15 SHTATOR 2023
RUSI

Vëlla Sergei Gromovi dënohet me 6 vjet e 1 muaj burg në Rusi

LUAJ

Më 14 shtator 2023, Gjykata Krahinore e Moskovskit në Kazan shpalli fajtor vëllanë Sergei Gromov dhe e dënoi me 6 vjet e 1 muaj burg. Ai është në burg që prej 15 marsit 2022 dhe do të mbetet në arrest.

Të dhëna

Sergei Gromovi

Lindur: 1969 (Kazan, Republika e Tatarstanit)

Biografia: Ka punuar si grafik dizajner

Më 1990 u martua me Jelenën dhe kanë një djalë e një vajzë

U rrit si ateist, por shpesh vriste mendjen për origjinën e jetës. Filloi të studionte me Dëshmitarët e Jehovait dhe u kënaq shumë kur mësoi se Bibla përputhet me shkencën. Ai dhe Jelena u pagëzuan në vitin 1995

Komente personale nga bashkëshortja e Sergeit, Jelena a

Si u përgatitët ti dhe Sergei për përndjekjen?

Kur ndryshoi situata në Rusi më 2017, nuk na zuri ankthi. Përkundrazi, ia hodhëm barrën Jehovait. Si familje, ia vumë veshin këshillave që morëm nga organizata dhe ishim të vendosur të mos e futnim veten nën ndalim duke u dorëzuar para frikës. Vazhduam me jetën tonë dhe me aktivitetet teokratike. Gjithashtu luteshim shumë dhe inkurajonim vëllezërit e motrat.

Si të ka mbështetur Jehovai tani që je larg bashkëshortit?

Kurrë më parë nuk kam folur me Jehovain kaq shpesh dhe kaq hapur që nga koha kur morën Sergein. Jam shumë e vetëdijshme se Jehovai po më rri pranë. Asnjëherë nuk më lë që ta përballoj këtë situatë e vetme. Ndonjëherë ndodh që, sapo mbaroj lutjen, ndiej që Jehovai më është përgjigjur me anë të një fjale të ngrohtë, një përqafimi ose diçka tjetër që bën dikush për të më mbështetur. Nëpërmjet vëllezërve e motrave, është sikur Jehovai po më mban në krahët e tij. Kjo më ndihmon të mos përqendrohem tepër te problemet e mia, por më motivon të bëj aq sa mundem për të ndihmuar të tjerët.

I çmojmë shumë shembujt e Sergeit dhe të Jelenës, që me besnikëri po mbështeten plot besim te Jehovai. Kur shikojmë se Jehovai po i bekon për besnikërinë e tyre, bindemi edhe më shumë se «dora e Jehovait nuk është aq e shkurtër sa të mos shpëtojë dot, dhe veshi i tij nuk është aq i pandjeshëm sa të mos dëgjojë dot».—Isaia 59:1.

Tabelë kronologjike

15 mars 2022

Ngrihet një çështje penale. E marrin në pyetje dhe e futin në një burg të përkohshëm
16 mars 2022

I kontrollojnë shtëpinë
17 mars 2022

E transferojnë në një qendër paraburgimi
30 mars 2023

Fillon procesi penal
14 shtator 2023

E shpallin fajtor dhe e dënojnë me 6 vjet e 1 muaj burg

a Vëlla Gromovi ishte në paraburgim ndërsa po përgatitej ky artikull, ndaj e kishim të pamundur të merrnim komente prej tij.

Shih edhe

LAJME

Burgosen për shkak të besimit—Rusi

Dëshmitarët e Jehovait në Rusi janë burgosur për shkak të besimit. Lexo historinë e tyre dhe shih listën e printueshme që ka të gjithë Dëshmitarët që janë në burg në këtë moment.

LAJME