Nga data 13 prill deri më 27 prill 2024, Dëshmitarë të Jehovait në gjithë Zimbabven morën pjesë në një fushatë predikimi në gjuhën çitonge (Zimbabve). Shumica e thuajse 300.000 vetave që flasin çitonge (Zimbabve) jetojnë në zona rurale të Rajonit të Bingës, që ndodhet në veriperëndim të Zimbabves. Nuk është e lehtë të flasësh me të gjithë ata që jetojnë në këtë zonë, pasi ka vetëm 300 Dëshmitarë që shërbejnë në 8 kongregacione të gjuhës çitonge (Zimbabve).

Fushata pati rezultate të shkëlqyera. Në një kongregacion, 77 të interesuar ndoqën mbledhjen që në fundjavën e parë të fushatës. Fundjavën tjetër, mbledhjen e ndoqën 126 të interesuar. Në total, u filluan më shumë se 2.000 studime të Biblës.

Në një rast, vëllezërit po i afroheshin një shtëpie dhe i përshëndeti një grua me fëmijët e saj. Lajmëtarët e pyetën nëse mund të flitnin me kreun e shtëpisë. Kur bashkëshorti i gruas erdhi, u prezantua si kreu i fshatit. Iu bë shumë qejfi që vëllezërit e kishin respektuar duke kërkuar të flitnin në fillim me të, prandaj u tregoi kopjen e tij të Biblës në çitonge (Zimbabve). Pastaj vëllezërit i treguan si bëhet një studim i Biblës dhe u organizuan ta vazhdonin. Burri u dha leje që të predikonin edhe në shtëpitë e tjera që ishin nën mbikëqyrjen e tij.

Dy vëllezër që po predikonin në një qytezë, takuan një burrë që u tha se ishte Dëshmitar i Jehovait. Ai shpjegoi se Dëshmitarët kishin folur me babanë e tij në vitin 1993. Babai i tij kishte nisur të studionte Biblën, por i kishte humbur kontaktet me Dëshmitarët pasi familja e tij ishte shpërngulur disa herë. Ditën tjetër, nga dëshira për ta takuar babanë e burrit, vëllezërit ecën një orë e gjysmë në këmbë deri te shtëpia e familjes. Babai ishte shumë i emocionuar dhe u tha se, bashkë me gruan, ishte lutur pak çaste më parë që Dëshmitarët të shkonin e t’i takonin. Gjithë familja filloi të studionte Biblën dhe mori pjesë në mbledhjen e mesjavës. Gjithashtu kishin marrë me vete edhe një komshi.

Një motër që quhet Alisia takoi një grua të moshuar që e pranoi menjëherë ftesën për të ndjekur një mbledhje kongregacioni. Kur Alisia shkoi për ta marrë, gruaja po e priste dhe kishte ftuar edhe një shoqen e saj. Pas mbledhjes, gruaja e moshuar tha: «S’ka pikë dyshimi që Perëndia është me ju. Nga dashuria dhe mikpritja e ngrohtë që më treguan, dua të vij prapë.»

Edhe ne jemi të kënaqur për rezultatet e bukura të kësaj fushate. Kjo na kujton se përpjekjet ‘për të mbjellë farën’ me zell në çdo cep të tokës, do të kenë sukses.—Eklisiastiu 11:6.