JEHOVAH GADU ta booko hën hedi gaanfa ku u, nöö a kë taa u feni bunu u di lobihati fasi fa a ta tii. Te u ta dini Gadu a di soifi fasi, nöö woo dë ku piizii, söseei woo koti pasi da gaansë u dee bookohedi u di libi. Gadu o limbo u pasi, nöö a o heepi u tu (Jesaaja 48:17). Ma höndöhöndö keiki dë di ta taki taa de ta lei tuutuu soni u Gadu. Tökuseei dee soni de ta lei u Gadu ta tooka gaanfa seei, nöö de ta lei peipei soni u di fasi fa Gadu kë taa u musu dini ën.

² Unfa u sa sabi andi da di soifi fasi u dini Jehovah? Ja a’ fu lei soni u hii dee peipei keiki u maaka de luku undi u de da di tuutuu wan. I musu ko sabi nöö andi di Bëibel ta lei u tuutuu u di soifi fasi u dini Gadu. Boo luku wan soni di o heepi u fuu fusutan di soni dë: A gaansë u dee köndë, falisi möni hia. Ee di wooko fii bi dë taa i musu pii dee falisi möni puu a dee bumbuu wan dendu, nöö unfa i bi o du ën? I bi o biinga u hoi hii dee peipei fasi fa falisi möni mbei a hedi ö? Nönö. A bi o möön bunu ee i tei di ten fii u ko sabi fa di tuutuu möni mbei. Baka te i ko sabi fa di tuutuu möni mbei kaa, nöö joo sabi di falisi wan te i si ën. Söseei a dë taa te u ko sabi di tuutuu biibi, nöö woo sabi dee falisi wan.

³ A dë taanga fanöudu u dini Jehovah a di fasi di ta kai ku ën. Sömëni sëmbë ta mëni taa hii biibi ta kai ku Gadu, ma na di soni dë di Bëibel ta lei. An tjika te wan sëmbë ta taki taa hën da wan Keesitu sëmbë. Jesosi bi taki taa: "Na hii sëmbë di ta kai mi ‘Masa’ ta dë a di Tii u Gadu dendu fu de dou nëën köndë e. Ma dee sëmbë dee ta du dee soni dee mi Tata kë, nöö de nöö o dou nëën köndë.” Hën mbei ee u kë taa Gadu feni u bunu, nöö u musu ko saandi Gadu kë taa u musu du, nöö u musu du ën tu. Jesosi bi kai dee sëmbë dee an ta du di kë u Gadu, "takusëmbëma” (Mateosi 7:21-23). Leti kumafa falisi möni aan na wan heepi, sö nöö dee peipei falisi biibi aan na wan heepi tu. Di soni di möön hogi seei, hën da dee lö biibi dë an ta heepi sëmbë u ko dë mati u Gadu.

⁴ Jehovah ta da hii sëmbë di dë a goonliba aki di okasi u de sa feni di libi u teego. Ma ee u kë feni di libi u teego a di Paladëisi, nöö u musu dini Gadu a di soifi fasi, nöö nöunöu kaa u musu ta libi a wan fasi di ta kai ku ën. A tjali taa gaansë u sëmbë an ta libi sö. Fëën mbei Jesosi bi taki taa: "Denda go a di piki dööbuka, biga di pasi di ta tja sëmbë go poi kaba a sösö, bigi nöö a baai tu. Nöö hia sëmbë ta waka a di pasi dë. Ma di pasi di ta tja sëmbë go feni libi, sumaa nöö di dööbuka fëën piki. Nöö biti sëmbë nöö ta feni ën” (Mateosi 7:13, 14, NW). Di tuutuu biibi ta tja sëmbë go a di libi u teego. Falisi biibi ta tja sëmbë go kaba a sösö. Jehovah an kë u na wan kodo sëmbë musu lasi kaba a sösö. Fëën mbei a hii kamian u goonliba a ta da sëmbë di okasi u de ko sabi soni fëën (2 Petuisi 3:9). Awa, fëën mbei di fasi fa u ta dini Gadu sa tja libi nasö dëdë ko da u.

DI FASI FA U SA KO SABI DI TUUTUU BIIBI

⁵ Unfa u sa feni "di pasi di ta tja sëmbë go feni libi”? Jesosi bi taki taa u bi o ko sabi di tuutuu biibi te u luku a di libi u dee sëmbë dee abi di biibi dë. Jesosi bi taki taa: "Joo sabi de e, biga joo si a di libi u de.” A bi taki möön taa: "Di pau di bi ta pai bumbuu njanjan nöö bumbuu njanjan nöö a o ta pai nöömö” (Mateosi 7:16, 17). Ee u taki ën a woto futu, hën da dee soni wan sëmbë ta biibi ku di fasi fa a ta tja hënseei ta söi ee a dë a di tuutuu biibi. Hii fa dee tuutuu dinima dë zöndu sëmbë di ta mbei föutu, tökuseei te u luku a hii de tuu, nöö de ta mbei taanga möiti u du di kë u Gadu. Un boo buta mëni a sikisi soni di o heepi u fuu ko sabi ambë da dee sëmbë dee dë a di tuutuu biibi.

DEE SËMBË DEE TA DINI DI TUU GADU

• ta lei wotowan soni di dë a di Bëibel
• ta dini Jehovah wanwan tö, nöö de ta konda di në fëën da wotowan
• lobi de na de tuutuu
• ta tei Jesosi kuma di sëmbë di Gadu buta u puu a hogi basu
• an dë wan pisi u di goonliba aki
• ta paaja di buka taa di Könuköndë u Gadu da di wan kodo tii di sa heepi libisëmbë

⁶Dee dinima u Gadu ta lei wotowan soni di dë a di Bëibel. Di Bëibel seei ta taki taa: "Gadu seei wë mbei sëmbë sikifi hii dee soni dee dë a Gadu Buku. Dee soni aki bunu u lei u soni, u bai u a soni, u leti u buta a pasi, u gandji da u sö taa u sa libi tololoo. A sö wan fasi di sëmbë u Gadu sa dë kabakaba, seekaseeka u du hiniwan bumbuu wooko” (2 Timoteo 3:16, 17, NW). Di apösutu Paulosu bi sikifi da dee woto Keesitu sëmbë taa: "Di u konda di Buka da unu naandë, nöö un piki ën leti kuma a Gadu a kumutu, na a libisëmbë. Nöö Gadu Buka a dë tuu o” (1 Tesalonika 2:13). Fëën mbei dee soni dee tuutuu dinima ta biibi ku dee soni de ta du, an kumutu a libisëmbë nasö libisëmbë guwenti. De kumutu a di Wöutu u Gadu, di Bëibel, di a mbei sëmbë sikifi.

⁷ Jesosi Keesitu lei u wan soni, u di a bi ta lei wotowan soni di sikifi a di Wöutu u Gadu. Di a bi begi hën Tata di dë a hemel, a bi taki taa: "Di Wöutu fii hën da di Tuu” (Johanisi 17:17). Jesosi bi a’ biibi a di Wöutu u Gadu, nöö hiniwan soni a bi ta lei sëmbë bi ta kai ku Bëibel. Ufö Jesosi bi taki wan soni u Bëibel, nöö a bi lo’ u taki taa: "A sikifi a Gadu Buku” nasö "Di Buku u Gadu taki taa” (Mateosi 4:4, 7, 10). Sö nöö a dë tide taa dee sëmbë u Gadu an ta lei wotowan dee soni deseei ta pakisei. De ta biibi taa di Bëibel da di Wöutu u Gadu, nöö de ta hoi deseei a dee soni di Bëibel ta taki te de ta lei wotowan.

