Rutha 3:1-18
3 Pastaj Naomi, e vjehrra, i tha: «Bija ime, më duhet të kërkoj një shtëpi* për ty,+ që të të shkojë mbarë.
2 Boazi që të lejoi të rrije me shërbëtoret e tij, është i afërmi ynë.+ Sonte ai është në lëmë* dhe po pastron elbin.
3 Prandaj lahu, lyhu me vaj aromatik, pastaj vish rrobat më të mira dhe zbrit në lëmë. Mos i bjer në sy derisa të ketë mbaruar së ngrëni e së piri.
4 Kur të shkojë për të fjetur, shiko ku do të shtrihet; pastaj shko, zbuloja këmbët e shtrihu edhe ti. Ai do të të tregojë ç’duhet të bësh.»
5 Atëherë Rutha i tha: «Do të bëj gjithë sa më the.»
6 Kështu zbriti në lëmë dhe bëri siç i kishte thënë e vjehrra.
7 Ndërkohë Boazi hëngri e piu dhe me zemër të gëzuar shkoi të shtrihej në fund të grumbullit të drithit. Pas kësaj, ajo vajti qetë-qetë, ia zbuloi këmbët dhe u shtri.
8 Në mesnatë ai u zgjua dhe dridhej i tëri, u përkul pak përpara dhe pa që në këmbët e tij ishte shtrirë një grua.
9 Boazi e pyeti: «Kush je ti?» Ajo u përgjigj: «Jam Rutha, shërbëtorja jote. Shtrije rrobën* mbi shërbëtoren tënde, sepse je riblerës.»+
10 Ai tha: «Jehovai të bekoftë, bija ime! Këtë herë ke treguar më shumë dashuri besnike se herën e parë,+ sepse nuk shkove pas të rinjve, të varfër a të pasur qofshin.
11 Prandaj mos ki frikë, bija ime. Unë do të bëj për ty gjithçka që të thuash,+ sepse të gjithë në qytet* e dinë mirë se je një grua e shkëlqyer.
12 Është e vërtetë që jam riblerës,+ por ka një riblerës tjetër që është më i afërt se unë.+
13 Qëndro këtu sonte dhe, nëse në mëngjes do të të riblejë ai, mirë, le të të riblejë.+ E nëse ai nuk do që të të riblejë, atëherë, siç është e vërtetë që Jehovai rron, kam për të të riblerë unë. Rri shtrirë këtu deri në mëngjes.»
14 Kështu ajo u shtri te këmbët e tij deri në mëngjes dhe u ngrit pa zbardhur mirë, kur askush nuk dallohej dot. Pastaj Boazi tha: «Të mos merret vesh se në lëmë erdhi një grua.»
15 Gjithashtu i tha: «Sille mantelin që ke veshur dhe mbaje hapur.» Kështu ajo e mbajti hapur dhe ai hodhi gjashtë masa* elb, ia ngarkoi, pastaj ai hyri në qytet.
16 Rutha shkoi tek e vjehrra që e pyeti: «Si vajti,* bija ime?» Ajo i tregoi çdo gjë që kishte bërë ai njeri për të.
17 Pastaj shtoi: «Këto gjashtë masa elbi m’i dha ai e më tha: ‘Mos shko duarbosh te vjehrra.’»
18 Atëherë Naomi tha: «Rri këtu, bija ime, sa ta marrësh vesh si do të vejë kjo punë, sepse atë njeri nuk do ta zërë vendi pa e zgjidhur çështjen sot.»
Shënimet
^ Fjalë për fjalë «një vend prehjeje».
^ Shih Fjalorthin.
^ Ose «cepin e rrobës».
^ Fjalë për fjalë «e gjithë porta e popullit tim».
^ Ka mundësi gjashtë sea, ose rreth 44 l (rreth 20 kg). Shih Shtojcën B14.
^ Fjalë për fjalë «Kush je ti».
