Më 23 nëntor 2023, u nda nga jeta motër Meri Larimeri, e cila u diplomua në klasën e parë të Kolegjit Watchtower të Galadit. a Meri lindi më 4 qershor 1920, në Sinëri-Hill, Pensilvani, SHBA. Në vitin 1935, në moshën 15-vjeçare, u pagëzua në një kongres në Uashington D.C., SHBA. Katër vjet më vonë, motër Larimeri filloi shërbimin si pioniere e rregullt dhe shpejt u bë e njohur si një predikuese e zellshme.

Në dhjetor të vitit 1942, vëlla Nejthën Nori, i cili merrte drejtimin në organizatë në atë kohë, ftoi Merin që të aplikonte për një shkollë të re që quhej Kolegji Watchtower i Galadit. Pjesërisht në ftesë thuhej se «qëllimi i kolegjit është të përgatitë shërbëtorët fetarë të emëruar, burra e gra, për veprën misionare, në çdo cep të botës». Gjithashtu shtonte: «Kursi zgjat 5 muaj. . . . Që ai të përfundojë në një kohë kaq të shkurtër, kërkohet përkushtim dhe studim intensiv.» Meri e plotësoi kërkesën menjëherë.

Më 1 shkurt 1943, ajo bashkë me 99 studentë të tjerë, nisën ditën e parë të kësaj shkolle të re, që u zhvillua në Lansingun Jugor, Nju-Jork, SHBA. Gjatë gjithë kursit që zgjati thuajse 5 muaj, Meri studioi fort që të mësonte më shumë për Shkrimet. Ajo ishte një studente e shkëlqyer dhe u diplomua më 23 qershor 1943.

Pas diplomimit, Meri u caktua si misionare në Kubë. Duke folur për disa nga sfidat që hasi në caktimin e ri, ajo kujtonte: «Njerëzit atje ishin të varfër. Në shërbim, na duhej të ecnim goxha. . . . Nuk kishim makinë.» Meri qëndroi në caktim deri në vitin 1948, kur u kthye në Pensilvani që të kujdesej për të ëmën, e cila ishte dëmtuar rëndë. Në dekadat që pasuan, Meri, e cila qëndroi beqare, u angazhua plotësisht në shërbim dhe në aktivitete të tjera teokratike. Para se të vdiste, po shërbente në një kongregacion në Glendal, Kaliforni, SHBA.

Sot Shkolla Watchtower e Galadit ndodhet në Paterson, Nju-Jork, ku aktualisht po zhvillohet klasa e 155-të. Kur vëllai Mark Numer, një instruktor Galadi, mori vesh se Meri kishte vdekur, tha: «Meri Larimeri ishte një vajzë e re nga një qytezë e vogël, e cila ishte gati të shkonte në vende të panjohura, që t’u fliste të tjerëve për Jehovain. As e kishte idenë se ku do ta dërgonin dhe nëse do të kishte mundësi të kthehej një ditë. Misionarët e Galadit si Meri ndihmuan që të hidhej themeli për rritjen e veprës së predikimit në mbarë globin.»—Isaia 6:8.