Më 12 nëntor 2019 një gjykatë në Turkmenistan dënoi me tri vite burg vëlla Serdar Dovletovin, 26 vjeç. Ai është një nga 10 vëllezërit që u burgosën atje ngaqë refuzuan ushtrinë për shkak të ndërgjegjes. Shtatë u dënuan më 2019 dhe tre më 2018. Periudhat e tyre të burgimit variojnë nga një në katër vjet.

Vëlla Dovletovi është nga qyteti i Bajramalit, Rajoni i Marisë, në juglindje të Turkmenistanit. Edhe bashkëshortja e tij, Surja, edhe e ëma, Sonja, janë Dëshmitare të Jehovait.

Gjyqi i tij filloi më 11 nëntor 2019. Vëlla Dovletovi i tha gjykatës se nuk pranonte të kryente ushtrinë për shkak të ndërgjegjes bazuar në bindjet e tij fetare. Përveç kësaj, edhe tre mjekë dëshmuan nën betim se ai vuan nga ulcera kronike e duodenit dhe kjo e përjashton nga shërbimi ushtarak.

Pavarësisht nga faktet që u paraqitën, gjykata e shpalli fajtor me akuzën që «mashtroi» për të shmangur rekrutimin dhe e la në një burg aty afër. Pritet që së shpejti ta transferojnë në kampin famëkeq të punës në Sejdi, në shkretëtirën e Rajonit të Lebapit, ku janë edhe nëntë vëllezërit e tjerë. Vëlla Dovletovi do ta apelojë vendimin.

Ndërsa vëllezërit në Turkmenistan përballen vazhdimisht me padrejtësi, lutemi për ta plot besim te premtimi i Jehovait që do t’i mbështetë teksa tregojnë guxim e besnikëri.—Psalmi 37:18, 24.