NJU JORK—Dëshmitarët e Jehovait po i përgjigjen kërcënimit për të ndaluar adhurimin e tyre në Rusi me anë të një fushate globale për të shkruar letra, duke i kërkuar drejtpërdrejtë ndihmë Kremlinit dhe zyrtarëve të Gjykatës së Lartë. Trupi Udhëheqës i Dëshmitarëve të Jehovait po fton të marrin pjesë më shumë se 8.000.000 Dëshmitarë në mbarë botën.

Më 15 mars 2017, Ministria e Drejtësisë e Rusisë ka paraqitur një kërkesë në Gjykatën e Lartë të Federatës Ruse, në të cilën kërkon që Qendra Administrative e Dëshmitarëve të Jehovait të shpallet organizatë fetare ekstremiste dhe të mbyllet plotësisht. Kërkesa përfshin edhe ndalimin e aktiviteteve të Qendrës së tyre Administrative. Nëse Gjykata e lartë e miraton këtë kërkesë, qendra kombëtare e Dëshmitarëve pranë Shën-Pjetërburgut do të mbyllet. Si pasojë, rreth 400 ente ligjore lokale do të mbylleshin, duke bërë kështu të paligjshme shërbimet e më shumë se 2.300 kongregacioneve të Dëshmitarëve të Jehovait në Rusi. Prona e degës si dhe vendet e adhurimit të përdorura nga Dëshmitarët në të gjithë vendin mund të konfiskohen nga shteti. Gjithashtu, çdo Dëshmitar i Jehovait do të bëhej subjekt i ndjekjes penale thjesht sepse kryen aktivitete të besimit të tij. Pritet që Gjykata e Lartë të marrë vendim për kërkesën në datën 5 prill.

«Trupi Udhëheqës i Dëshmitarëve të Jehovait dëshiron t’i kushtohet vëmendje maksimale kësaj situate kritike»,​—thotë Dejvid Semoniani, një zëdhënës në selinë botërore të Dëshmitarëve. «Të ndjekësh penalisht, si të ishin terroristë, qytetarë që nuk janë të dhunshëm dhe që i binden ligjit, është qartësisht një keqzbatim i ligjeve kundër ekstremizmit. Një ndjekje e tillë penale është bazuar në themele krejtësisht të rreme.»

Kjo fushatë globale e Dëshmitarëve nuk është pa precedentë. Rreth 20 vjet më parë, Dëshmitarët shkruan për të mbrojtur bashkëbesimtarët e tyre në Rusi, në përgjigje të një fushate shpifjesh nga ana e disa pjesëtarëve të qeverisë së asaj kohe. Gjithashtu, Dëshmitarët kanë bërë fushata të tjera duke u shkruar letra zyrtarëve qeveritarë, për t’i motivuar që t’i jepnin fund përndjekjes së Dëshmitarëve në shtete të tjera, përfshirë këtu Jordaninë, Korenë dhe Malavinë.

«Është e qartë se të lexosh Biblën, të këndosh dhe të lutesh me bashkëbesimtarët nuk janë aktivitete kriminale»,​—shton Z. Semoniani. «Shpresojmë që fushata jonë globale për të shkruar letra do të motivojë zyrtarët rus të ndalojnë këtë veprim të pajustifikueshëm kundër bashkadhuruesve tanë.»

Zëdhënësit për mediat:

Ndërkombëtar: Dejvid Semoniani, Zyra e Informacionit Publik, +1-845-524-3000

Rusi: Jaroslav Sivulski, +7-812-702-2691