DI TJABUKAMA Daniëli bi libi möön leki 500 jaa a fesi bifö de pai Jesosi. Tökuseei Jehovah bi konda soni da Daniëli di bi o mbei taa a ko sabi na un ten Jesosi bi o salufu nasö na un ten a bi o toon di Mësiasi nasö di Keesitu. Wan engel bi piki Daniëli taa: "I musu sabi di soni aki, nöö i musu fusutan bumbuu taa fa i si di buka o paaja taa de musu seeka Jelusalen nöö de musu mbei ën baka, seibi wiki ku sikisiteni ku tu wiki o pasa ufö di Mësiasi di Fesima dou.”—Daniëli 9:25.

Fuu sa ko sabi na un ten di Mësiasi bi o dou, u musu sabi na un ten u musu bigi konda dee wiki dë. Kumafa di tjabukama bi taki, nöö u musu bigi konda a bigi u di ten di "di buka o paaja taa de musu seeka Jelusalen nöö de musu mbei ën baka”. Na un ten di ’buka paaja’? Kumafa Nehemia, wan sikifima u Bëibel bi taki, nöö "a di u tuwenti jaa di Könu Artakserkses bi dë tiima” di buka bi paaja taa dee peni lomboto Jelusalen bi musu mbei baka (Nehemia 2:1, 5-8). Sabima taki taa di fosu telutelu jaa di Artakserkses bi ta tii bi dë di jaa 474 bifö Keesitu. Fëën mbei di jaa 455 bifö Keesitu, bi dë di u 20 jaa di a bi ta tii. Awaa u ko sabi na un ten u musu bigi konda fuu dou di jaa di di Mësiasi bi o dou. U musu bigi konda a di jaa 455 bifö Keesitu.

Daniëli bi taki un longi a bi o tei ufö "di Mësiasi di Fesima” bi o dou. A bi taki u "seibi wiki ku sikisiteni ku tu wiki”. Hën da 69 wiki te u konda de mökisi. Un longi dee 69 wiki aki dë. Peipei Bëibel ta lei taa dee wiki aki na wiki u seibi daka kumafa u sabi, ma wan u dee wiki aki da seibi jaa. Dee Dju u awoo ten bi a’ di guwenti ku di lö pei soni aki. Sö wë a bi dë taa hiniwan seibi jaa de bi ta hoi wan Saba jaa (Ëkisodesi 23:10, 11). Fëën mbei dee 69 wiki u di woto u Daniëli da 483 jaa, biga wan wiki da 7 jaa, nöö te u konda 69 pasi 7, u ta kai a 483.

Nöö boo konda awaa. Te u bigi a di jaa 455 bifö Keesitu, nöö u konda 483 jaa nëën liba, u ta kai a di jaa 29. A di jaa dë wë Jesosi bi tei dopu, nöö a toon di Mësiasi! (Lukasi 3:1, 2, 21, 22)* A ta taanga di biibi fuu, te u ta si fa dee soni di dee tjabukama bi taki ta pasa tuutuu sö, na sö nö?

*  A bigi u di jaa 455 bifö Keesitu, te dou di jaa 1 bifö Keesitu, u ta konda 454 jaa. Un jaa u ta kisi baka di jaa 1 bifö Keesitu? Di jaa 0 bifö Keesitu ö? Nönö, u ta kisi di jaa 1. Nöö a bigi u di jaa 1 te dou di jaa 29, u ta konda 28 jaa. Te u konda 454 jaa, ku 1 jaa, ku 28 jaa mökisi, nöö u ta kai a 483 jaa. De bi "kii” Jesosi a di jaa 33, hën da a di u 70 wiki u di woto u Daniëli (Daniëli 9:24, 26). Luku Woto 11 u di buku ¡Poti Prakseri na a Profeititori fu Danièl! Jehovah Kotoigi hën mbei di buku dë. Bi.K. da bifo Keesitu, nöö Ba.K. da bigi u di jaa 1.

"SËBËNTENI WIKI”

490 jaa
7 wiki (49 jaa)		62 wiki (434 jaa) ←Bi.K. | Ba.K.→	1 wiki (7 jaa)
455 ’Di buka paaja taa de musu seeka Jelusalen’	406 Jelusalen mbei baka	29 Di Mësiasi dou	33 De "kii” di Mësiasi	36 Di kaba u dee "sëbënteni wiki”

← Luku di kapitel