MILIONMILION sëmbë a hii di goonliba abi guwenti ku di begi di sömëni sëmbë ta kai di U Tata Begi. Di begi aki, hën da di nëbai begi di Jesosi Keesitu bi lei dee bakama fëën, u de sa sabi fa de musu begi. Dee soni di Jesosi taki a di begi aki dë gaan fanöudu soni. Te i buta mëni a dee dii fosu soni di dë nëën dendu, nöö joo ko sabi möön hia u dee soni di Bëibel ta lei u tuutuu.

² A bigi u di begi aki, Jesosi lei dee sëmbë di bi ta haikëën fa de musu begi. A bi taki taa: "Nöö a di fasi aki un musu ta begi e: ’U Tata di dë a hemelköndë ala, be di në fii ko santa. Be di könuköndë fii ko. Be di kë fii pasa a goonliba aki leti kumafa a ta pasa a hemelköndë ala’” (Mateosi 6:9-13, NW). Andi dee dii soni di Jesosi begi u de aki, kë taki?

³ U lei hia soni kaa u di në u Gadu, Jehovah. U bi taki pikisö u dee soni Gadu kë, dee soni a du kaa da libisëmbë, ku dee soni a o du da de jeti. Wë andi Jesosi bi kë taki di a bi taa u musu ta begi taa: "Be di könuköndë fii ko?” Andi da di Könuköndë u Gadu? Unfa di ko fëën o mbei taa di në u Gadu ko santa? Nöö unfa di ko fëën o mbei taa di kë u Gadu pasa a goonliba?

ANDI DA DI KÖNUKÖNDË U GADU?

⁴ Di Könuköndë u Gadu dë wan tii u Jehovah Gadu. Gadu hën tei di Könu di musu tii buta a wooko. Ambë da di Könu u di Könuköndë u Gadu? Hën da Jesosi Keesitu. Di Könu Jesosi hei möön hii dee woto tiima u libisëmbë. Bëibel ta kai ën "di kaba hei Könu a hii könu liba, ku di kaba hei Masa a hii masa liba” (1 Timoteo 6:15). A abi di makiti u du soni möön bunu möön hiniwan tiima u goonliba, möön dee bunu tiima seei.

⁵ Naasë di Könuköndë u Gadu o dë ta tii? Wë naasë Jesosi dë nöunöu aki? I bi lei kaa taa de bi pekëën kii a wan posu, nöö baka di dë a bi toona weki. Föteni daka baka u di dë, hën wë a hopo siii go a hemel (Tjabukama 2:33). Awa, a hemel ala di Könuköndë u Gadu dë. Fëën mbei di Bëibel ta kai ën wan "könuköndë di dë a hemel” (2 Timoteo 4:18, NW). Hii fa di Könuköndë u Gadu dë a hemel, tökuseei a o tii hii di goonliba.—Akoalimbo 11:15.

⁶ Andi mbei taa Jesosi dë sö wan apaiti Könu? Wan soni hën da an o dëdë wan daka. Te di Bëibel ta tei Jesosi djei ku dee woto könu, nöö a taki fëën taa "hën wanwan tö nöö an sa dëdë a mundu möönsö. A ta libi a wan gaan limbo dendu ta koti faja te na wan libisëmbë sa go dou ka a sai dë” (1 Timoteo 6:16). Hën da hii dee bunu Jesosi ta du, o dë u nöömö. Nöö a o du gaan hia soni u tja bunu ko da dee sëmbë fëën.

⁷ Buta mëni a di woto aki di bi taki soni u Jesosi a fesi. A bi taki taa: "Di jeje u Jehovah o dë nëën liba. Fëën mbei a o köni, a o fusutan soni bunu, a o da sëmbë köni, a o taanga, a o sabi soni gaanfa, nöö a o abi gaan lesipeki da Jehovah. A o dë wan piizii soni dëën u lesipeki Jehovah. Te a o kuutu soni, an o buta mëni a soni di wojo fëën ta si nöö. Te a o gandji da sëmbë, an o buta mëni a soni di jesi fëën ta jei nöö. A o kuutu dee möfina sëmbë a wan leti fasi. Ku limbo hati a o gandji da sëmbë, sö taa dee sakafasi sëmbë sa feni bunu a goonliba” (Jesaaja 11:2-4). Dee wöutu aki ta lei u taa Jesosi o dë wan Könu di o ta du soni a wan leti fasi, nöö a o abi tjalihati u dee sëmbë dee a o tii a goonliba. Ja bi o kë abi sö wan tiima u?

⁸ Luku wan woto soni di Bëibel ta lei u di Könuköndë u Gadu: Na Jesosi wanwan o dë tiima. Woto sëmbë o tii makandi ku ën. Di apösutu Paulosu bi piki Timoteo taa: "Ee u hoi dou a dee sitaafu dendu, nöö u ku ën o tii makandi [kuma könu] a bakaten” (2 Timoteo 2:12). Awa, Paulosu, Timoteo ku woto biibima di Gadu tei, o tii makandi ku Jesosi a di Könuköndë di dë a hemel. Un mëni sëmbë o abi di gaandi dë?

⁹ Kumafa u bi si limbolimbo a di u 7 Woto u di buku aki, di apösutu Johanisi bi si "di Sikapu Mii [Jesosi Keesitu] taanputaanpu te a di kununu de kai Sion liba [hën da di bigi di a abi kuma könu a hemel], nöö a dë ku 144.000 sëmbë nëën bandja. Nöö hii dee sëmbë dë tuu ta tja di në fëën ku di në fëën Tata sikifisikifi a de mindifesi.” Ambë da dee 144.000 sëmbë dë? Johanisi seei ta konda da u taa: ’Dee sëmbë dë, hiniwan kamian ka di Sikapu Mii ta waka nango, nöö deseei ta waka nëën baka nango tu. Dee sëmbë dë wë de paka tei a libisëmbë dendu, nöö de da dee fosu sëmbë dee dë kuma wan paima da Masa Gadu ku di Sikafu Mii’ (Akoalimbo 14:1, 4). Aai, de da tuutuu bakama u Jesosi Keesitu, di tei buta apaiti u tii makandi ku ën a hemel. Baka te de dëdë weki go a hemel kaa, nöö "de wë o tii di goonliba” makandi ku Jesosi (Akoalimbo 5:10). Sensi di jaa 33, Gadu ta tei tuutuu Keesitu sëmbë ta tja ko makandi u de dou dee 144.000 sëmbë.

¹⁰ Gadu du wan gaan lobihati soni seei u di a seeka soni taa Jesosi ku dee 144.000 sëmbë o tii libisëmbë. Wan soni hën da Jesosi ko saandi da wan libisëmbë ku andi da njan pena, fu di hënseei bi dë wan libisëmbë. Paulosu taki u Jesosi taa "an dë taa an ta fii ku u tee wan soni taanga da u poi fuu musu du. A ta fii ku o. Biga dee soni dee ta pooba u puu u a di pasi u Gadu aki, nöö hii de tuu bi pooba u puu ën tu di ten a bi dë libisëmbë a goonliba aki. Ma hën an bi du hogi wan daka möönsö” (Hebelejën 4:15; 5:8). Dee sëmbë dee o tii makandi ku ën seei bi tja pena kuma libisëmbë, nöö de bi hoi dou tu. Boiti di dë de bi ta feti ku dee zöndu fii u de, nöö de bi ta suwaki tu. Tuutuu, de o fusutan dee fuka di ta miti libisëmbë!

ANDI DI KÖNUKÖNDË U GADU O DU?

¹¹ Di Jesosi bi taki taa dee bakama fëën musu begi taa di Könuköndë u Gadu musu ko, a bi taki söseei taa de musu begi taa di kë u Gadu musu pasa "a goonliba aki leti kumafa a ta pasa a hemelköndë ala”. Gadu dë a hemel, nöö hii dee engel fëën dee ta hoi deseei nëën, ta du di kë fëën. Ma a di u 3 Woto u di buku aki, u bi si taa wan takuhati engel an bi ta du di kë u Gadu möön, nöö a bi mbei taa Adam ku Eva du zöndu. A di u 10 Woto, woo ko saandi Bëibel ta lei u di takuhati engel dë di u ko sabi kuma Saatan Didibi. Saatan ku dee engel dee bi feni taa de o waka nëën baka, dee taku jeje, bi sa tan a hemel pikisö jeti. Di soni aki mbei taa na hii dee engel a hemel bi ta du di kë u Gadu. Soni bi o tooka te di Könuköndë u Gadu bi o bigi tii. Di njunjun Könu, Jesosi Keesitu, bi o feti ku Saatan.—Akoalimbo 12:7-9.

¹² Di tjabukama woto a basu aki, ta taki u di soni di bi o pasa: "Nöö hën mi jei wan taanga töngö sö kumutu a hemel taa: ’Aai, u böö e. Awa u si di heepi u di Gadu fuu fa a bigi tjika. U ko si di gaan kaakiti fëën di a abi. Aai. Awa di Tii fëën o paaja a mundu awaa. Nöö woo ko si di Könu fëën di a bi paamusi faa da u, fa a abi taki tjika. Biga di könkuma [Saatan] an dë a liba aki möön e. Fa a bi dë aki, a bi ta sei dee otowan fuu da Gadu ndeti ku didia, nöö awa de vindëën puu aki tuwë go a goonliba’” (Akoalimbo 12:10). I si dee tu gaan soni dee sikifi a di Bëibel tëkisi aki ö? Di fosu soni, hën da Jesosi Keesitu bigi tii di Könuköndë u Gadu kaa. Di u tu, hën da de vinde Saatan puu a hemel ko a goonliba.

