bekimet e përhershme që ka rezervuar Jehovai për shërbëtorët e tij besnikë.—2 Korintasve 4:17, 18.

Tabelë kronologjike

10 prill 2020

Ngrihet çështja penale
11 prill 2020

U kontrollojnë shtëpitë
16 prill 2020

U vendosin kufizime për udhëtimet
2 shkurt 2023

Fillon procesi penal

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME