DI BËIBEL an ta konda da u na un ten de pai Jesosi. Ma a ta taki soni di ta mbei u sabi gbelin taa na a tuwalufumu-liba de bi pai ën.

Buta mëni a di fasi fa di wei bi dë a di pisiten dë u di jaa a Betelehem ka de bi pai Jesosi. Di liba u dee Dju de kai Kislev (hën da ëlufumu-liba/tuwalufumu-liba) bi dë wan liba ka kamian ta kötö, nöö a bi dë tjuba ten tu. Di liba di bi ta ko nëën baka bi dë di liba de bi ta kai Tebet (tuwalufumu-liba/jai-liba). Hën bi dë di möön kötö liba u di jaa, nöö so juu ëisi bi ta kai a dee kuun. Boo luku andi di Bëibel ta taki u di fasi fa di wei bi dë a di pisiwata dë.

Di Bëibel sikifima de kai Ësala ta söi taa di liba Kislev bi dë wan kötö liba tuutuu, nöö tjuba bi lo’ u kai. Baka di Ësala taki taa hia sëmbë bi ko makandi a Jelusalen "a di u tuwenti daka u di u nëigi liba [Kislev]”, a taki taa dee sëmbë bi ta "tëëmë seei…u di tjuba bi ta kai”. Luku andi dee sëmbë dee bi ko makandi bi taki u di fasi fa di wei bi dë a di pisiten u di jaa dë. De bi taki taa: "Tjuba juu nöunöu, wa sa taanpu a döösë” (Ësala 10:9, 13; Jelemia 36:22). Aan misi taa dee kiijama u sikapu dee bi ta libi a di pisiwata u Betelehem bi ta luku bunu taa de ku dee sikapu u de an bi ta dë ndeti a döösë möön te tuwalufumu-liba bi ta dou!

Di de pai Jesosi, wanlö womi bi dë a sabana ta luku dee sikafu u de a ndeti

Ma di Bëibel ta taki taa di de pai Jesosi, nöö wanlö womi bi dë a sabana ta luku dee sikafu u de a ndeti. Di Bëibel sikifima Lukasi ta söi taa a di pisiten dë wanlö womi bi dë zuntu u Jelusalen a sabana "ta luku sikafu fu soni an musu du de” (Lukasi 2:8-12). Hoi a pakisei taa dee womi bi dë a döösë, na waka de bi ta waka lontu a didia. Dee sikafu u de bi dë a di sabana a ndeti. Wë ee di wei kötö, nöö tjuba ta kai a di tuwalufumu-liba a Betelehem, nöö sëmbë sa dë a döösë ta du dee lö soni dë u? Wë nönö. Dee soni dee bi pasa a di pisiten di de pai Jesosi ta söi taa na a tuwalufumu-liba de pai ën.*

Di Wöutu u Gadu ta taki soifi na un ten Jesosi bi dëdë, ma an ta taki hia soni u di ten di de bi pai ën. Di soni aki ta mbei u pakisei di soni di Könu Salumon bi taki. A bi taki taa: "Wan në möön bunu möön leki wan bunu fatu, nöö di daka di wan sëmbë dëdë bunu möön leki di daka di de pai ën” (Pleikima 7:1). Fëën mbei an ta foondo u taa di Bëibel ta taki sömëni soni u di wooko ku di dëdë u Jesosi, ma an ta taki hia soni u di ten di de pai ën.

*  Ee i kë sabi woto soni möön, nöö luku a di buku Teki leri fu a Bigi Leriman bladsëidë 155, 156. Dee Jehovah Kotoigi de mbei di buku dë.

← Luku di kapitel