¹³ Andi bi dë di bakapisi u dee tu soni dë? U ta lesi u di soni di bi pasa a hemel taa: "Wë nöö Gadu Köndë [hemel, NW], ku un dee sëmbë dë nëën tuu, un wai e!” (Akoalimbo 12:12) Awa, dee engel a hemel dee hoi deseei a Gadu ta wai, u di Saatan ku dee taku jeje fëën an dë ala möön, nöö hii dee engel a hemel tuu ta hoi deseei a Jehovah Gadu. Fii ku wanfasi dë ala u nöömö. Nöunöu aki di kë u Gadu ta pasa a hemel.

¹⁴ Ma nöö unfa a dë ku di goonliba? Di Bëibel taa: "Ma helu u di goonliba ku di ze, biga di didibi saka ko a unu awaa. Nöö fa a saka ko dë, a ko ku taanga hatiboonu, biga a sabi taa ten fëën ko sati” (Akoalimbo 12:12). Saatan hati boonu u di de vindëën puu a hemel, nöö wan sati pisiten nöö fika dëën. U di hati fëën boonu, mbei a ta tja fuka nasö "helu” ko a goonliba. A di woto di ta ko woo taki möön andi da di "helu” dë. Ma u di u ko sabi dee soni aki, a sa dë sö taa u ta hakisi useei unfa di Könuköndë o mbei taa di kë u Gadu pasa a goonliba.

¹⁵ Wë na fëëkëtë andi Gadu bi kë da di goonliba. I bi lei u di soni dë a di u 3 Woto. A di djai u Eden, Gadu bi söi taa a bi kë u di goonliba toon wan paladëisi di bi o fuu ku sëmbë di ta libi a wan leti fasi, nöö di na bi o dëdë möönsö. Ma Saatan bi mbei taa Adam ku Eva du zöndu. Fëën mbei di kë u Gadu an pasa a goonliba jeti, ma Gadu an tooka pakisei e. Te kuma tide Jehovah kë taa ’dee sëmbë dee ta libi a wan leti fasi nëën wojo, feni di goonliba, nöö naandë de o ta libi u teego’ (Psalöm 37:29). Nöö di Könuköndë u Gadu o mbei taa di soni dë pasa. Na un futu?

¹⁶ Buta mëni a di woto u Daniëli 2:44, ka a bi taki a fesi taa: "A di juu u dee könu dë, di Gadu u hemel o seti wan könuköndë di na sa poi wan daka. Di könuköndë seei an o pasa a na wan woto sëmbë maun dendu. A o booko hii dee könuköndë aki pisipisi, nöö a o kaba de. Di könuköndë seei o tan u nöömö.” Andi di soni aki ta lei u u di Könuköndë u Gadu?

¹⁷ Di fosu soni di tëkisi aki ta lei u, hën da di Könuköndë u Gadu bi o seti a di "juu u dee könu dë”, hën da a di ten di woto könuköndë bi o dë ta tii. Di u tu soni, hën da di Könuköndë o tan u nöömö. Na wan woto tii o sa wini ën tei kamian. Di u dii soni di u ta lei u di tëkisi aki, hën da di Könuköndë u Gadu ku dee könuköndë u di goonliba aki o feti. Di Könuköndë u Gadu o wini di feti. Te u kaba fëën, hën o dë di wan kodo tii a libisëmbë liba. Nöö libisëmbë o dë a di möön bunu tii basu di de an bi sabi wan daka.

¹⁸ Bëibel ta konda hia soni u di feti di Könuköndë u Gadu ku dee könuköndë u di goonliba aki o feti. A ta lei u taa te di kaba juu ta dou, nöö de taku jeje bi o ta tja buka u ganjan "dee könu” u goonliba tuu. Faandi mbei? U de "hai dee könu tja ko makandi u de feti di gaan feti a di Daka di di Gadu di abi hii makiti u mundu buta”. Dee könu u goonliba o ko zunta "a di kamian di dee Dju ta kai Amagedon” (Akoalimbo 16:14, 16). Dee soni dee sikifi a dee tu tëkisi aki ta lei u faandi mbei de ta kai di lasiti feti u dee libisëmbë tii ku di Könuköndë u Gadu, di feti u Amagedon.

