DI BUKU Akoalimbo ta taki u soni di musu tja ko a limbo ufö u sa fusutan de (Akoalimbo 1:1). A ta taki soni u wan mujëë di abi di në "di Gaan Babilon” sikifisikifi nëën mindifesi. Di mujëë dë dë sindosindo a "dee gaan hia sëmbë u mundu” liba, ku söseei a "dee peipei nasiön sëmbë” u goonliba (Akoalimbo 17:1, 5, 15). Wë wan mujëë an sa sindo a sömëni sëmbë liba. Hën mbei di Gaan Babilon an sa dë wan tuutuu mujëë. Wë nöö andi da di gaan mötjö mujëë dë?

Akoalimbo 17:18 ta taki taa di mujëë da "di gaan köndë…di ta buta hii dee könu u di goonliba aki tuu nëën basu”. Dee wöutu "gaan köndë” ta lei taa sëmbë ta libi nëën kumafa soni seeka a köndë. U di di "gaan köndë” aki "ta buta hii dee könu u di goonliba aki tuu nëën basu”, mbei u sa taki taa di mujëë de kai di Gaan Babilon musu u dë wan feleniki di abi gaan makiti a hii di goonliba. Fëën mbei a fiti u kai ën wan köndë di abi gaan makiti. Wë un pei makiti a abi? A abi makiti a di së u keiki soni. Luku unfa woto tëkisi u di buku Akoalimbo ta lei u taa sö a dë tuutuu.

Wan köndë sa abi makiti a politiki soni, a möni soni ku söseei a keiki soni. Di mujëë de kai di Gaan Babilon an dë wan köndë di abi makiti a politiki soni, biga di Wöutu u Gadu ta taki taa "hii dee könu u goonliba”, nasö dee politiki soni u di goonliba aki, ta "libi mötjö libi” ku ën. Di mötjö libi fëën da dee buka dee a mbei ku dee tiima u di goonliba aki, nöö fëën mbei u ta fusutan faandi mbei Bëibel ta kai ën "di gaan mötjö mujëë”.—Akoalimbo 17:1, 2; Jakobosi 4:4.

Di Gaan Babilon an sa dë wan köndë di abi makiti a möni soni biga "dee wënkëma” u goonliba o tjali te di köndë dë o booko kaba a sösö. Dee "wënkëma” dë da hii di seti u möni wooko a goonliba. Di buku Akoalimbo ta söi gbelingbelin taa dee könu ku dee wënkëma "o tuwë gogo te a wan së ala” ta luku fa di Gaan Babilon o kaba a sösö (Akoalimbo 18:3, 9, 10, 15-17). Fëën mbei a fiti u taki taa di Gaan Babilon an dë wan köndë di abi makiti a politiki soni nasö a möni soni, ma a abi makiti a keiki soni liba.

Wan woto soni di ta lei taa di Gaan Babilon abi makiti a keiki soni liba, hën da a ta ganjan hii dee nasiön ku dee "gaan tofu” fëën nasö ku dee gaan obia wooko fëën (Akoalimbo 18:23). U di hii pei obia wooko ta nama ku di dini di sëmbë ta dini soni ku söseei dee soni dee taku jeje ta taki, mbei wa ta foondo taa di Bëibel ta taki taa di Gaan Babilon dë "wan kamian ka dee didibi [taku jeje, NW] nöö ta libi” (Akoalimbo 18:2; Detolonomi 18:10-12). Bëibel ta taki tu taa di Gaan Babilon aki ta du ku "dee tjabukama u Gadu ku hii dee oto sëmbë fëën [santawan fëën, NW]” (Akoalimbo 18:24). Boo taa di Gaan Babilon buuse di tuutuu biibi sö gaanfa taa a ta du gaan hogihati soni ku dee sëmbë dee "ta piki gbelin taa de nama ku Masa Jesosi”, nöö a ta kii so u de tu (Akoalimbo 17:6). Fëën mbei di mujëë de kai di Gaan Babilon da hii dee falisi keiki u goonliba tuu tja ko a wan. Hën da hii dee keiki dee ta fia ku Jehovah Gadu dë a dendu tu.

← Luku di kapitel