«Sa herë i lutesha Jehovait, më ndihmonte të isha i qetë»,—këto janë fjalët e vëlla Selim Taganovit pasi u lirua nga burgu më 3 tetor 2020. Selimi, që është vetëm 19 vjeç, bëri një vit burg ngaqë nuk pranoi të kryente shërbimin ushtarak për shkak të ndërgjegjes.

Selimi ka lindur në Ashgabat, kryeqyteti i Turkmenistanit. Që në moshë të vogël ka qenë nxënës i mirë dhe e donte muzikën. Ai shkruan këngë, këndon dhe i bie kitarës. Prindërit e tij, dy vëllezërit dhe miqtë e përshkruajnë Selimin si një djalë të mirë, të sjellshëm dhe të lumtur. Para se ta dënonin, avokati që i caktoi gjykata, tha për Selimin: «Është një djalë i mirë dhe i ndershëm që nuk pi duhan, nuk abuzon me alkoolin dhe sapo ka mbaruar shkollën e mesme. Dënimi me burg thjesht do t’i shkatërronte jetën.»

Sigurisht që jeta në burg ishte e vështirë. Megjithatë, Selimi shpjegon: «Gjatë kohës që kalova në burg, miqësia ime me Jehovain u bë më e fortë. Sillja ndër mend të vërtetat e Biblës që kisha mësuar në shtëpi dhe nisa t’i kuptoja më plotësisht. Veç kësaj, shkrime si Isaia 41:10, 11 më jepnin shumë zemër.

Kur ndodhesha në një Qendër Paraburgimi të Përkohshme duke pritur dënimin, e pata të vështirë sepse nuk kisha me kë të flisja dhe kujt t’i shprehja shqetësimet e mia. Gjithsesi i lutesha Jehovait për ndihmë. Pas kësaj, të burgosurit dhe rojat e burgut që në fillim më kundërshtonin dhe më kërcënonin, filluan të më mbështetnin e madje më jepnin zemër. E gjithë kjo më bindi se Jehovai ishte në krahun tim.»

Selimin e inkurajuan edhe motrat e vëllezërit në besim. Ai tregon: «Kur isha në burg, shumë më dërgonin përshëndetje dhe më shkruanin fjalë inkurajuese. Përpiqesha t’i mësoja përmendsh këto fjalë dhe pastaj i përsëritja. Më përtërinin dhe më ngushëllonin jashtë mase.»

Sipas ligjit në Turkmenistan, Selimin mund ta thërrasin sërish ushtar. Nëse kjo ndodh, ai e di se mund ta dënojnë me një periudhë më të gjatë në burg. Megjithatë, ai pohon: «Tani që kam kaluar këtë sprovë me Jehovain, nuk kam më frikë. Mbështetja e Tij më jep guxim e siguri.»

Të gjithë ne presim sprova në të ardhmen. Selimi na jep zemër me këto fjalë: «Të gjithë atyre që do të kalojnë sprova të ngjashme, u them të fiksojnë në mendje Isainë 30:15: ‘Fuqia juaj qëndron në qetësinë dhe në besimin tuaj.’»