SËMBË di ta biibi taa Gadu dë dii sëmbë a wan, ta taki taa di Tata, di Womi Mii ku di Santa Jeje, dë wan sëmbë. Nöö de ta biibi taa de tuu da pei, taa de tuu abi di wan seei makiti ku söseei taa na wan u de abi wan bigi. Hën da dee sëmbë di ta biibi di lei aki, ta taki taa di Tata da Gadu, di Womi Mii da Gadu ku söseei taa di Santa Jeje da Gadu tu, ma tökuseei wan kodo Gadu nöö dë.

Sömëni sëmbë di ta biibi di lei aki, ta piki taa de an kaba fusutan di lei aki u puu ën da sëmbë. Tökuseei de ta mëni taa sonte di Bëibel ta lei di soni aki. Ma Bëibel ta lei taa Gadu dë dii sëmbë a wan u? Wë a na wan kamian u Bëibel u ta lesi di lö soni dë. Ma be u go luku wan tëkisi di sëmbë ta tei u hoi baka da di lei aki. Nöö a o heepi u fuu piki di hakisi dë.

’DI SËMBË DE TA KAI DI WÖUTU U GADU, HËNSEEI WË BI DA GADU’

A sikifi a Johanisi 1:1 taa: "A dë sö taa bifö hii soni u mundu bi seti, nöö di Sëmbë de ta kai di Wöutu u Gadu bi dë gaanduwe kaa. Nöö di Sëmbë dë ku Gadu bi dë makandi. Hën seei wë bi da Gadu e.” A di wan seei pisi dë möön di apösutu Johanisi söi limbolimbo taa ’di Sëmbë de ta kai di Wöutu u Gadu’, da Jesosi (Johanisi 1:14). So sëmbë feni taa a musu u dë sö taa di Womi Mii ku di Tata da di wan seei Gadu, biga di tëkisi taki taa di Sëmbë de kai di Wöutu u Gadu, hënseei wë bi da Gadu.

Na fëëkëtë taa di pisi u Bëibel aki bi sikifi a Giikitöngö fosufosu. Bakaten sëmbë di ta puu soni buta a wan woto töngö, puu di tëkisi aki go a woto töngö. Ma sömëni sëmbë di ta puu Bëibel go a wan woto töngö, an taki taa ’di Sëmbë de ta kai di Wöutu u Gadu, da Gadu’. Faandi mbei de an du sö? U di dee sëmbë aki bi sabi di Giikitöngö, mbei de taki taa de musu puu di pisi aki a wan woto fasi. Unfa de puu ën? Luku wan tu fasi aki: "Di Sëmbë de kai di Wöutu u Gadu, bi dë wan gadu” (The New Testament in an Improved Version). "Di Sëmbë de kai di Wöutu u Gadu, bi dë ku Gadu, nöö a bi dë kuma gadu” (The Translator’s New Testament). Kumafa dee Bëibel aki söi, nöö di Sëmbë de kai di Wöutu u Gadu, na Gadu. Ma u di di Sëmbë dë bi a’ makiti gaanfa möön dee woto soni di Jehovah mbei, mbei Bëibel ta kai ën "wan gadu”. Aki di wöutu "gadu” kë taki "wan sëmbë di abi makiti gaanfa”.

WOTO SONI DI O HEEPI I FII FUSUTAN DI PISI AKI

Gaansë u sëmbë an sabi di Giikitöngö di di Bëibel bi sikifi fosufosu. Nöö unfa i sa ko sabi andi di apösutu Johanisi bi kë taki tuutuu? Luku di woto aki: Boo taa wan mësitë ta lei dee siköö mii fëën wan soni. Ma bakaten na hii dee mii fusutan di soni a di wan seei fasi. Andi dee mii sa du? De sa hakisi di mësitë u konda möön soni da de. Aan misi taa te de ko sabi möön soni, nöö di dë o heepi de u fusutan di soni di mësitë lei de. Wë sö a dë tu taa ee i kë fusutan Johanisi 1:1 möön bunu, nöö i sa suku möön soni a di buku Johanisi fu ko sabi un makiti Jesosi abi. Te i ko sabi möön soni u Jesosi, nöö joo sa taki gbelin andi Bëibel ta lei.

