Lexo çfarë i ndodhi Kerinës dhe imagjino sikur je ti në vend të saj. Çfarë do të bëje?

 Kerina: «Po i jepja shumë shpejt makinës kur po shkoja në shkollë dhe një polic më ndaloi e më vuri gjobë. U mërzita jashtë mase. I thashë mamit, dhe ajo më sugjeroi se duhej t’i tregoja babit, por unë nuk doja.»

Çfarë do të bëje ti?

1.  Mundësia A: Të mos i tregosh gjë babit, me shpresën se nuk do ta marrë vesh kurrë.

2.  Mundësia B: T’i tregosh babit gjithë të vërtetën.

 Ndoshta mundësia A është disi tunduese për ty. Në fund të fundit, mami do të mendojë që shkove te babi dhe ia the. Por ia vlen t’i tregosh gabimet e tua, pavarësisht nëse ke marrë gjobë apo ke bërë diçka tjetër.

1.  1. Sepse është e drejtë. Duke folur për standardet e të krishterëve, Bibla thotë: «Duam të sillemi me ndershmëri në çdo gjë.»​—Hebrenjve 13:18.

    «Jam përpjekur shumë të jem e sinqertë, të mbaj përgjegjësi për veprimet e mia dhe t’u dal për zot gabimeve sapo i bëj.»​—Aleksa.

2.  2. Sepse njerëzit i falin më kollaj ata që i pranojnë gabimet. Bibla thotë: «Kush i mbulon shkeljet, nuk do t’ia dalë mbanë, por atij që i rrëfen dhe i lë ato, do t’i tregohet mëshirë.»​—Proverbat 28:13.

    «Duhet guxim për ta pranuar gabimin, por kështu fiton besimin e të tjerëve. Ata kuptojnë se je i sinqertë. Kur e pranon gabimin, e kthen diçka të keqe në diçka të mirë.»​—Riçardi.

3.  3. Sepse, ç’është më e rëndësishmja, i gëzon zemrën Perëndisë Jehova. Bibla thotë: «Njeriu hileqar është i pështirë për Jehovain, ndërsa të drejtët gëzojnë miqësi të ngushtë me Të.»​—Proverbat 3:32.

    «Pasi bëra një gabim të rëndë, fillova ta kuptoja se duhej të dilja hapur dhe ta pranoja. S’kishte si të më bekonte Jehovai nëse nuk i bëja gjërat siç kërkonte ai.»​—Rakela.

 Atëherë, si veproi Kerina pas gabimit të saj? U përpoq t’ia fshihte babit gjobën që mori. Por nuk mund ta fshihte përgjithmonë. «Rreth një vit më vonë,—thotë ajo,—babi po shihte dokumentet e siguracionit dhe vuri re një gjobë për shkak shpejtësie në emrin tim. I hapa shumë telashe vetes. Edhe mami u inatos që nuk kisha bërë siç më kishte thënë.»

 Mësimi që nxori: Kerina thotë: «Kur nuk i tregon gabimet, vetëm sa i keqëson gjërat. Gjithsesi, do të paguash më vonë.»

 Të gjithë bëjmë gabime. (Romakëve 3:23; 1 Gjonit 1:8) Por është shenjë përulësie dhe pjekurie t’i pranosh, madje menjëherë.

 Hapi tjetër është të mësosh nga gabimet që bën. Mjerisht, disa të rinj e humbasin këtë mundësi. Ndoshta ndihen siç tha njëherë një adoleshente me emrin Prishila: «Shkurajohesha shumë nga gabimet e mia. Kisha vlerësim të ulët për veten, prandaj gabimet që bëja, më dukeshin një barrë gjigante që nuk mund ta mbaja. Ndihesha përtokë dhe më dukej vetja rast i pashpresë.»

 A ndihesh edhe ti kështu ndonjëherë? Nëse po, mos harro: ta mbash mendjen te gabimet e së shkuarës është si t’i mbash sytë te pasqyra ndërkohë që i jep makinës. Kjo vetëm të bën të ndihesh i pavlerë dhe të shter fuqitë për të përballuar vështirësitë që do të të dalin.

 Në vend të kësaj, pse nuk përpiqesh të kesh një pikëpamje më të ekuilibruar?

 «Kujtoji gabimet e së shkuarës dhe mëso prej tyre që të mos i përsëritësh. Por mos e mbaj mendjen aty aq sa të rrëzohesh.»​—Elioti.

 «Përpiqem t’i konsideroj gabimet si përvoja që më mësojnë, duke nxjerrë nga secili prej tyre një mësim që do të më bëjë njeri më të mirë dhe herën tjetër ta përballoj ndryshe situatën. Sidoqoftë, ky është një qëndrim më i mirë sepse të rrit.»​—Vera.