Ligji i përtërirë 13:1-18
-
Çfarë duhet bërë me apostatët (1-18)
13 Në rast se mes jush del një profet ose një njeri që parathotë të ardhmen me anë të një ëndrre, shenje ose parashikimi,
2 e pastaj shenja ose parashikimi për të cilin foli, del i vërtetë e ndërkohë ai thotë: ‘Le të shkojmë pas perëndive të tjera, perëndive që nuk i njihni, dhe t’u shërbejmë’,
3 mos i dëgjoni fjalët e atij profeti ose njeriu që parathotë të ardhmen me anë të ëndrrave,+ sepse Jehovai, Perëndia juaj, po ju vë në provë+ për të parë nëse e doni Jehovain, Perëndinë tuaj, me gjithë zemër e me gjithë shpirt.*+
4 Ju duhet të shkoni pas Jehovait, Perëndisë tuaj, atë duhet të nderoni thellësisht,* urdhërimet e tij duhet të zbatoni, zërin e tij duhet të dëgjoni, atij duhet t’i shërbeni dhe me të duhet të lidheni ngushtë.+
5 Por ai profet ose njeri që parathotë të ardhmen me anë të ëndrrave duhet të vritet,+ sepse ju nxiti të rebeloheshit kundër Jehovait, Perëndisë tuaj, që ju nxori nga Egjipti dhe ju shpengoi* nga shtëpia e skllavërisë. Ai njeri u përpoq t’ju largonte nga udha që Jehovai, Perëndia juaj, ju ka urdhëruar të ecni. Ndaj hiqeni ligësinë nga mesi juaj.+
6 Nëse yt vëlla, biri i nënës sate, biri ose bija jote, gruaja jote e shtrenjtë ose shoku më i ngushtë,* kërkon në fshehtësi të të prishë mendjen e të thotë: ‘Le të shkojmë t’u shërbejmë perëndive të tjera’,+ që nuk i ke njohur as ti, as paraardhësit e tu,
7 ndonjë perëndie të popujve rreth e qark, afër ose larg, nga njëri skaj i vendit në tjetrin,
8 mos u dorëzo para tij dhe mos e dëgjo,+ të mos të vijë keq, të mos të dhimbset dhe as mos e mbro.
9 Përkundrazi, duhet ta vrasësh patjetër;+ e para do ta godasë dora jote për ta vrarë dhe më pas dora e tërë popullit.+
10 Godite me gurë derisa të vdesë,+ sepse u përpoq të të largonte nga Jehovai, Perëndia yt, që të nxori nga Egjipti, nga shtëpia e skllavërisë.
11 Kështu, tërë Izraeli do ta marrë vesh, do të frikësohet dhe nuk do të bëjë më kurrë asnjë të keqe si kjo mes jush.+
12 Në rast se në një nga qytetet që po të jep në zotërim Jehovai, Perëndia yt, merr vesh se thuhet:
13 ‘Njerëz pa pikë vlere dolën nga mesi juaj që të largonin banorët e qytetit të tyre duke ju ftuar që të shkoni e t’u shërbeni perëndive të tjera, perëndive që nuk i njihni,’
14 ti shqyrtoje mirë këtë çështje, heto e bëj pyetje të hollësishme+ dhe, nëse vërtetohet se kjo gjë e neveritshme është bërë mes jush,
15 vriti me shpatë banorët e atij qyteti.+ Shfarose*+ qytetin dhe gjithçka në të, si edhe bagëtinë.
16 Pastaj mblidhe gjithë plaçkën e tij në mes të sheshit dhe vëri zjarrin qytetit; tërë plaçka e tij do të shërbejë si një blatim i plotë për Jehovain, Perëndinë tënd. Qyteti do të jetë përgjithmonë një grumbull gërmadhash dhe nuk do të rindërtohet më kurrë.
17 Mos prek asgjë nga ato që janë ndarë veç për shkatërrim,*+ që Jehovait t’i largohet zemërimi i zjarrtë e të tregohet i mëshirshëm e i dhembshur me ty dhe të të shumojë, siç iu betua paraardhësve të tu.+
18 Bindju Jehovait,* Perëndisë tënd, zbato gjithë urdhërimet e tij që po të jap sot, e kështu do të bësh atë që është e drejtë në sytë e Jehovait, Perëndisë tënd.+
Shënimet
^ Shih Fjalorthin.
^ Fjalë për fjalë «atij duhet t’i frikësoheni». Shih Fjalorthin.
^ Shih Fjalorthin, «Shpërblesa; Shpengimi».
^ Ose «shoku që ti e do si shpirtin tënd».
^ Ose «Caktoje për shfarosje». Shih Fjalorthin.
^ Ose «që janë ndarë veç si gjëra të ndaluara».
^ Fjalë për fjalë «Dëgjoje zërin e Jehovait».
