Katastrofat natyrore që ndodhin sot nuk i shkakton Perëndia; përkundrazi, ai merakoset për njerëzit që preken prej tyre. Mbretëria e Perëndisë do t’i japë fund çdo gjëje që shkakton vuajtje, edhe katastrofave natyrore. Ndërkohë, ai i ngushëllon njerëzit që preken nga katastrofat.—2 Korintasve 1:3.

•  Pse jemi të sigurt se katastrofat natyrore nuk janë ndëshkim nga Zoti?

•  A janë katastrofat natyrore shenjë e ditëve të fundit?

•  Si i ndihmon Perëndia të prekurit nga katastrofat?

•  A ndihmojnë parimet e Biblës të përgatitemi për katastrofat natyrore?

•  Vargje ngushëlluese nga Bibla

 Katastrofat natyrore ndryshojnë nga gjykimet që ka dhënë Perëndia me anë të forcave të natyrës, që tregohen në Bibël.

•   Katastrofat natyrore vrasin e lëndojnë pa dallim. Ndërsa gjykimet e Perëndisë për të cilat flet Fjala e Perëndisë, ishin përzgjedhëse. Për shembull, kur Zoti shkatërroi qytetet e lashta të Sodomës dhe të Gomorrës, u sigurua që Loti i drejtë dhe dy vajzat e tij të mbijetonin. (Zanafilla 19:29, 30) Jehovai u lexoi zemrat njerëzve dhe shkatërroi vetëm ata që i konsideroi të ligj.—Zanafilla 18:23-32; 1 Samuelit 16:7.

•   Kur ndodhin katastrofa natyrore, zakonisht marrim pak ose aspak paralajmërim. Kurse Perëndia i paralajmëronte të ligjtë para se të përdorte forcat e natyrës kundër tyre. Ata që ia vinin veshin mund të shpëtonin.—Zanafilla 7:1-5; Mateu 24:38, 39.

•   Në njëfarë mase, njerëzit janë përgjegjës për katastrofat. Në ç’kuptim? Ata kanë dëmtuar mjedisin dhe kanë ndërtuar në zona që preken nga tërmetet, përmbytjet dhe moti ekstrem. (Zbulesa 11:18) Nuk e ka fajin Zoti që njerëzit bëjnë zgjedhje të gabuara.—Proverbat 19:3.

 Po, profecitë e Biblës thonë se do të kishte katastrofa gjatë «përfundimit të sistemit» ose «në ditët e fundit». (Mateu 24:3; 2 Timoteut 3:1) Për shembull, për kohët tona Jezui tha: «Do të ketë mungesë ushqimi dhe tërmete nga njëri vend në tjetrin.» (Mateu 24:7) Së shpejti, Perëndia do ta pastrojë tokën nga çdo gjë që shkakton dhimbje e vuajtje, përfshirë katastrofat natyrore.—Zbulesa 21:3, 4.

•   Perëndia i ngushëllon me Fjalën e tij, Biblën. Ajo na siguron se Zoti interesohet për ne dhe e ndien dhimbjen tonë. (Isaia 63:9; 1 Pjetrit 5:6, 7) Gjithashtu, Bibla zbulon premtimin e tij se do të vijë një kohë pa katastrofa natyrore.—Shih « Vargje ngushëlluese nga Bibla».

•   Perëndia i ndihmon të prekurit me anë të shërbëtorëve të tij. Ai i nxit shërbëtorët e tij në tokë që të imitojnë shembullin e Jezuit. Në Bibël ishte parathënë se Jezui do të ngushëllonte ‘zemërvrarët’ dhe «ata që mbajnë zi». (Isaia 61:1, 2) Shërbëtorët e Perëndisë përpiqen të veprojnë njësoj.—Gjoni 13:15.

   Nëpërmjet tyre, Perëndia u jep edhe ndihmë praktike të prekurve nga katastrofat.—Veprat 11:28-30; Galatasve 6:10.

 Po. Edhe pse Bibla nuk është një manual që tregon si të përgatitemi për katastrofat natyrore, përmban parime që ndihmojnë. Për shembull:

•   Planifiko që më përpara. Bibla thotë: «Mendjehollë është ai që e sheh të keqen dhe fshihet.» (Proverbat 22:3) Tregohemi të mençur nëse bëjmë gati që më përpara një plan emergjence. Ky plan mund të përfshijë përgatitjen e një çante me gjërat e nevojshme, caktimin e një vendtakimi në rast katastrofe, si dhe praktikimin e planit si familje.

•   Vlerëso jetën më shumë se zotërimet. Në Shkrimet e Shenjta thuhet: «Asgjë nuk kemi sjellë në botë, e asgjë nuk mund të marrim prej saj.» (1 Timoteut 6:7, 8) Duhet të jemi gati të lëmë shtëpinë dhe zotërimet tona që t’i shpëtojmë katastrofës. Bëjmë mirë të mos harrojmë se jeta vlen më shumë se çdo e mirë materiale.—Mateu 6:25.