22 SHTATOR 2016
RUSI
PJESA 1
Opinione nga ekspertët: Rusia përdor ligjin kundër ekstremizmit si taktikë për t’i shpallur të jashtëligjshëm Dëshmitarët e Jehovait
Kjo është Pjesa 1 e një serie me tri pjesë, bazuar në intervistat ekskluzive me studiues të njohur të fesë, të politikës dhe të sociologjisë, si dhe me ekspertë të studimeve sovjetike dhe postsovjetike.
SHËN-PJETËRBURG, Rusi—Zyra e Prokurorit të Përgjithshëm e Federatës Ruse po përpiqet t’i shpallë «ekstremistë» Dëshmitarët e Jehovait. Nëse gjykata vendos në favor të palës akuzuese, kjo mund të çojë në mbylljen e entit ligjor kombëtar të Dëshmitarëve, dhe si pasojë në ndalimin e veprimtarisë së tyre në gjithë federatën. Dëshmitarët i kanë apeluar akuzat kundër tyre dhe seanca gjyqësore pritet të rifillojë më 23 shtator 2016.
Çështja kundër Dëshmitarëve bazohet në ligjin rus kundër ekstremizmit, të cilin studiuesit e quajnë «diskriminues», «me mangësi të thella» dhe «krejtësisht absurd».
Dr. Derik H. Dejvisi, ish-drejtor i J.M. Dawson Institute of Church-State Studies në Baylor University, thotë: «Llojet e ekstremizmit që duhen luftuar janë ato që vënë në rrezik jetën e njerëzve. Lufta kundër çdo gjëje tjetër është në vetvete formë ekstremizmi.»
Dr. Mark Jyrgensmajeri, drejtor i Orfalea Center for Global and International Studies në Universitetin e Kalifornisë, Santa-Barbara, shpjegon arsyen e një veprimi të tillë ekstrem kundër një grupi fetar jo të dhunshëm siç janë Dëshmitarët: «Kufizimi i lirisë së fesë në emër të luftës kundër ekstremizmit është një taktikë për të ardhur keq.» Përveç kësaj, dr. Xhim Bekfordi, anëtar i Akademisë Britanike, shpjegon se «elementë brenda Kishës Ortodokse Ruse komplotojnë me autoritetet, që të mbështetin interesat e tyre dhe të shtypin këdo që e shohin si konkurrent».
Ekspertët shpjegojnë se problemi nuk është vetëm abuzimi me ligjin, por edhe fakti se vetë struktura e ligjit lë hapësirë për abuzime. Qendra SOVA për të drejtat e njeriut, me qendër në Moskë, pohon: «Siç e kemi thënë vazhdimisht, legjislacioni kundër ekstremizmit, me shprehjet e tij të mjegullta, krijon një mjet të përsosur për të ndjekur penalisht kundërshtarë politikë ose grupe të tjera që dallojnë nga fetë kryesore.»
Dr. Emili B. Barani, asistente-profesoreshë e historisë së Rusisë dhe e Evropës Lindore në Middle Tennessee State University, arsyeton: «Qytetarët rusë duhet t’i shqetësojë vendimi i Shtetit për të diskriminuar Dëshmitarët, sepse tregon se Shteti është i gatshëm të heqë të drejtat e barabarta të grupeve të tjera dhe të marrë masa të ngjashme kundër komuniteteve të tjera të vogla.»
Zëdhënësi(t) për mediat:
Ndërkombëtar: Dejvid Semoniani, Zyra e Informacionit Publik, 1-718-560-5000
Rusi: Jaroslav Sivulski, 7-812-702-2691