¹⁹ Un maaka di Könuköndë u Gadu o dou ku di feti u Amagedon? Buta mëni baka a di soni di Gadu kë da di goonliba aki. Jehovah Gadu bi kë taa di goonliba fuu ku bumbuu sëmbë di dë telutelu söndö föutu, di bi o ta dini ën a di Paladëisi. Andi mbei taa di soni dë an ta pasa nöunöu jeti? Di fosu soni hën da u dë zönduma, u ta suwaki, nöö u ta dëdë tu. Ma u bi lei a di u 5 Woto taa Jesosi dëdë fuu hedi sö taa u sa libi u teego. Kandë i ta mëni dee wöutu di dë u feni a di Evangelie u Johanisi, ka a sikifi: "Masa Gadu lobi libisëmbë sö tee a da de di wan kodo Womi Mii fëën di a abi. Nöö ee wan sëmbë i ta biibi a di Mii fëën aki liba, nöö ja o lasi go kaba a sösö möönsö, ma i abi di libi u teego kaa.”—Johanisi 3:16.

²⁰ Wan woto soni, hën da hia sëmbë ta du hogi. De ta lëgëdë nasö de ta mindi soni, de ta ganjan sëmbë, de ta libi fanafiti a di së u manu ku mujëë. De an kë du dee soni Gadu kë. Sëmbë di ta du hogi, o dëdë a di feti u Gadu, Amagedon (Psalöm 37:10). Wan woto soni di mbei taa di kë u Gadu an ta pasa a goonliba jeti, hën da dee tiima an ta da sëmbë taanga u du di kë u Gadu. Sömëni tiima aan di makiti u tii sëmbë, de ta du hogihati soni nasö de ta tei möni a tafa basu. Di Bëibel ta taki gbelingbelin taa: "Sensi di libisëmbë bigi basi wotowan, an tja bunu ko da de.”—Pleikima 8:9.

²¹ Baka Amagedon, libisëmbë o dë a wan kodo tii basu, hën da di Könuköndë u Gadu. Di Könuköndë dë o du di kë u Gadu, nöö a o tja gaan bunu ko da libisëmbë. Wan soni di a o du, hën da a o bui Saatan ku dee taku jeje fëën wan dusu jaa longi (Akoalimbo 20:1-3). Gadu o mbei taa dee sëmbë dee hoi deseei nëën, feni wini u di lusupaima u Jesosi sö taa de an o ta siki ta dëdë möön. Ka faa dë sö, de o sa libi u teego te di Könuköndë o tii (Akoalimbo 22:1-3). Di goonliba o ko dë wan paladëisi. Sö wë di Könuköndë o mbei taa di kë u Gadu pasa a goonliba, nöö a o santa di në u Gadu. Andi di soni aki kë taki? A kë taki taa te u kaba fëën, hii sëmbë di dë ku libi o ta bigi Jehovah në te di Könuköndë u Gadu ta tii.

NA UN TEN DI KÖNUKÖNDË U GADU O HOPO DU WAN SONI?

²² Di Jesosi bi piki dee bakama fëën u de begi taa "Be di könuköndë fii ko”, nöö u ta fusutan limbolimbo taa di Könuköndë an bi ko jeti. A bi ko di Jesosi bi toona go a hemel ö? Nönö, biga Petuisi ku Paulosu seei bi taki taa baka di Jesosi toona weki, nöö di soni di sikifi a Psalöm 110:1 bi ko tuu. A bi taa: "Jehovah taki da mi Masa taa: ’Sindo fii a mi letimaun së aki, ta luku fa mi o buta dee felantima fii a i basufutu’” (Tjabukama 2:32-35; Hebelejën 10:12, 13). Hën da Jesosi bi musu wakiti wan pisiten.

²³ Un longi a bi musu wakiti? A di pisiten u di u 19 ku di u 20 jaahöndö, limbohati sëmbë di bi ta öndösuku Bëibel bi ko fusutan pikipiki taa Jesosi bi musu wakiti te di jaa 1914 dou. (I sa luku soni u di jaa dë a Woto fanöudu soni.) Dee soni dee bigi pasa a goonliba a di jaa 1914, ta söi taa dee öndösukuma dë bi a’ leti. U di dee soni di dee tjabukama bi taki a fesi bi ta pasa tuutuu, mbei a bi dë limbolimbo u si taa Keesitu toon Könu a di jaa 1914, nöö a di ten dë di Könuköndë u Gadu a hemel bigi tii. Hën da, u ta libi a di ’sati ten’ di fika da Saatan jeti (Akoalimbo 12:12; Psalöm 110:2). Söseei u sa taki gbelin taa abiti möön di Könuköndë u Gadu o mbei taa di kë u Gadu pasa a goonliba. I feni taa wan bunu njunsu disi ö? I ta biibi di njunsu aki tuutuu ö? Di woto di ta ko o heepi i fii si taa di Bëibel ta lei dee soni aki tuutuu.