Mbretëria e Perëndisë është një qeveri qiellore. Ajo do të zëvendësojë gjithë qeveritë e tjera dhe me anë të saj do të bëhet vullneti i Perëndisë në qiell dhe në tokë. Lajmi për Mbretërinë e Perëndisë është një lajm i mirë. Së shpejti kjo Mbretëri do të plotësojë nevojën e njerëzve për një qeveri të mirë. Ajo do të bashkojë gjithë njerëzit kudo në tokë.​—Lexo Danielin 2:44; Mateun 6:9, 10; 24:14.

Një mbretëri duhet të ketë një mbret. Jehovai ka caktuar Mbret të Mbretërisë së Tij Birin e vet, Jezu Krishtin.​—Lexo Zbulesën 11:15.

Biri i Perëndisë është Mbreti ideal sepse është dashamirës dhe i palëkundur për drejtësinë. (Gjoni 1:14) Gjithashtu, ai është mjaft i fuqishëm për të ndihmuar njerëzit, sepse do të sundojë mbi tokë nga qielli. Pasi u ringjall, ai u ngjit në qiell dhe u ul të priste në të djathtë të Jehovait. (Hebrenjve 10:12, 13) Me kohë, Perëndia i dha pushtet që të niste të sundonte.​—Lexo Danielin 7:13, 14.

Një grup i quajtur «të shenjtët» do të sundojë me Jezuin në qiell. (Danieli 7:27) Të shenjtët e parë që u zgjodhën, ishin apostujt e tij besnikë. Jehovai ka vazhduar të zgjedhë deri më sot burra e gra besnike si të shenjtët e tij. Njësoj si Jezui, ata ringjallen me trup frymor.​—Lexo Gjonin 14:1-3; 1 Korintasve 15:42-44.

Sa njerëz shkojnë në qiell? Jezui i quajti «kope e vogël». (Luka 12:32) Në fund, numri i tyre do të jetë 144.000 dhe do të sundojnë me Jezuin mbi tokë.​—Lexo Zbulesën 14:1.

Mbretëria e Perëndisë nisi të sundonte më 1914. * Veprimi i parë i Jezuit si Mbret ishte flakja e Satanait dhe e demonëve në tokë. Satanai u tërbua dhe filloi të shkaktonte telashe në mbarë botën. (Zbulesa 12:7-10, 12) Qysh atëherë, hallet e njerëzimit janë shtuar tmerrësisht. Luftërat, zia e bukës, epidemitë dhe tërmetet janë të gjitha pjesë e një ‘shenje’ që tregon se Mbretëria së shpejti do të marrë plotësisht në dorë çështjet e tokës.​—Lexo Lukën 21:7, 10, 11, 31.

Me anë të një vepre globale predikimi, që sot Mbretëria e Perëndisë po bashkon një shumicë të madhe nga të gjitha kombet. Miliona njerëz zemërbutë po bëhen nënshtetas të Jezuit. Mbretëria e Perëndisë do t’i mbrojë kur të shkatërrojë sistemin e sotëm të lig në tokë. Prandaj, kushdo që dëshiron të nxjerrë dobi nga Mbretëria e Perëndisë, duhet të mësojë të jetë nënshtetas i bindur i Mbretit Jezuit.​—Lexo Zbulesën 7:9, 14, 16, 17.

Gjatë një periudhe 1.000-vjeçare, Mbretëria do të realizojë qëllimin fillestar të Perëndisë për njerëzimin. Toka do të bëhet një parajsë globale. Në fund, Jezui do t’ia dorëzojë Mbretërinë Atit të tij. (1 Korintasve 15:24-26) A të vjen ndër mend dikush që të pëlqen t’i tregosh për Mbretërinë e Perëndisë?​—Lexo Psalmin 37:10, 11, 29.