2 GUSHT 2021
RUSI

Të moshuarit besnikë ruajnë gëzimin pavarësisht nga dënimet që kanë marrë

LUAJ

Që nga viti 2017, kur entet ligjore të Dëshmitarëve të Jehovait u ndaluan në Rusi, pa asnjë arsye me vend autoritetet kanë vënë në shënjestër vëllezër e motra nga mbarë vendi—të rinj e të moshuar, nga mosha 18 deri në 89 vjeç. Deri në korrik të vitit 2021, 18 vëllezër e motra 60 vjeç e sipër, janë shpallur fajtorë dhe janë dënuar thjesht se praktikojnë besimin e tyre në mënyrë paqësore. Aktualisht, tre prej tyre janë në burg. a Raporti nga Trupi Udhëheqës nr. 4, 2021 fliste për sulmet skandaloze kundër vëllezërve e motrave të moshuar.

Si e kanë përballuar të moshuarit tanë të shtrenjtë këtë përndjekje? Me kënaqësi po ju tregojmë komentet inkurajuese që kanë thënë disa prej këtyre bashkëbesimtarëve besnikë.

Aleksandër Ganini

Lindur: 1957

Dënimi: Tre vjet vënie në provë dhe nëntë muaj kufizime për udhëtimin

Pagëzuar: 1997

Komente personale

Çfarë të ndihmon të jesh i gëzuar dhe pozitiv gjatë kësaj periudhe të vështirë?

Përmes organizatës së tij, Jehovai na tregon qartë si të mos dëshpërohemi kur përballemi me situata të tilla dhe si të qëndrojmë optimistë. Unë dhe gruaja kishim probleme me shëndetin edhe para se të më arrestonin. Por bëjmë një jetë aktive dhe nuk shpërqendrohemi nga ajo që ka më shumë rëndësi—të kujdesemi vazhdimisht për miqësinë tonë me Jehovain.

Si ka ndikuar te ti dhe te familja dënimi që ke marrë?

Besimi ynë është forcuar dhe jemi lidhur edhe më ngushtë me njëri-tjetrin. Jam i bindur se profecitë e Biblës po përmbushen tamam siç ishte parathënë dhe se vetëm pak na ndan nga ndryshimet rrënjësore që do të ndodhin. Kjo më jep forcën që të vazhdoj t’i shërbej Perëndisë pa shpërqendrime.

Juri Krutjakovi

Lindur: 1952

Dënimi: Gjashtë vjet vënie në provë, ku përfshihen 5 vjet liri me kusht dhe një vit me kufizime për udhëtimin

Pagëzuar: 1998

Komente personale

Si ka ndikuar te ti dhe te familja jote dënimi me vënie në provë?

Sigurisht që dënimi me vënie në provë është më mirë se burgu. Megjithatë është e vështirë të gjesh punë në moshën time, sidomos kur je akuzuar për vepër penale. Dhe duke pasur parasysh çmimet e ushqimeve, ilaçeve dhe shërbimeve mjekësore në këtë periudhë, pensioni im është shumë i vogël.

Çfarë problemesh shëndetësore po kalon dhe si po i përballon?

Vuaj nga osteoartriti i gjunjëve. Pasi u lirova nga qendra e paraburgimit, isha sëmurur me pneumoni, sepse në qeli kisha duhanpirës. Akoma kam probleme me mushkëritë. Përpiqem të ndjek rekomandimet e mjekut dhe të ruaj shëndetin me aq sa mundem, që të vazhdoj të bëj vullnetin e Jehovait.

Në cilat mënyra specifike të ka ndihmuar Jehovai që kur përfunduan seancat gjyqësore të çështjes sate?

Vëllezërit e motrat më kanë ndihmuar shumë. Fjalët e Psalmit 133:1 janë më se të vërteta. Dënimi ishte hiç para bekimit që kisha për të parë dhe për të provuar këtë lloj dashurie. Nuk e kishim menduar kurrë që do të lidhnim miqësi me kaq shumë vëllezër e motra. Kam parë se si Jehovai ka rregulluar gjithçka, si kujdeset nëpërmjet vëllazërisë, sa i butë është me ne dhe me sa shumë bekime na rrethon edhe në situatat më të vështira. Pas gjithë kësaj që kam parë, si të mos vazhdoj t’i shërbej një Perëndie kaq të dashur e kaq madhështor? As që e mendoj këtë.

Ludmilla Ponomarenko

Lindur: 1950

Dënimi: Dy vjet vënie në provë dhe një vit liri me kusht

Pagëzuar: 1998

Komente personale

Si kanë ndikuar te jeta jote e përditshme kufizimet aktuale?

Nuk mund të transferohem në një shtëpi tjetër pa njoftuar një agjenci speciale qeveritare e cila kontrollon aktivitetet e atyre që janë dënuar me vënie në provë. Përveç kësaj duhet të paraqitem te kjo agjenci një herë në muaj.

Si ka ndikuar dënimi te shëndeti yt?

Kam filluar të kem dhimbje koke të shpeshta që më zgjasin shumë. Gjithsesi më ndihmojnë jashtë mase lutjet që të jem e arsyeshme dhe që të ruaj qëndrimin e duhur për gjërat që s’i kam në dorë t’i ndryshoj.

Si të ka mbështetur Jehovai?

Që kur përfunduan seancat gjyqësore të çështjes sime, Jehovai më ka bekuar me bollëk. Ai më jep forcë që të vazhdoj ta adhuroj dhe s’më ka lënë pa ndihmë. Bashkëbesimtarët e dashur më gjenden pranë, dhe, kur del ndonjë problem, janë gati të më vijnë në ndihmë. Edhe kur gjërat vështirësoheshin dhe disa situata dukeshin si male të pakapërcyeshme, në fund Jehovai e kthente në bekim. Kam mësuar t’i besoj Jehovait edhe më shumë dhe të mbështetem tek ai për çdo gjë. I jam mirënjohëse Jehovait që më besoi këtë formë shërbimi—të flas para trupit gjykues. Jam e lumtur për këtë mundësi. Nuk kam arsye që të jem e shkurajuar dhe jam plotësisht e vendosur të vazhdoj garën deri në fund dhe të ndihmoj të tjerët të arrijnë atë vijë të mrekullueshme finishi.

Ginadi Shpakovski

Lindur: 1958

Dënimi: Në fillim u dënua me gjashtë vite e gjysmë burg. Pas apelimit, gjykata ia pezulloi dënimin e mëparshëm dhe e dënoi me dy vjet liri me kusht

Pagëzuar: 1995

Komente personale

Çfarë kufizimesh ke tani që mbaruan seancat gjyqësore?

Për 3 vjet, nuk kam të drejtë të marr pjesë në organizimin ose në aktivitetet e asnjë organizate fetare publike. Më kanë ndaluar të largohem nga shtëpia nga ora 11.00 e darkës deri në 6.00 të mëngjesit. Nuk mund të udhëtoj përtej kufijve të qytetit tim, as të ndryshoj banesë pa marrë leje. Veç kësaj, dy herë në muaj më duhet të paraqitem pranë një agjencie speciale qeveritare.

Si të kanë ndihmuar vëllezërit e motrat gjatë kësaj periudhe?

Më kanë ndihmuar jashtë mase. Që nga dita e parë në paraburgim, unë dhe familja ime kemi marrë letra, kartolina, vizatime dhe mesazhe ku na shprehnin mbështetjen e tyre, na jepnin zemër, na siguronin se na donin dhe na ofronin çfarëdolloj ndihme që kishim nevojë.

Si je bërë edhe më i vendosur që të vazhdosh t’i shërbesh Jehovait?

Gjithçka që i ka ndodhur familjes sime dhe mua këto vitet e fundit ma ka forcuar bindjen se i shërbej Perëndisë së vërtetë, Jehovait! Leximi e meditimi për ngjarjet që Bibla thotë se do të ndodhnin në «ditët e fundit» dhe fakti që jam drejtpërdrejt i përfshirë në këto ngjarje, nuk më lënë pikë dyshimi se jam në udhën e duhur, në udhën që çon në botën e re.

Valentina Suvorova

Lindur: 1948

Dënimi: Dy vjet vënie në provë

Pagëzuar: 1996

Komente personale

Si ka ndikuar te ti përndjekja?

Të shpallesh fajtore për krim, është poshtëruese dhe lënduese, se unë jam një person që beson te Perëndia i dashurisë, i gëzimit dhe i mëshirës. Ndihem vazhdimisht në ankth. Ka net që rri pa gjumë, më dhemb koka, më rritet tensioni dhe më dhemb shpina.

Çfarë të ka ndihmuar të qëndrosh pozitive?

Më ndihmon dashuria, mirënjohja dhe vlerësimi për Perëndinë tonë, Jehovain, për ligjet e parimet e tij dhe për organizatën tonë. Në të kaluarën kisha njohuri për dashurinë, mëshirën, ngushëllimin dhe inkurajimin që jep Ati ynë i shtrenjtë qiellor, Perëndia Jehova. Por sot e kam përjetuar vetë si kujdeset Jehovai për nevojat e mia çdo ditë dhe si më ndihmon t’i qëndroj besnike. E kam ndier këtë falë bashkëbesimtarëve tanë të dashur, miqve të ngushtë, vëllezërve përgjegjës, kongregacionit dhe tërë organizatës sonë. Faleminderit të gjithëve!

Jemi mirënjohës për shembullin e shkëlqyer të besnikëve të moshuar në Rusi! Ata kanë marrë me guxim anën e drejtësisë. Shembulli i tyre është i denjë për t’u imituar dhe, më e rëndësishmja, është i bukur në sytë e Perëndisë.—Proverbat 16:31.

a Motër Valentina Baranovski, 70 vjeçe, po vuan dënimin e saj me dy vite burg. Vëlla Aleksandër Ivshini, 63 vjeç, po vuan dënimin me shtatë vite e gjysmë burg. Dhe vëlla Juri Savelievi, 68 vjeç, po vuan dënimin me gjashtë vite burg.

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME