ANDI da di möön gaan kado di i kisi wan daka? Na te wan kado dii ufö a dë wan gaan kado. Te u luku ën bunu, nöö na a di möni u wan kado u sa si fa a bumbuu tjika. Ma te wan kado ta da i piizii nasö te a ta tapa wan fuka da i, nöö joo si ën kuma wan bumbuu kado seei.

² Wan kado dë di dii möön hii dee kado dee i bi sa kisi wan daka. A dë wan kado di Gadu da libisëmbë. Jehovah da u sömëni soni. Ma di möön gaan dii kado di a da u, da di lusupaima u di Womi Mii fëën, Jesosi Keesitu (Mateosi 20:28). Leti kumafa woo si a di woto aki, di lusupaima da di möön gaan kado di i bi sa feni biga a sa tja gaan piizii ko da i, nöö a sa mbei taa i feni dee möön fanöudu soni. Tuutuu, di lusupaima da di möön gaan soni di Jehovah du di ta lei i taa a lobi i.

ANDI DA DI LUSUPAIMA?

³ Fu taki ën gbelin, nöö ku di lusupaima Jehovah o puu libisëmbë lö a zöndu ku dëdë basu (Efeise 1:7). Ee u kë fusutan andi di Bëibel ta lei u di soni aki, nöö u musu buta mëni baka a di soni di bi pasa a di djai u Eden. Te u ko sabi andi Adam bi lasi di a du zöndu, nöö woo fusutan möön bunu faandi mbei di lusupaima dë sö wan gaan kado.

⁴ Di Jehovah mbei Adam, a bi dëën wan waiti soni tuutuu, hën da wan telutelu libi. Pakisei pikisö unfa a bi dë da Adam. U di Gadu mbei ën ku wan telutelu sinkii ku wan telutelu fusutan, mbei na wan daka seei a bi o ta suwaki, gaandi nasö dëdë. U di Adam bi dë wan telutelu libisëmbë, mbei a bi abi wan apaiti matifasi ku Jehovah. Di Bëibel taki taa Adam bi dë wan "mii u Masa Gadu” (Lukasi 3:38). Nöö Adam bi abi wan gaan matifasi ku Jehovah Gadu, leti kumafa wan womi mii ku hën lobi tata dë zuntu tjika. Jehovah bi ta fan ku Adam, di womi mii fëën di bi dë a goonliba, nöö a bi dëën wooko di bi ta da piizii. Söseei Gadu bi piki Adam dee soni a kë taa a bi musu du.—Kenesesi 1:28-30; 2:16, 17.

⁵ Adam bi mbei "kumafa Gadu dë” (Kenesesi 1:27). Nëën da Adam ta djei Gadu a sinkii e. Jehovah dë wan jeje di wa sa si ku wojo, leti kumafa u bi lei a di fosu woto u di buku aki (Johanisi 4:24). Sö a dë taa Jehovah aan wan libisëmbë sinkii. Adam bi mbei kumafa Gadu dë, u di a bi abi dee bunu fasi u Gadu, kuma lobi, köni, letidu ku makiti. Adam bi dë kuma hën Tata a wan woto fasi. Gadu bi mbei ën a sö wan fasi taa a bi sa du soni ku hënseei kë. An bi mbei ën kuma wan masini di ta du di wooko di de mbei ën faa du nöö. Nönö, a bi sa du dee soni hënseei kë, a bi sa tei di së u bunu nasö di së u hogi. Ee a bi piki Gadu buka, nöö a bi o sa libi u teego a di Paladëisi a goonliba.

⁶ Sö a ko dë taa di Adam bi pasa Gadu buka ku di Gadu piki ën taa a bi o dëdë, nöö a bi lasi wan gaan waiti soni seei. Di zöndu fëën mbei taa a lasi di telutelu libi fëën ku hii dee gaan bunu di a bi o feni (Kenesesi 3:17-19). A tjali taa na Adam wanwan lasi di waiti libi dë, ma dee bakamii fëën seei palalaa te dou. Gadu Wöutu taa: "Wan womi [Adam] tja zöndu ko a goonliba, nöö di zöndu tja dëdë ko. Hën mbei dëdë paaja da hii libisëmbë biga hii de tuu du zöndu” (Loomë 5:12, NW). Awa, hii u tuu kisi di zöndu u Adam. Fëën mbei di Bëibel taa a "sei” hënseei ku dee bakamii fëën ko saafuma u zöndu ku dëdë (Loomë 7:14, NW). Na wan houpu dë da Adam nasö Eva möön seei, biga ku deseei kë de pasa Gadu buka. Ma unfa a dë da dee bakamii u de?

