10 GUSHT 2023
RUSI

Të vendosur të ruajnë gëzimin pavarësisht nga përndjekja

LUAJ

Së shpejti, Gjykata e Qytetit të Siktivkarskit në Republikën e Komit do të shpallë vendimin për çështjen e vëllezërve Aleksandër Ketov, Andrej Harlamov, Aleksandër Krugljakov, të motrës Lidia Nekrasov dhe të vëllait Sergej Ushahin. Prokuroria nuk është shprehur ende se çfarë dënimi kërkon për ta.

Të dhëna

Andrej Harlamovi

Lindur: 1971 (Siktivkar)

Biografia: Punon si inxhinier i sistemeve të ngrohjes

Në vitin 1990 u martua me Larisën

Një koleg filloi t’i fliste për Biblën, dhe Andreji pa dobitë që vinin kur zbatonte parimet e saj në jetë. Andreji dhe Larisa u pagëzuan më 1994

Komente personale

Çfarë të ka ndihmuar të qëndrosh besnik?

Çdo sprovë më jep mundësi t’i afrohem më shumë Jehovait. Pasi ngritën akuza penale kundër meje, ka pasur momente kur më dukej sikur nuk do t’ia dilja dot. Por teksa koha kalonte, shihja si më ndihmonte Jehovai në një mënyrë shumë të veçantë. Ai përdorte njerëz të ndryshëm për të më thënë një fjalë inkurajimi. S’kam pikë dyshimi se Jehovai është me mua dhe po më mban në krahë. Kjo më sjell ndër mend fjalët e Jakovit 5:11: «Ne i konsiderojmë të lumtur ata që treguan qëndrueshmëri. Ju keni dëgjuar për qëndrueshmërinë e Jobit dhe e keni parë si e shpërbleu Jehovai, se Jehovai është shumë i dhembshur e i mëshirshëm.» Tani që e kam provuar vetë kujdesin e dashur të Jehovait, jam më i vendosur ta shpreh dashurinë për të dhe t’i qëndroj besnik.

Aleksandër Krugljakovi

Lindur: 1979 (Uhtë, Republika e Komit)

Biografia: Punon si agjent i pronave të paluajtshme

Filloi ta lexonte Biblën kur ishte adoleshent. Pasi studioi Biblën me Dëshmitarët e Jehovait, hoqi dorë nga abuzimi me alkoolin dhe me drogën. U pagëzua më 2000

Më 2005 u martua me Tatjanën

Komente personale

Çfarë të nxit të japësh dëshmi pavarësisht nga përndjekja?

Te Luka 21:12, 13, Jezui paratha se dishepujt e tij do t’i përndiqnin, do t’i burgosnin e do t’i nxirrnin para autoriteteve. Por tregoi edhe rezultatin: «Që të jepni dëshmi para tyre.» Kam menduar sa i turpëruar do të ndihesha kur, aty ulur në burg, do të mendoja për kohën kur kisha mundësi t’u flisja të tjerëve për të vërtetën, por nuk e shfrytëzova. Prandaj synoj të flas me sa më shumë zyrtarë të mundem. Shpesh theksoj ngjashmëritë mes punës së tyre dhe veprës sonë. Secili prej nesh përpiqet ta përmirësojë komunitetin. Ata e bëjnë këtë duke burgosur kriminelët që të mos dëmtojnë shoqërinë. Mirëpo, kur dalin nga burgu, shpesh u rikthehen udhëve të këqija. Kurse ne, me ndihmën e Biblës i ndihmojmë njerëzit të bëjnë ndryshime të përhershme në jetën e tyre dhe të kontribuojnë për një shoqëri paqësore.

Lidia Nekrasovi

Lindur: 1953 (Kuratovë, Republika e Komit)

Biografia: Ka punuar si mësuese dhe si infermiere asistente. Ka rritur tre djem

Nisi të studionte Biblën më 1993. U prek thellë kur mësoi se Perëndia ka shumë cilësi të bukura, ndër to edhe drejtësinë. U pagëzua më 1997

Komente personale

Çfarë po të ndihmon ta përballosh sprovën me gëzim?

Vëllezërit e motrat janë një dhuratë e çmuar nga Perëndia. Tani e kuptoj sa nevojë kemi për njëri-tjetrin. Mbështetja dhe ndihma që më japin, ma forcojnë vendosmërinë që të mos më lëshojë zemra. Kur përqendrohem te dashuria për Jehovain dhe te dëshira për të mbështetur ata që janë në burg, nxitem të qëndroj besnike. Ndiej se fryma e Jehovait më ndihmon, prandaj jam e lumtur që i shërbej atij.

Sergej Ushahini

Lindur: 1961 (Piniug, Rajoni i Kirovit)

Biografia: Punon në një fabrikë letre

U martua me Nataljan më 1987 dhe kanë një vajzë e një djalë

Dëgjoi për Dëshmitarët e Jehovait kur mamaja e tij filloi të studionte Biblën. U bind se kishte gjetur të vërtetën kur përgjigjet për pyetjet e tij i mori direkt nga Bibla. U pagëzua më 1999, ndërsa Natalja më 2005

Komente personale

Çfarë të ka ndihmuar të ruash optimizmin?

Është normale që hera-herës shkurajimi të na shterojë forcat e të na bëjë negativë. I përballoj këto ndjenja duke u lutur, duke lexuar Biblën dhe duke kaluar kohë me motrat e vëllezërit. I lutem specifikisht Jehovait të më ndihmojë t’u jap zemër të tjerëve, sidomos tërë atyre motrave e vëllezërve të moshuar. Kur i ndihmoj të jenë pozitivë pavarësisht nga sfidat e jetës dhe kur u them një fjalë të mirë, ndihem jashtë mase i lumtur. Për mua është privilegj i madh që Jehovai më përdor në këtë mënyrë.

Siç e tregojnë edhe këto përvoja, Jehovai u jep «fuqi me bollëk» vëllezërve e motrave tona, që të përballojnë sprovat dhe të qëndrojnë besnikë.—Isaia 40:29.

Tabelë kronologjike

2 mars 2021

Autoritetet kontrollojnë shtëpitë e të paktën 14 familjeve Dëshmitarë të Jehovait, në Siktivkar. Aleksandër Ketovin, Andrej Harlamovin dhe Aleksandër Krugljakovin i fusin në një burg të përkohshëm. Lidia Nekrasovit dhe Sergej Ushahinit u vendosin kufizime për udhëtimin
3 mars 2021

Aleksandër Ketovin dhe Andrej Harlamovin i lirojnë nga burgu i përkohshëm dhe i kalojnë në arrest shtëpie. Aleksandër Krugljakovin e çojnë në një qendër paraburgimi
27 prill 2021

Andrej Harlamovin e lirojnë nga arresti i shtëpisë
28 prill 2021

Aleksandër Ketovin e lirojnë nga arresti i shtëpisë, kurse Aleksandër Krugljakovin e lirojnë nga qendra e paraburgimit
19 prill 2022

Fillon procesi penal
9 qershor 2022

Gjykatësi ia kthen çështjen prokurorisë për mungesë provash për ekstremizëm
14 shkurt 2023

Rifillon procesi penal me një gjykatës së ri

Mund të të pëlqejë edhe . . .

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME