KEESITU SËMBË kisi di buka u mëni di dëdë u Keesitu. Faandi mbei di soni aki dë sö wan fanöudu soni? Un ten Keesitu sëmbë musu mëni di daka dë, nöö unfa de musu du ën?

Jesosi Keesitu bi seti di daka dë a di jaa 33 a di ndeti di dee Dju bi ta hoi di Pasika u de. Dee Dju bi ta hoi di Pasika wan pasi a wan jaa, a di u 14 daka u di liba u de de kai Nisan. Di liba dë bi ta bigi so toon baka di fosu wiki u gaanliba te di libawojo kumutu. Nöö dee Dju bi ta konda 14 daka u hoi di Pasika, baka te sonu go.

Jesosi bi hoi di Pasika ku dee apösutu fëën. Baka di dë a manda Judasi Isikaliotu go, hën a seti di Ndeti Njanjan u Masa. Di soni dë ko a di kamian u di Dju Pasika, fëën mbei wan pasi nöö a musu ta hoi a wan jaa.

Mateosi, di sikifi di bunu buka fëën, taki taa: "Masa Jesosi tei wan bëëë hën a da Gadu tangi te a kaba. Nöö hën a booko ën hën a tëndëën da u [dee bakama fëën]. Hën a taa: ’Ja si fa mi booko di bëëë aki ö? Hën da di sinkii u mi. Un tei ën nöö un njan e.’ Nöö baka u di dë, hën a tei wan kan win hën a toona da Gadu tangi möön te a kaba, hën a tëndëën da u [dee bakama fëën]. A taa: ’Un tei nöö un bebe e. Hën da di gadjabia u mi di mi o tuwë a goon fu Gadu sa mbei wan njunjun buka ku libisëmbë. Biga fa de o kii mi aki, nöö hën o mbei Gadu o puu hia sëmbë a bëë u dee hogi de bi du.’”—Mateosi 26:26-28.

So sëmbë ta biibi taa Jesosi tooka di bëëë ko toon di sinkii fëën, nöö a tooka di win ko toon di buuu fëën. Ma Jesosi sinkii bi dë telutelu jeti di a da dee bakama fëën di bëëë dë. A dë sö tuutuu taa dee apösutu bi ta njan di sinkii u Jesosi ku söseei taa de bi ta bebe di buuu fëën u? Nönö, biga a bi o dë taa de njan sëmbë sinkii ku söseei taa de poi wan wëti u Gadu (Kenesesi 9:3, 4; Leifitiki 17:10). Kumafa Lukasi 22:20 ta taki, nöö Jesosi bi taa: "Di win un ta si a di kan aki, nöö hën da di njunjun buka Masa Gadu mbei ku unu fu di mi o tuwë di buuu u mi a goon.” Ma di win a di kan dë hën bi toon "di njunjun buka” u? Wë an sa dë sö, biga wan buka dë wan soni di sëmbë ta soi fëën.

Hën da di bëëë ku di win da maaka di ta söi wan soni. Di bëëë ta söi fa di sinkii u Keesitu dë telutelu. Jesosi bi tei wan bëëë di bi fika baka di de bi hoi di Pasika. De an bi mbei di bëëë dë ku sooda (Ëkisodesi 12:8). Bëibel ta maaka zöndu nasö poipoi libi ku sooda. Fëën mbei di bëëë ta djei di telutelu sinkii u Jesosi di a da u libisëmbë hedi. An bi abi zöndu.—Mateosi 16:11, 12; 1 Kolenti 5:6, 7; 1 Petuisi 2:22; 1 Johanisi 2:1, 2.

Di bë win ta djei di buuu u Jesosi. Di buuu dë mbei taa di njunjun buka bigi wooko. Jesosi bi taki taa di buuu fëën o mbei taa ’Gadu puu sëmbë a bëë’ nasö da sëmbë paadon u dee zöndu u de. Hën da libisëmbë sa ko dë söndö zöndu a Gadu wojo, nöö de sa dë a di njunjun buka dendu (Hebelejën 9:14; 10:16, 17). Di buka aki mbei taa 144.000 tuutuu bakama u Keesitu sa go a hemel. Naandë de o dë könu ku mindima, nöö de o tja bunu ko da libisëmbë.—Kenesesi 22:18; Jelemia 31:31-33; 1 Petuisi 2:9; Akoalimbo 5:9, 10; 14:1-3.

Ambë musu njan di bëëë nasö bebe di win a di Ndeti Njanjan u Masa? Wë, dee sëmbë dee dë a di njunjun buka dendu. Hën da dee sëmbë dee abi di houpu u go a hemel, de nöö musu njan di bëëë nasö bebe di win. Di santa jeje u Gadu ta piki dee sëmbë aki taa Gadu tei de u toon könu a hemel (Loomë 8:16). Dee sëmbë aki dë söseei a di buka di Jesosi bi mbei ku dee bakama fëën u tii ku ën a di Könuköndë.—Lukasi 22:29.

Nöö unfa a dë ku dee sëmbë dee abi di houpu u libi u teego a di Paladëisi a goonliba aki? De ta piki di buka u Jesosi, u di de nango a di Ndeti Njanjan u Masa, ma de an ta njan di bëëë nasö bebe di win. De ta luku nöö a wan lesipeki fasi. Dee Jehovah Kotoigi ta hoi di Ndeti Njanjan u Masa, wan pasi a wan jaa, a 14 Nisan. Hii fa wan tu dusu sëmbë nöö ta söi taa de abi di houpu u libi a hemel, tökuseei hii dee tuutuu bakama u Keesitu ta kai di daka dë gaan soni. A dë wan okasi ka hii sëmbë sa pakisei baka u di gaan lobi di Jehovah Gadu ku Jesosi Keesitu abi da libisëmbë.—Johanisi 3:16.

← Luku di kapitel