28 QERSHOR 2024
RUSI

Tri motra shpallen fajtore në Republikën e Kalmikisë, Rusi

LUAJ

Më 24 qershor 2024, Gjykata e Qytetit të Elistës në Republikën e Kalmikisë shpalli fajtore motrat Tsagana Halgajevi, Jekaterina Menkovi dhe Kishta Tutinovi. Tsaganën dhe Jekaterinën i dënoi me 2 vjet vënie në provë. Kurse Kishtën e dënoi me 3 vjet vënie në provë. Për momentin nuk u kërkohet të futen në burg.

Të dhëna

Tsagana Halgajevi

Lindur: 1978 (Lagan, Republika e Kalmikisë)

Biografia: Ka punuar si rrobaqepëse

Kërkoi në fe të ndryshme përgjigje për pyetjet e saj. Gjeti përgjigje logjike në Bibël kur studioi me Dëshmitarët e Jehovait

U pagëzua më 2004

Komente personale

Për çfarë je veçanërisht mirënjohëse gjatë kësaj periudhe të vështirë?

I çmoj thellë lutjet që bëjnë për mua vëllezërit e motrat. Ndonjëherë, kur jam e shkurajuar, s’mundem të bëj gjë tjetër veçse të rënkoj kur i lutem Jehovait. E kam të vështirë edhe të gjej fjalët e duhura. Por e di që edhe të tjerët po luten për mua dhe e dalloj si u përgjigjet Jehovai këtyre lutjeve. Kjo më shtyn të lutem edhe unë në mënyrë më specifike për të tjerët. Marrim shumë zemër nga mbështetja që i japim njëri-tjetrit; kjo na kujton se nuk jemi vetëm në këtë sprovë.

Jekaterina Menkovi

Lindur: 1982 (Tavn-Gashun, Republika e Kalmikisë)

Biografia: Ka punuar si ndihmëslaborante

U martua më 2009. Ka një djalë

I bëri përshtypje kur pa se Dëshmitarët e Jehovait jetojnë në përputhje me Biblën dhe se si ia përmirësoi jetën zbatimi i parimeve të saj. U pagëzua më 2017

Komente personale

Cilat vargje nga Bibla ta kanë forcuar besimin te Jehovai?

Fjalët te Psalmi 8:3, 4 më duken shumë të fuqishme: «Kur shoh qiejt, veprën [e gishtërinjve të tu, (shënimi)], hënën dhe yjet që ke bërë, mendoj: ç’është vdekatari që ta mbash në mendje?! Ç’është biri i njeriut që të kujdesesh për të?!» Me këtë gjuhë të figurshme, Bibla thotë se Jehovai arriti të krijonte universin e paanë dhe gjithçka në të, vetëm me gishtërinjtë e tij. Ky mendim më siguron se me mbështetjen e fuqishme të Jehovait, nuk kam arsye për t’u frikësuar para asgjëje.

Kishta Tutinovi

Lindur: 1961 (Novolesnojë, Rajoni i Astrakanit)

Biografia: Ka punuar si rrobaqepëse. Ka rritur e vetme dy djem

Është rritur në një familje budiste. Një nga klientet e saj, që ishte Dëshmitare e Jehovait, i foli për Biblën. Kishta kënaqej tek mësonte si ta adhuronte Perëndinë pa tradita e bestytni. U pagëzua më 2003

Komente personale

Çfarë të ka ndihmuar të qëndrosh optimiste?

Gjatë arrestit të shtëpisë, më ngujuan brenda për më shumë se 4 muaj. Kjo s’ishte aspak e lehtë, sepse në atë kohë jetoja në një garsoniere me djalin dhe familjen e tij. Jetonim 7 veta nën një çati. Mundësia për të lëvizur brenda kësaj hapësire kaq të vogël, më ndikoi për keq te shëndeti. Por më ndihmoi shumë meditimi për shkrimin te Proverbat 24:10, ku thuhet: «Po të shkurajohesh në ditë të keqe, fuqia jote do të jetë e paktë.» Kuptova se duhej të zgjidha: ose të përqendrohesha te gjërat negative, ose të kërkoja gjërat pozitive në jetën time. M’u kujtua shembulli i Jozefit. Kur ishte në burg, ai nuk lejoi që rrethanat ta bënin të hidhur. Prandaj vendosa ta mbaja mendjen te gjërat pozitive, dhe kështu arrita të ruaja gëzimin.

I çmojmë këta shembuj besimi të ditëve tona. Veç kësaj, jemi mirënjohës që Jehovai i vëren të gjitha vuajtjet tona dhe do të na shpërblejë për besnikërinë që tregojmë.—Psalmi 37:18.

Tabelë kronologjike

16 shkurt 2023

Ngrihet çështja penale kundër Kishtës
28 shkurt 2023

I kontrollojnë shtëpinë. Kishtën e futin në një burg të përkohshëm
1 mars 2023

Tsaganën e pushojnë nga puna për shkak të stigmës si dikush që po ndiqet penalisht. Kishtën e lirojnë nga burgu i përkohshëm dhe e kalojnë në arrest shtëpie
21 korrik 2023

Kishtën e lirojnë nga arresti i shtëpisë
19 dhjetor 2023

Ngrihet çështja penale kundër Jekaterinës dhe Tsaganës. U vendosin kufizime për udhëtimet
9 shkurt 2024

Kishtës i vendosin kufizime për udhëtimet
1 prill 2024

Fillon procesi penal
24 qershor 2024

I shpallin fajtore dhe i dënojnë me vënie në provë

Shih edhe

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME