Më 25 shtator 2021 u prezantua Bibla—Ungjilli sipas Mateut në format dixhital në gjuhën hmonge. Vëlla Xhefri Xheksoni, anëtar i Trupit Udhëheqës, e prezantoi këtë libër të Biblës gjatë një mbledhjeje speciale virtuale që u transmetua në të gjithë botën për një auditor me më shumë se 2.500 veta.

Ky është libri i parë i Biblës nga Shkrimet e Shenjta—Përkthimi Bota e Re që botohet në gjuhën hmonge, e cila flitet nga më shumë se 3,9 milionë veta në botë. a Populli hmong beson në animizëm dhe shamanizëm.

Në vitet 70, shumë nga popullsia hmonge u vendosën në kampet e refugjatëve në Tajlandë. Më vonë, një pjesë e mirë e tyre emigruan në vendet perëndimore; shumica vajti në Shtetet e Bashkuara.

Sot hmongët që janë në Shtetet e Bashkuara, jetojnë kryesisht në Kaliforni, Minesotë dhe Uiskonsin. Dëshmitarët e Jehovait filluan të përkthenin në gjuhën hmonge në vitin 2007. Më 2012, në Sakramento, Kaliforni, u hap një Zyrë Rajonale Përkthimi.

Skuadra e përkthimit e përfundoi librin e Mateut për 3 muaj. Për projektin bashkëpunuan disa redaktorë nga 5 vende.

Skuadrës iu desh të kapërcente një vështirësi të pazakontë. Gjuha hmonge, që u zyrtarizua si gjuhë e shkruar në vitet 50, nuk ka një standard për mënyrën si shkruhen fjalët dhe shkronjat e mëdha.

Pas vitit 1980 filluan të viheshin në dispozicion përkthimet e para të Biblës, por shumë hmongfolësve nuk ua mbante xhepi t’i blinin. Përkthimet kishin edhe goxha gabime që fshihnin kuptimin e saktë të Shkrimeve. Për shembull, një përkthim e zëvendësonte emrin e Perëndisë, Jehova, me emrin e një personazhi nga historia tradicionale e popullit hmong.

Një përkthyes tha: «Tani me Përkthimi Bota e Re në gjuhën hmonge, njerëzit me zemër të sinqertë më në fund do të shohin emrin e Jehovait në Biblat e tyre dhe do të bëhen miq të tij. Këtë po pritnim dhe për këtë jemi lutur gjithë këto vite.»

Lexuesit kanë shprehur mirënjohjen e tyre për cilësinë e lartë të përkthimit. Një lexues tha: «Mbeta gojëhapur kur lexova librin e Mateut në gjuhën hmonge. Vrisja mendjen: ‘Si ka mundësi që ky përkthim më ngjall kaq shumë emocione?’ Arrija ta përfytyroja menjëherë të gjithë tregimin.»

Prezantimi i librit të Mateut në gjuhën hmonge është një përkujtues i fuqishëm se Perëndia ynë i paanshëm do ta vërë Fjalën e tij në dispozicion të të gjithë atyre që po e kërkojnë.—Veprat 10:34, 35.