Në vitin 2019, në degën e Tajlandës nisi një projekt ndërtimi dhe rinovimi ku ndihmuan vullnetarë vendës dhe të huaj. Mirëpo, kur filloi pandemia COVID-19, të gjithë, përveç 8 vetave nga 50 vullnetarët ndërkombëtarë të ndërtimit në këtë projekt, u kthyen në vendet e tyre. Kur kufizimet u lehtësuan, rifilloi puna. U ftuan edhe vullnetarë të tjerë vendës që të stërviteshin dhe të jepnin një dorë për të mbaruar projektin. Faza përfundimtare e punës u mbyll më 30 prill 2023.

Ndër vullnetarët vendës që ndihmuan ishte vëllai Setasat Tauansirikul dhe gruaja e tij, Uarapurna. Në fillim, ata ndiheshin në siklet që nuk kishin mjaft eksperiencë. Mirëpo Setasati thotë: «Kur shkuam atje, morëm një stërvitje fantastike.»

Gëzimi dhe kënaqësia e thellë që provuan shumë vullnetarë vendës duke punuar në këtë projekt, i nxiti të viheshin në dispozicion edhe për forma të tjera të shërbimit në kohë të plotë. Tani disa prej tyre po ndihmojnë në projekte ndërtimi anekënd territorit të degës së Tajlandës. Një motër po ndjek Shkollën për Ungjillëzuesit e Mbretërisë. Kurse të tjerë po shërbejnë në Bethel. Një nga këta anëtarë të rinj të familjes Bethel, vëllai Rapepat Uoradetsakul, sjell ndër mend: «Fakti që provova ndihmën e Jehovait gjatë projektit të ndërtimit, më dha sigurinë që më nevojitej për të pranuar ftesën që të shërbeja në Bethel. Jam i bindur se Jehovai do të më ndihmojë edhe në këtë caktim të ri.»

Projekti i ndërtimit dhe i rinovimit në degën e Tajlandës përfshinte rinovimin e godinave të banimit dhe të zyrave, ndërtimin e një godine të re për mirëmbajtjen e magazinimin, si dhe ndërtimin e një vendparkimi të ri. Përveç kësaj, u blenë dhe u rinovuan gjashtë apartamente afër zyrës së degës për të siguruar ambiente të tjera strehimi për anëtarët e familjes Bethel.

Jemi të lumtur që vëllezërit e motrat në Tajlandë janë ofruar vullnetarisht në shërbim të Jehovait dhe kanë provuar sa të vërteta janë fjalët e Psalmit 34:8: «Provoni dhe shijoni sa i mirë është Jehovai!»