Më 9 shtator 2021, Gjykata e Krahinës së Birobidzhanit në Rajonin Autonom Jude shpalli fajtor vëlla Andrej Gubinin dhe e dënoi me dy vite e gjysmë vënie në provë. Për momentin nuk duhet të futet në burg.

Andrej Gubini

• Lindur: 1974 (Qyteti i Saranit, Kazakistan)

• Biografia: Ka një vëlla dhe një motër që janë më të mëdhenj se ai. Kur ishte i ri, për të mbështetur familjen, pas shkolle punonte me një zanatçi me orar të shkurtuar duke rregulluar bravat. Më vonë u bë tornitor dhe shofer i makinerive të rënda. I pëlqen sporti, të shkruajë poezi dhe të luajë instrumente muzikore

• Që kur ishte i vogël, shqetësohej nga padrejtësitë dhe ligësitë në botë. Kur studioi Biblën, gjeti paqe dhe qëllim në jetë. Premtimi i Biblës se Perëndia Jehova do t’i rikthejë drejtësinë dhe paqen njerëzimit, e shtyu t’ia kushtonte jetën atij. U pagëzua në vitin 1991 në moshën 17-vjeçare. Në vitin 2007 u martua me Tatjanën dhe në vitin 2011 u transferuan në Birobidzhan

Më 12 shkurt 2020, agjentë të Shërbimit të Sigurimit Federal (FSB) filluan ta merrnin në pyetje vëlla Andrej Gubinin. Më 17 shtator 2020 nisi procesi gjyqësor për çështjen e tij penale.

Çështja e tij është vetëm një nga 19 hetimet penale që kanë nisur kundër motrave e vëllezërve tanë në Rajonin Autonom Jude, si rezultat i bastisjeve në masë të zhvilluara gjatë operacionit të koduar me emrin «Dita e Gjykimit». Më 17 maj 2018, 150 policë kontrolluan 22 shtëpi të Dëshmitarëve të Jehovait. Autoritetet konfiskuan karta bankare, pará, fotografi, kompjuterë dhe pajisje elektronike.

Autoritetet u bllokuan llogaritë bankare Andrejit dhe Tatjanës. Për këtë arsye, çifti po kalon vështirësi të jashtëzakonshme ekonomike. Si pasojë e përndjekjes që po zgjat prej muajsh, shëndeti i Tatjanës është rënduar ndjeshëm. Prapëseprapë, çifti merr forcë e ngushëllim falë leximit të rregullt të Biblës. Kanë nxjerrë dobi veçanërisht nga këshillat e saj praktike se si të përballojnë vështirësitë.

Besimi i Andrejit te Jehovai dhe tek organizata e Tij është forcuar nga mbështetja e jashtëzakonshme që i kanë dhënë motrat e vëllezërit në besim. Për shembull, një ditë Andrejin e kapi ankthi. I hapi zemrën një vëllai që, ashtu si ai, po përballet me çështje penale. Fillimisht vëllai e siguroi Andrejin se është normale të ndihej ashtu në ato rrethana. Pastaj i solli ndër mend se Jezui e kishte për nder të përndiqej për emrin e Jehovait. Ai thotë: «Pas kësaj u qetësova. Jam i vendosur të vazhdoj të bëj vullnetin e Atit tonë.»

Lutemi që Andreji dhe Tatjana të vazhdojnë të gjejnë forcë e ngushëllim te Fjala e Perëndisë dhe te vëllezërit e motrat. Nuk kemi pikë dyshimi se «atyre që kanë nderim të thellë për Perëndinë e vërtetë, do t’u dalë për mirë».—Eklisiastiu 8:12.