27 QERSHOR 2023
RUSI

Shpallin fajtorë vëllezërit Skvorcov dhe Tibi

LUAJ

Më 20 qershor 2023, Gjykata e Qytetit të Taganrogut në Rajonin e Rostovit shpalli fajtorë vëllezërit Aleksandër Skvorcov dhe Valeri Tibi. Aleksandrin e dënuan me 7 vjet burg. Ai është në paraburgim që prej 7 dhjetorit 2021. Valerin e dënuan me 6 vjet vënie në provë. Atë e liruan pasi kishte qëndruar në paraburgim që prej 18 majit 2022.

Të dhëna

Aleksandër Skvorcovi

Lindur: 1962 (Taganrog)

Biografia: Ka punuar si saldator

Në vitin 1983 u martua me Larisën dhe kanë 2 vajza

Larisa filloi të studionte Biblën me Dëshmitarët e Jehovait dhe u pagëzua në vitin 1996. Aleksandrit i pëlqeu shumë shpresa e Biblës për një botë ku s’do të ketë padrejtësi dhe u pagëzua më 1997

I dënuar më parë në vitin 2015 me 5 vite e gjysmë vënie në provë

Komente personale nga bashkëshortja e Aleksandrit, Larisa a

Çfarë e ka ndihmuar Aleksandrin të përballojë vështirësitë në paraburgim?

Brenda vitit, Aleksandrit ia kanë ndryshuar qelinë 13 herë. Edhe pse nuk e ka gjithnjë të lehtë të shkojë mirë me shokët e qelisë, përpiqet fort të ketë marrëdhënie të mira me të gjithë. Më thotë shpesh se lutjet, leximi i Biblës dhe i letrave që i dërgojnë, e ndihmojnë ta mbajë të fortë besimin. Gjëja që Aleksandri vuan më tepër është ndarja nga familjarët dhe nga miqtë, ama falë Jehovait gëzon paqe të brendshme.

Si ka ndikuar kjo situatë te miqësia jote me Jehovain?

I besoj Jehovait më tepër se kurrë më parë. Mënyra si na ka mbështetur mua dhe tim shoq më siguron se Ai na do fort. Dhe më mbushen sytë me lot kur shoh sa shumë na gjenden vëllezërit e motrat dhe kur di që luten për ne.

Valeri Tibi

Lindur: 1977 (Novopokrovkë, Krime)

Biografia: Ka punuar si shofer kamioni

Nisi të studionte Biblën me Dëshmitarët e Jehovait pasi mësoi emrin e Perëndisë. U pagëzua në vitin 2004

Më 2012 u martua me Kristinën

Komente personale nga bashkëshortja e Valerit, Kristina b

Si arrin Valeri të përballojë pasiguritë e jetës në paraburgim?

Shpesh Valeri lutet për qetësi dhe forcë që të përballojë zhurmën dhe dyndjen në qelinë e tij. Këto cilësi u kanë rënë në sy shokëve të qelisë, të cilët e pyesin vazhdimisht: «Si ia del të jesh kaq i qetë? S’ka njeri më të kënaqur e më të gëzuar se ty këtu!» Valeri ndihet i lumtur që ka bërë mjaft biseda të bukura për besimin me këta burra, falë ndihmës që i jep Jehovai për të zbatuar parimet e Biblës. Madje shokët e qelisë i drejtohen atij për këshilla. Valeri po provon mbrojtjen e Jehovait, sepse njerëzit në burg e trajtojnë me respekt.

Cili varg nga Bibla të ka ndihmuar në veçanti gjatë kësaj periudhe?

Gjatë përndjekjes, Proverbat 3:6 më ka ndihmuar të mbështetem më plotësisht te Jehovai. Aty thuhet: «Kushtoji vëmendje në të gjitha udhët e tua, dhe ai do t’i drejtojë shtigjet e tua.» Vetëm Jehovai ka mençuri absolute. Kur lind një problem, kam mësuar sa e rëndësishme është të hap menjëherë Biblën, që të mësoj cili është mendimi i Jehovait për atë çështje. Në çdo situatë Jehovai është kujdesur përherë për mua.

E falënderojmë Jehovain për kujdesin e dashur dhe për drejtimin e tij, që na ndihmojnë të përballojmë çdo vështirësi që mund të na sjellë jeta.—Psalmi 5:12.

Tabelë kronologjike

20 mars 2021

Familjes Skvorcov i kontrollojnë shtëpinë
7 dhjetor 2021

Familjes Skvorcov i kontrollojnë shtëpinë për herë të dytë bashkë me 29 shtëpi të tjera të Dëshmitarëve të Jehovait në Taganrog. Kundër Aleksandrit ngrenë akuza penale dhe e futin në një burg të përkohshëm
8 dhjetor 2021

Aleksandrin e futin në paraburgim
29 mars 2022

Kundër Valerit ngrenë një çështje penale
31 mars 2022

Hetuesit bashkojnë çështjet e Aleksandrit dhe të Valerit
18 maj 2022

Valerin e arrestojnë dhe e futin në burg të përkohshëm
26 maj 2022

Valerin e futin në paraburgim
6 dhjetor 2022

Nis procesi penal
20 qershor 2023

Aleksandrin e dënojnë me 7 vjet burg. Valerin e dënojnë me 6 vjet vënie në provë

a b Gjatë përgatitjes së këtij artikulli, vëllezërit Skvorcov dhe Tibi ishin në paraburgim, ndaj nuk mund të merrnim komente prej tyre.

Shih edhe

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME