Më 22 shkurt 2023, vëllanë Andrej Andrejev e liruan nga një burg në Rusi pas më tepër se 3 vjetësh.

Më 16 tetor 2019, Andrejin e arrestuan bashkë me disa vëllezër të tjerë, kur autoritetet kontrolluan shumë shtëpi dhe morën në pyetje sa e sa Dëshmitarë të Jehovait në Kursk. Pas thuajse 20 muajsh në paraburgim, më 3 qershor 2021 atë e dënuan me burg.

Ndërsa ishte në burg për shkak të besimit, Andreji bënte çmos të ndihmonte gruan e tij, Svetlanën, dhe dy vajzat, Anzhelikën dhe Albinën, të ruanin miqësinë e ngushtë me Jehovain. Përmes letrave u jepte zemër vazhdimisht nga Bibla, e madje shkroi fjalimin e martesës për Anzhelikën, e cila u martua kur ai ishte në burg. Anzhelika thotë: «Babi shkroi një fjalim të mrekullueshëm e prekës. I emocionoi të gjithë të ftuarit . . . dhe na u duk sikur ishte aty me ne atë ditë.»

Për të takuar Andrejin, familja e tij duhej të udhëtonte 8 orë me autobus vetëm vajtje. Edhe pse kjo ishte e vështirë, Svetlana tregon se Dëshmitarët vendës i mbështetën gjithmonë atë dhe vajzat e saj, duke u siguruar strehim, ushqim dhe transport për në burg. Disa mbanin radhën te zona e vizitorëve, madje shpeshherë edhe gjatë natës, vetëm për t’i ruajtur vendin familjes që të arrinin të takonin Andrejin.

Edhe pse trajtimi i ashpër në burg i solli pasoja te shëndeti, besimi i Andrejit mbeti i palëkundur. Falë sjelljes së tij shembullore dhe cilësive të krishtere fitoi respektin e autoriteteve të burgut, të cilët i dhanë mundësi të kishte më shumë vizita. Ja si shprehet Andreji për dënimin: «Nuk ndiej asnjë fije mërie, zemërimi e absolutisht urrejtjeje për askënd. Me ndihmën e Perëndisë ia kam dalë mbanë dhe jam i lumtur.»

Jemi të bindur se Jehovai do të vazhdojë ta bekojë me bollëk vendosmërinë e Andrejit për të shfaqur dashuri si ajo e Krishtit.—1 Gjonit 4:16.