DI WÖUTU di de puu ko dëdëköndë a Saamakatöngö da di Hebelejën wöutu sheʼohl ku di Giiki wöutu hai′des. Dee tu wöutu aki dë u feni möön leki 70 pasi di de bi sikifi Bëibel a dee töngö dë. Dee tu wöutu aki nama ku dëdë. So Bëibel puu de kuma "geebi,”"didibi faja,” "baaku” nasö "dëdëköndë”. Ma gaansë u dee töngö aan wöutu di ta puu di Hebelejën wöutu ku di Giiki wöutu aki kumafa de musu dë. Andi dee wöutu dë kë taki tuutuu? Boo luku fa de ta taki u de a peipei tëkisi u Bëibel.

Pleikima 9:10 taa: "Na wan wooko nasö wookolai nasö köni nasö sabi dë a di geebi ka joo go” (Da Bijbel na ini Sranantongo). Di Hebelejën wöutu di de puu ko geebi aki da sheʼohl. Di geebi dë dë wan tuutuu kamian ka de bei wan lobiwan fii ö? Nönö. Di Bëibel abi woto Hebelejën wöutu ku Giiki wöutu te a ta taki u di geebi ka de ta bei wan sëmbë (Kenesesi 23:7-9; Mateosi 28:1). Di Bëibel abi wan wöutu tu te a taki u wan geebi ka de ta bei wan kodo famii nöö.—Kenesesi 49:30, 31.

Nöö andi da sheʼohl, nasö dëdëköndë? Di Bëibel ta lei taa dëdëköndë bigi gaanfa möön wan baaku ka de diki bei sömëni sëmbë. Jesaaja 5:14 taki taa dëdëköndë "ko möön bigi, nöö a bi jabi ën buka wajaa seei te dou hii kamian” (Da Bijbel). Hii fa dëdëköndë guli sömëni dëdë sëmbë kaa, tökuseei bëë fëën an ta fuu möönsö (Nöngö 30:15, 16, Da Bijbel). Te juu dou geebi ta fuu te ja sa bei sëmbë nëën möön, ma "dëdëköndë ku di kamian ka sëmbë ta poi kaba a sösö an ta fuu möönsö” (Nöngö 27:20, Da Bijbel). Dëdëköndë aan saba. Hën da dëdëköndë an dë wan tuutuu kamian. Hii sëmbë di dëdë kaa dë a geebi, u sa taki taa a dë a dëdëköndë. Hën da dëdëköndë da di geebi ka hii sëmbë nango.

Dee soni di Bëibel ta lei u di weki di sëmbë o toona weki baka, sa heepi u fuu fusutan möön bunu andi da "dëdëköndë”. Di Bëibel ta lei u taa dee dëdë sëmbë dee dë a dëdëköndë o toona weki baka (Jöpu 14:13; Tjabukama 2:31; Akoalimbo 20:13).* Di Bëibel ta lei u tu taa na dee sëmbë dee bi ta dini Jehovah nöö nango a dëdëköndë, ma söseei hia sëmbë dee an bi ta dini ën tu (Kenesesi 37:35; Psalöm 55:15). Hën mbei di Bëibel ta lei taa te "sëmbë dëdë de o toona weki baka, dee bi libi bunu a Masa Gadu wojo ku dee an bi libi bunu tuu”.—Tjabukama 24:15.

*  Ma Bëibel ta taki u sëmbë di an go a dëdëköndë, ma di go a "didibi faja”. Dee sëmbë dë an o toona weki baka. Di Giiki wöutu "Gehenna” hën de puu ko didibi faja a Saamakatöngö (Mateosi 5:30; 10:28; 23:33). Leti kumafa dëdëköndë an dë wan tuutuu kamian söseei didibi faja an dë wan tuutuu kamian tu.

← Luku di kapitel