SÖWAN 40 jaa a fesi, sëmbë di bi ta öndösuku Bëibel bi bai basia taa gaangaan soni o pasa a di jaa 1914. Andi da dee soni di bi pasa, nöö andi ta lei taa di jaa 1914 dë sö wan apaiti jaa?

Kumafa Lukasi 21:24 ta söi, Jesosi bi taki taa: "Dee döösë sëmbë o ko tei Jelusalen ko u de nöö de o ta du ku ën kumafa de kë, fu tee dou di ten Masa Gadu bi buta da de pasa.” Jelusalen bi dë di mama u dee foto u dee Dju. Naandë dee könu dee bi dë bakamii u Könu Dafiti bi ta tii di köndë (Psalöm 48:1, 2). Ma dee könu aki bi tooka u dee hedima u dee woto köndë. Dee könu dë bi sindo "a di könubangi u Jehovah”, hën da de bi ta tei kamian da Gadu a goonliba aki (1 Kloniki 29:23). Sö wë Jelusalen bi dë wan maaka u di tii u Jehovah a goonliba aki.

Ma unfa soni waka taa ’dee döösë sëmbë tei Jelusalen ko u de nöö de du ku ën kumafa de kë’? Na un ten di soni dë pasa? Di soni dë pasa a di jaa 607 bifö Keesitu, di dee Babilon sëmbë bi tei Jelusalen ko u de. Na wan könu bi sindo a di "könubangi u Jehovah” möön, nöö di tii dee könu di bi dë bakamii u Dafiti bi ta tii, bi ko a wan kaba (2 Könu 25:1-26). Dee döösë sëmbë bi o ta du ku Jelusalen u nöömö u? Nönö, biga luku andi di tjabukama Ezekiëli bi taki u Sedekia, di lasiti könu u Jelusalen. A bi taa: "Puu di koosu ku di könu kaapusa a i hedi… . Na wan sëmbë o feni ën, u tee di sëmbë di a abi di leti u kisi ën dou. Nöö mi o dëën di tii” (Ezekiëli 21:26, 27). Di sëmbë di bi abi "di leti u kisi” di könu kaapusa u tii kuma bakamii u Dafiti, da Keesitu Jesosi (Lukasi 1:32, 33). Hën da te Jesosi bi o toon Könu, nöö dee döösë sëmbë an bi o du ku Jelusalen möön.

Un ten di gaan soni dë bi o pasa? Jesosi bi lei taa dee döösë sëmbë bi o tii u wan pisiten nöö. Di u 4 kapitel u di buku Daniëli ta heepi u fuu ko sabi un longi di pisiten dë bi o tei. A di woto dë Könu Nebukatnesali u Babilon bi sunjan u soni di bi o pasa. A di sunjan a bi si wan gaan gindi pau di de bi faa tuwë. Di tompi u di pau an bi sa göö möön, biga de bi tai ën ku wan felu banti ku söseei wan köpö banti. Di engel bi taki taa: "Be a tan sö u te seibi ten pasa.”—Daniëli 4:10-16.

So toon di Bëibel ta tei libisëmbë tii maaka ku pau (Ezekiëli 17:22-24; 31:2-5). Hën da di koti di de koti di pau tuwë, ta söi fa wan kaba bi o ko a di tii u dee könu a Jelusalen di bi ta tei kamian da Gadu. Ma di sunjan ta söi tu taa di soni di bi o pasa ku Jelusalen bi o dë u wan pisiten nöö. A bi o dë "seibi ten”. Un longi di pisiten dë tei?

Akoalimbo 12:6, 14 ta söi taa dii ku hafu jaa (dii ku hafu ten, NW) da "wan-dusu-ku-tu-höndö-ku-sikisiteni daka longi”. Hën da "seibi ten” da tu pasi möön longi, nasö 2520 daka. Ma dee döösë sëmbë bi ta du ku Jelusalen jeti baka di de tei ën ko u de. Di dee 2520 daka bi pasa, tökuseei de an bi kaba u du ku Jelusalen ka di tii u Gadu bi dë. Hën da di seibi ten a di buku Daniëli bi o dë möön longi. Te u luku a Nöbu 14:34 ku Ezekiëli 4:6, nöö dee tëkisi dë ta taki u "wan daka kuma wan jaa”. Hën da dee "seibi ten” bi o dë 2520 jaa.

Dee 2520 jaa bigi a tinimu-liba u di jaa 607 bifö Keesitu, di dee Babilon sëmbë bi tei Jelusalen ko u de, nöö de bi puu di könu di bi dë bakamii u Dafiti a di könubangi fëën. Nöö dee 2520 jaa dë kaba a tinimu-liba a di jaa 1914. A di ten dë di juu ’di Gadu bi buta’ da de döösë sëmbë bi pasa, nöö Jesosi Keesitu bi toon di Könu di Gadu bi buta a hemel.*—Psalöm 2:1-6; Daniëli 7:13, 14.

Leti kumafa Jesosi bi taki a fesi, gaangaan soni bi o pasa te a bi toon Könu a hemel. Wan tu u dee soni dë da gaan feti, gaan hangi, di seki goonliba bi o ta seki ta latja kamian ku söseei taku siki (Mateosi 24:3-8; Lukasi 21:11). Dee soni dë da gaan maaka di ta söi taa di Könuköndë u Gadu bigi tii a di jaa 1914, ku söseei taa "dee lasiti daka” u di goonliba aki bigi a di jaa dë.—2 Timoteo 3:1-5.

*  A bigi u tinimu-liba u di jaa 607 bifö Keesitu, te go dou tinimu-liba u di jaa 1 bifö Keesitu, u ta konda 606 jaa. Un jaa u ta kisi baka di jaa 1 bifö Keesitu? Di jaa 0 bifö Keesitu ö? Nönö, u ta kisi di jaa 1. Hën da a bigi u tinimu-liba u di jaa 1 bifö Keesitu, te go dou tinimu-liba u di jaa 1914, u ta konda 1914 jaa. Te u konda dee 606 jaa mökisi ku dee 1914 jaa, u ta kai a 2520 jaa.

"SEIBI TEN”

2520 jaa
606 jaa ku 3 liba tinimu-liba u di jaa 607 Bi.K. te dou 31 u tuwalufumu-liba u di jaa 1 Bi.K.		1913 jaa ku 9 liba 1 u jai-liba u di jaa 1 te dou tinimu-liba u di jaa 1914
607 "Dee döösë sëmbë o ko tei Jelusalen ko u de nöö de o ta du ku ën kumafa de kë”	←Bi.K.	Ba.K.→	1914 "Di sëmbë di a abi di leti u kisi ën dou”

← Luku di kapitel