UNFA i mëni taa di Gaan Kuutudaka o dë? Sömëni sëmbë ta mëni taa wan fu wan, milionmilion sëmbë o ko a Gadu fesi faa kuutu de. Naandë Gadu o kuutu hiniwan sëmbë apaiti. So sëmbë o feni libi a wan paladëisi a hemel, nöö wotowan o kisi sinkii hati u teego. Ma di Bëibel ta lei wan woto soni u di pisiten dë. Di Wöutu u Gadu ta söi taa wa a’ fu fëëë di pisiten dë, ma di pisiten dë o dë wan ten di o da sëmbë houpu, nöö soni o seeka ko bunu baka.

Na Akoalimbo 20:11, 12, u ta lesi di soni di di apösutu Johanisi bi taki u di Gaan Kuutudaka: "Mi si wan gaan könubangi wetiweti faan sö, ku wan Sëmbë nëën sindosindo. Nöö fa u mbei dë, hën mundu ku goon go kumutu a di Sëmbë naandë fesi te de an dë u si möön seei, kwetikweti. Nöö hën mi si dee dëdë sëmbë, heiwan ku lagiwan tuu, taanputaanpu a di Sëmbë di dë a di könubangi fesi. Nöö aan soni, hën de jabi dee buku. Nöö hën de tei wan oto buku bi sai dë möön de kai di Buku u Libi, nöö hën de jabi ën tu. Nöö hën de kuutu dee dëdë sëmbë dee dë taanputaanpu dë te dou kumafa de bi libi a goonliba. Biga hii fa de bi libi a goonliba tuu dë sikifisikifi a dee buku de jabi naandë dendu.” Ambë da di Kuutuma dë?

Jehovah Gadu da di Kaba Hei Kuutuma u libisëmbë. Ma a da wan woto sëmbë di kuutu wooko dë. Kumafa a sikifi a Tjabukama 17:31, di apösutu Paulosu bi taki taa Gadu "buta daka kaa faa kuutu a libisëmbë liba kumafa a fiti. Hën a tei wan Sëmbë buta faa dë fesima u di kuutu.” Jesosi Keesitu di toona weki baka da di Kuutuma di Gadu buta (Johanisi 5:22). Wë nöö na un ten di Gaan Kuutudaka o bigi? Un longi a o dë?

Di buku Akoalimbo ta lei taa di Gaan Kuutudaka o bigi baka di feti de kai Amagedon, te de puu di seti u Saatan a goonliba (Akoalimbo 16:14, 16; 19:19-20:3).* Baka Amagedon, de o bui Saatan ku dee taku jeje fëën wan dusu jaa longi a wan baaku di na a’ goon. A di ten dë, dee 144.000 sëmbë di feni di gudu a hemel, o dë kuutuma nöö de o tii kuma "könu ku Keesitu, wan dusu jaa longi” (Akoalimbo 14:1-3; 20:1-4; Loomë 8:17). Di Gaan Kuutudaka an dë wan daka u 24 juu nöö, ka soni o pasa vau sö. A o dë wan dusu jaa longi.

A di dusu jaa dë dendu, Jesosi Keesitu o "kuutu hii sëmbë, dee libi wan ku dee dëdë wan tuu” (2 Timoteo 4:1). "Dee libi wan” o dë dee "gaan hia sëmbë” dee o pasa Amagedon libilibi (Akoalimbo 7:9-17). Di apösutu Johanisi bi si "dee dëdë sëmbë…taanputaanpu a di Sëmbë di dë a di könubangi fesi” u kuutu de. Kumafa Jesosi bi paamusi, dee "dëdë sëmbë tuu o jei [Keesitu] ta kai de” biga a o toona weki de baka (Johanisi 5:28, 29; Tjabukama 24:15). Andi Jesosi o luku te a o kuutu de?

Kumafa di apösutu Johanisi bi si a di wojo limbo sunjan, "de jabi dee buku”, nöö "hën de kuutu dee dëdë sëmbë dee dë taanputaanpu dë te dou kumafa de bi libi a goonliba. Biga hii fa de bi libi a goonliba tuu dë sikifisikifi a dee buku de jabi naandë dendu”. Dee fesiten soni de bi du, de sikifi a dee buku dë dendu ö? Nönö, di kuutuma an o luku a dee soni dee sëmbë dë bi du ufö de bi dëdë. Unfa u du sabi di soni aki? Di Bëibel taki taa: "Te wan sëmbë dëdë, nöö a kumutu a hogilibi basu ko fii” nasö a ko fii u dee zöndu fëën (Loomë 6:7). Hën da dee sëmbë dë o bigi wan njunjun libi. Gadu da de paadon u hii dee zöndu de bi du. Hën da dee soni dee sikifi a dee buku da dee soni di Gadu kë taa sëmbë musu du baka te de toona weki baka. Ee dee sëmbë dee pasa Amagedon libilibi ku söseei dee sëmbë dee o toona weki baka, kë libi u teego, nöö de musu hoi deseei a dee wëti u Gadu. Söseei de musu hoi deseei a dee woto wëti di Gadu o buta da de a dee dusu jaa dendu. Hën da te Jesosi o kuutu sëmbë, nöö a o luku a dee soni de o du a di Gaan Kuutudaka dendu.

A di Gaan Kuutudaka, milionmilion sëmbë o kisi di okasi u di fosu pasi a de libi u ko sabi andi Gadu kë, sö taa de sa libi kumafa a kë. Di soni dë kë taki taa wan gaan wooko o du a hii goonliba u lei sëmbë soni. Awa, "leti libi hën da di soni di dee sëmbë u goonliba o ko sabi” (Jesaaja 26:9). Ma na hii sëmbë o kë libi kumafa Gadu kë. Jesaaja 26:10 ta taki taa: "Aluwasi i du wan hogihatima wan bunu seei, tökuseei an o ko sabi andi da leti libi möönsö. A di köndë ka leti libi dë, a o ta libi hogi, nöö an o si fa Jehovah bigi tjika.” A di Gaan Kuutudaka, de o kii dee hogihatima puu a goonliba. De an o dë möön seei.—Jesaaja 65:20.

Te di Gaan Kuutudaka kaba, nöö dee sëmbë dee o pasa libilibi o "weki baka” u ko dë telutelu sëmbë a hii futu (Akoalimbo 20:5). Hën da a di Gaan Kuutudaka, libisëmbë o ko dë telutelu baka kumafa de bi dë a di bigi (1 Kolenti 15:24-28). Baka di dë, de o lusu Saatan puu a di baaku dendu ka de bi tuwëën go, nöö a o ganjan libisëmbë wan lasiti pasi (Akoalimbo 20:3, 7-10). Dee sëmbë dee an o feni kisi o si fa di paamusi u Bëibel aki o ko tuu: "Dee sëmbë dee ta libi a wan leti fasi, de o feni di goonliba, nöö naandë de o ta libi u teego” (Psalöm 37:29). Awa, di Gaan Kuutudaka o tja gaan bunu ko da hii libisëmbë di ta du andi Gadu kë!

*  Ee i kë sabi woto soni u Amagedon, nöö luku a di u 20 woto u di buku Anbegi a wan-enkri tru Gado. Jehovah Kotoigi de mbei di buku dë.

← Luku di kapitel