⁷ Ku di lusupaima Jehovah ko puu libisëmbë a fuka basu. Andi da wan lusupaima? Tu soni dë fanöudu a wan lusupaima. Di fosu soni, hën da wan lusupaima da di paima di wan sëmbë ta paka u de lusu wan sëmbë nasö u bai wan soni baka. A dë kuma di paima sëmbë ta paka u de lusu wan sëmbë di hogihatima bi kisi. Di u tu soni, hën da wan lusupaima da di paima di sëmbë ta paka u tapa wan fuka. A dë di wan seei soni kuma di möni di wan sëmbë ta paka te wan soni pasa di mbei taa wotowan kisi makei. Boo taa wan sëmbë mbei wan gaan makei pasa, nöö hën o abi u paka wan möni u tapa di fuka dë, nasö u dee soni dee booko.

⁸ A dë sö taa wan soni bi o sa tapa di gaan fuka di Adam buta a hii u tuu liba, sö taa u sa kumutu a zöndu ku dëdë basu ö? Un boo luku andi da di lusupaima di Jehovah seeka da u. Söseei woo luku un pei bunu a sa tja ko da u.

DI FASI FA JEHOVAH SEEKA DI LUSUPAIMA DA U

⁹ U di u lasi di telutelu libi, mbei na wan zöndu libisëmbë bi o sa bai di libi dë wan daka (Psalöm 49:7, 8). Di soni di bi dë fanöudu da wan lusupaima di bi o bunu tjika kuma di libi di bi lasi. Di soni aki kai ku di maiki u letidu di dë u feni a di Wöutu u Gadu, di taa: "Ee wan sëmbë kii wan wotowan, nöö de musu kii ën baka” (Detolonomi 19:21; Mateosi 5:38). Andi bi o bunu tjika u bai di telutelu libi di Adam lasi? Wë di soni di bi dë fanöudu da wan telutelu libi di dë di wan seei soni kuma di libi di bi lasi.—1 Timoteo 2:6.

¹⁰ Unfa Jehovah bi seeka di lusupaima da u? A bi manda wan u dee jeje womi mii fëën ko a goonliba. Ma Jehovah an bi tapa wojo tei wan u dee mii fëën. A manda di mii di a lobi gaanfa, di wan kodo Womi Mii fëën (1 Johanisi 4:9, 10). Di Womi Mii aki bi dë kabakaba u disa di libi di a bi abi a hemel ala ko a goonliba (Filipi 2:7). Kumafa u bi lei a di woto a fesi, Jehovah bi du wan foombo soni di a buta di libi u di Womi Mii fëën go a Malia bëë dendu. Di santa jeje u Gadu bi mbei taa Malia pai Jesosi kuma wan telutelu libisëmbë, di na bi a’ zöndu fuka.—Lukasi 1:35.

¹¹ Unfa wan womi bi sa dëdë paka wan paima da milionmilion sëmbë? Wë unfa a du ko taa milionmilion sëmbë ko toon zönduma? Na fëëkëtë taa u di Adam du zöndu, mbei a lasi di waiti telutelu libi di a bi abi kuma libisëmbë. Fëën mbei an bi o sa da dee bakamii fëën di libi dë. Ma zöndu ku dëdë nöö a bi o sa da de. Di Bëibel ta kai Jesosi "di lasiti Adam” (1 Kolenti 15:45, NW). Boo taa Jesosi ko a Adam kamian u ko heepi u. Jesosi paka u di zöndu u Adam, di a tuwë di telutelu libi fëën da u, ku söseei di a piki Gadu buka a hii soni. Sö wë Jesosi bi tja houpu ko da dee bakamii u Adam.—Loomë 5:19; 1 Kolenti 15:21, 22.

¹² Di Bëibel ta taki finifini fa Jesosi bi pena ufö a dëdë. De bi hupi ën wan hogi wipi, ku hogihati de pekëën a wan posu, nöö hën a dëdë a wan hati fasi (Johanisi 19:1, 16-18, 30; Woto fanöudu soni). Faandi mbei Jesosi bi musu pena gaanfa sö? A wan u dee woto di ta ko, woo si taa Saatan bi kë söi taa na wan libisëmbë di ta dini Gadu bi o hoi deseei a Gadu te soni ta pooba de. U di Jesosi hoi ënseei a Gadu, hii di a bi pena gaanfa, mbei a piki di kaagi u Saatan a di möön bunu fasi. Jesosi söi taa wan libisëmbë di dë telutelu di ta du soni ku ënseei kë, sa hoi ënseei a Gadu a hii futu aluwasi andi Didibi ta du. An dë u taki taa Jehovah bi wai gaanfa seei u di di lobi Womi Mii fëën bi hoi ënseei nëën!—Nöngö 27:11.

¹³ Unfa di lusupaima bi paka? A di u 14 daka u di liba u dee Dju di de ta kai Nisan a di jaa 33, Gadu disa de kii di Womi Mii fëën di bi dë telutelu söndö zöndu. Sö a dë taa, Jesosi da di telutelu libi fëën kuma wan paima "di wan pasi dë fu nöömö” (Hebelejën 10:10). Dii daka baka di Jesosi dëdë, Jehovah weki ën faa toona libi kuma wan jeje. Di Jesosi toona go a hemel a Gadu, nöö naandë di paima bi o paka kaba. A tja di gaan dii telutelu libi fëën di a bi abi a goonliba go buta a Gadu maun, u Gadu sa bai dee bakamii u Adam (Hebelejën 9:24). Jehovah tei di soni dë kuma wan lusupaima di bi dë fanöudu u puu libisëmbë lö a zöndu ku dëdë basu.—Loomë 3:23, 24.

UN WINI I SA FENI U DI LUSUPAIMA

¹⁴ Hii di u dë zönduma, tökuseei di lusupaima sa mbei taa u feni gaan wini. Boo luku andi da so u dee wini di gaan kado di Gadu da u aki, sa tja ko da u nöunöu kaa ku söseei a di ten di ta ko.

¹⁵Paadon u zöndu. U di u kisi zöndu, mbei u musu ta biinga taanga u du bunu soni. Hii u tuu ta du zöndu te u ta fan nasö te u ta du soni. Ma u di Jesosi da di libi fëën kuma wan paima, mbei u sa kisi "paadon u dee zöndu fuu” (Kolosën 1:13, 14). Ee u kë kisi di paadon dë, nöö a musu hati u taa u bi libi a wan fasi di na bunu. U musu a’ sakafasi, nöö u musu hakisi Jehovah faa da u paadon, u di u ta biibi a di lusupaima u di Womi Mii fëën.—1 Johanisi 1:8, 9.

¹⁶Wan limbo hati a Gadu wojo. Ee di hati fuu an limbo, hesihesi a sa mbei u booko saka, nöö woo ta fii kuma wa bunu tjika u dini Gadu. Di lusupaima mbei taa Jehovah ta da u paadon. Fëën mbei a wan lobihati fasi, Jehovah jabi di pasi da u fuu sa dini ën ku wan limbo hati, hii fa u dë zönduma (Hebelejën 9:13, 14). Di soni aki mbei taa na wan soni sa tapa pasi da u fu wa sa fan ku Jehovah. Fëën mbei u sa fan fiifii ku Jehovah te u ta begi (Hebelejën 4:14-16). Te u abi wan limbo hati a Gadu wojo, nöö di soni dë o da u kötö hati, woo abi lesipeki da useei, nöö a o mbei taa u dë waiwai.

¹⁷Di houpu u libi u teego a wan paladëisi a goonliba. Loomë 6:23 taki e: "Hogilibi [nasö zöndu] abi hën paka, hën da dëdë.” Di wan seei vers taki möön taa: ’Ma di soni Gadu ta da u fu sösö, hën da di libi u teego di u sa feni a Keesitu Jesosi u Masa.’ A di u 3 Woto u di buku aki, u bi taki u dee gaan bunu dee o dë a di Paladëisi a goonliba (Akoalimbo 21:3, 4). Hii dee gaan bunu dë, kuma di libi u teego ku wan bumbuu gösöntu, woo sa feni de u di Jesosi dëdë fuu hedi. Ee u kë feni dee gaan bunu dë, nöö u musu söi taa di lusupaima dë wan gaan kado da u.