Luku andi Johanisi sikifi go dou a Johanisi 1:18. A sikifi taa: "Dee sëmbë, fa Masa Gadu sai dë, na wan daka seei libisëmbë si ën ku wojo möönsö e.” Ma sëmbë bi si Jesosi, di Womi Mii, ku wojo kaa, biga Johanisi taa: "Di Sëmbë u ta konda soni fëën aki di de ta kai di Wöutu u Gadu dë [Jesosi], a ko wan libisëmbë tuu e, nöö hën a ko libi a u mindi fu wan pisiten. Nöö u seei bi si di waiti fëën di a abi” (Johanisi 1:14). Nöö unfa di Womi Mii sa dë di Makiti Gadu u mundu? Johanisi taki söseei taa di Sëmbë de kai di Wöutu u Gadu, bi dë ’makandi ku Gadu’. Ma unfa wan sëmbë sa dë makandi ku wan wotowan, nöö i taki taa de dë di wan sëmbë? Boiti di dë, Jesosi ta söi gbelin taa hën ku ën Tata a liba tooka, kumafa Johanisi 17:3 ta söi. A ta kai ën Tata "di wan kodo tuutuu Gadu u mundu”. Di kaba u di buku Johanisi ta taki taa: "Ma nöö dee aki, u sikifi de fuun musu biibi taa Masa Jesosi hën da di Keesitu…Hën da di Womi Mii u Masa Gaangadu seei gbelingbelin” (Johanisi 20:31). Mëni taa di tëkisi an kai Jesosi, Gadu, ma a kai ën di Womi Mii u Masa Gaangadu. Dee woto soni aki di u luku a di buku Johanisi, ta lei u unfa u musu fusutan Johanisi 1:1. Jesosi, di Sëmbë de kai di Wöutu u Gadu, da "wan gadu”. Di soni dë kë taki taa a’ makiti gaanfa, ma hën ku di Makiti Gadu u mundu, na di wan seei sëmbë.

MÖÖN SONI DI TA SÖI TAA SÖ A DË TUUTUU

Pakisei di woto u di mësitë ku dee siköö mii baka. Boo taa so u dee mii an kai a di wan futu ku di mësitë, hii fa a konda möön soni da de. Andi de sa du? De sa go a wan woto mësitë u hakisi ën möön soni u di soni di mësitë u de lei de. Ee di woto mësitë konda de seei soni da de, nöö gaansë u dee mii o biibi andi di mësitë u de bi lei de. Sö a dë tu taa ee ja dë seiki u dee soni di di Bëibel sikifima Johanisi taki u Jesosi ku di Makiti Gadu u mundu, nöö i sa go luku andi woto sikifima u Bëibel ta taki u de. Luku andi Mateosi bi taki. A bi konda andi Jesosi bi taki u di kaba u di goonliba aki. Jesosi bi taki taa: "Ma nöö fa mi taki dee soni dë seei, ma na wan sëmbë sabi na un juu ten de o pasa e. Dee basia u Gadu Köndë an sabi, nöö Mi di Mii u Gadu aki seei, ma sabi tu. Ma mi Tata a liba wanwan tö nöö sabi un juu de o pasa” (Mateosi 24:36). Unfa di tëkisi aki ta lei taa Jesosi na di Makiti Gadu u mundu.

Jesosi taki taa di Tata sabi soni möön di Womi Mii. Ee Jesosi bi dë di Makiti Gadu u mundu, nöö a bi o sabi hii soni di di Tata sabi. Hën da di Womi Mii ku di Tata na di wan seei sëmbë. Ma sonte wan sëmbë sa taki taa: ’Wë di Jesosi bi taki di soni dë a bi dë wan libisëmbë, ma te a dë wan jeje nöö a bi o taki wan woto fasi.’ Ma ee a dë sö tuutuu seei, nöö unfa a dë ku di santa jeje? Ee di santa jeje ku Gadu, di Tata, bi dë di wan seei sëmbë, nöö faandi mbei Jesosi an taki taa di santa jeje sabi dee soni di di Tata sabi?

Te joo ta lei soni u Bëibel go dou, nöö joo ko sabi möön hia tëkisi di nama ku dee soni u lei djunsu aki. Dee tëkisi dë o heepi i fii si gbelingbelin taa Gadu ku di Womi Mii ku di santa jeje na di wan sëmbë.—Psalöm 90:2; Tjabukama 7:55; Kolosën 1:15.

← Luku di kapitel