UNFA I SA SÖI TAA A DË WAN GAAN SONI DA I?

¹⁸ Faandi mbei u musu da Jehovah gaan tangi u di paima di a paka da u? Wë, te wan sëmbë tei hën ten, hën kaakiti nasö hën möni faa sa da i wan kado, nöö a o bigi da i. A ta bigi da u seei te u ta si taa di kado di wan sëmbë da u, ta lei u taa a lobi u tuutuu. Di lusupaima da di möön gaan kado a mundu, u di Gadu hën du di möön gaan soni u seeka di lusupaima da u. Johanisi 3:16 taki taa: "Masa Gadu lobi libisëmbë sö tee a da de di wan kodo Womi mii fëën”. Di lusupaima ta lei u limbolimbo fa Jehovah lobi u tjika. Söseei a ta lei u taa Jesosi lobi u biga a bi dë kabakaba u lasi ën libi fuu hedi (Johanisi 15:13). Fëën mbei di lusupaima di u kisi kuma kado, musu lei u taa Jehovah ku di Womi Mii fëën lobi hiniwan fuu.—Galasia 2:20.

¹⁹ Wë nöö unfa i sa söi taa di lusupaima di Gadu da u, dë wan gaan soni da i? Wë a di fosu kamian i musu mbei taanga möiti fii ko sabi Jehovah möön bunu, di Sëmbë di paka di lusupaima da u (Johanisi 17:3). Di buku aki o heepi i fii lei soni u Bëibel, nöö joo ko sabi Jehovah möön bunu. Te i ko sabi Jehovah möön bunu, nöö joo ko lobi ën gaanfa seei. Nöö di lobi dë o mbei taa joo kë du dee soni di ta kai ku ën.—1 Johanisi 5:3.

²⁰Biibi a di lusupaima u Jesosi. Di soni aki Bëibel bi taki u Jesosi: "Ee wan sëmbë i ta biibi a di Womi mii u Gadu…nöö i abi di libi u teego kaa” (Johanisi 3:36). Unfa u sa biibi a Jesosi? Na ku buka nöö u musu söi taa u ta biibi a Jesosi. Jakobosi 2:26 taki taa: "Biibi ku buka söndö du aan na wan wojo heepi”. Aai, dee "du” fuu ta söi taa u abi tuutuu biibi. Wan fasi fa u sa biibi a Jesosi, da te u ta mbei taanga möiti u djeesi ën ku dee soni u ta taki, ma söseei ku dee soni u ta du.—Johanisi 13:15.

²¹Go a di Ndeti Njanjan u Masa di u ta mëni hiniwan jaa. A di ndeti u 14 Nisan 33, Jesosi bi seti wan apaiti soni di u musu ta mëni. Di Bëibel ta kai ën "di Ndeti Njanjan u Masa” (1 Kolenti 11:20; Mateosi 26:26-28, NW). Di soni aki seei u ta kai di Mëni u di u ta mëni di dëdë u Keesitu. Jesosi bi seti ën u heepi dee apösutu fëën ku söseei hii dee woto tuutuu bakama fëën, u de hoi a pakisei taa u di a dëdë hii fa a bi dë telutelu söndö föutu, mbei a da di libi fëën kuma wan lusupaima. U di soni aki mbei Jesosi bi da u di kumadei aki: ’Un musu ta du di soni aki nöömö, fuun ta mëni mi’ (Lukasi 22:19, NW). Te u ta hoi di soni aki, nöö u ta mëni di gaan lobi di Jehovah ku Jesosi abi da u. U sa söi taa di lusupaima dë wan gaan soni da u, te u ta ko makandi hiniwan jaa u mëni di dëdë u Jesosi.*

²² Di lusupaima di Jehovah seeka da u, dë tuutuu wan gaan kado di sëmbë an sa bai wan daka (2 Kolenti 9:14, 15). Di gaan dii kado aki, sa tja bunu ko da dee sëmbë dee dëdë seei tu. A di u 6 ku di u 7 Woto, woo taki u di soni aki finifini.

*  Ee i kë sabi möön hia soni u di Ndeti Njanjan u Masa, nöö luku Woto fanöudu soni.