⁸Dee sëmbë dee dë a di tuutuu biibi ta dini Jehovah wanwan tö, nöö de ta konda di në fëën da wotowan. Jesosi bi taki taa: "Ja musu begi na wan oto soni a mundu möön leki Gadu i Masa [Jehovah i Gadu, NW]. Hën tö nöö i musu ta dini” (Mateosi 4:10). Hën mbei dee dinima u Gadu an ta dini woto gadu möön leki Jehovah. De ta lei woto sëmbë tu andi da di në u di tuu Gadu, ku söseei unfa a dë. Psalöm 83:18 taa: "Di në fii da Jehovah. I wanwan tö da di Kaba Heiwan u hii mundu.” Jesosi lei u andi u musu du fuu heepi wotowan u de ko sabi Gadu, di a bi taki taa: "Mi konda di në fii da dee sëmbë dee i tei a di goonliba aki da mi” (Johanisi 17:6, NW). A di ten aki seei, dee tuutuu dinima ta lei wotowan andi da di në u Gadu, andi a o du ku söseei andi da dee bunu fasi dee a abi.

⁹Dee sëmbë u Gadu lobi wotowan tuutuu, de lobi de na de söndö u pakisei deseei nöö. Jesosi bi taki taa: "Biga te un ta lobi sö kaa, nöö hii sëmbë o si taa bakama u mi gbelin un dë” (Johanisi 13:35). A di fasi dë dee fosu Keesitu sëmbë bi ta lobi de na de. Di lö lobi aki di Gadu kë taa u musu abi, ta mbei taa wa ta luku a sëmbë fesi, wa ta luku ee wan sëmbë gudu nasö ee a pooti. Boiti di dë, di lobi aki ta tja sëmbë ko a wan, nöö a ta mbei de libi ku wan hati kuma baaa ku sisa (Kolosën 3:14). Dee sëmbë dee dë a falisi keiki an ta lobi deseei, ta libi kuma baaa ku sisa. Unfa u du sabi di soni dë? Wë de ta kii deseei u di de an dë di wan köndë sëmbë nasö u di wan seei lö. Dee tuutuu Keesitu sëmbë an ta tei goni go kii woto baaa ku sisa di abi di wan biibi kuma de, nöö de an ta kii woto sëmbë tu. Di Bëibel taa: "Nöö ee i kë sabi ambë da dee mii u Gadu ku ambë da dee mii u didibi, nöö i luku a di libi u de nöö joo sabi. Biga di sëmbë di an ta libi bunu, nöö hën an sa dë mii u Gadu e. Söseei ee wan sëmbë ja ta lobi di otowan fii, nöö ja dë Masa Gadu mii tu…. U musu ta lobi di otowan fuu. Nöö wan musu abi hogihati kuma Kain. Kain bi dë sëmbë u didibi, hën mbei a a’ hogihati tefa a kii ën baaa.”—1 Johanisi 3:10-12; 4:20, 21.

¹⁰ U sabi taa, na te wa ta kii wotowan nöö hën da u a’ tuutuu lobi. U di dee tuutuu bakama u Keesitu an ta pakisei deseei nöö, mbei de ta tei de ten, de kaakiti, ku dee gudu u de u heepi de na de ta da deseei taanga (Hebelejën 10:24, 25). De ta heepi de na de te de abi fuka, nöö de an ta ganjan wotowan. Awa, de ta fiti di lai u di Bëibel taa de musu ’du bunu da hii sëmbë’.—Galasia 6:10.

¹¹Tuutuu bakama u Jesosi Keesitu ta tei ën kuma di sëmbë di Gadu buta u puu u a hogi basu. Di Bëibel taa: "Hën [Jesosi] nöö sa puu sëmbë a hogi basu…Oto në an dë a goonliba aki möönsö di u libisëmbë sa kai fuu feni di heepi u Gadu” (Tjabukama 4:12). Kumafa u bi si a di u 5 Woto, Jesosi da di libi fëën kuma wan lusupaima da libisëmbë di ta piki Gadu buka (Mateosi 20:28). Söseei Jesosi da di Könu di Gadu buta u tii di Könuköndë u hemel di o tii hii di goonliba. Nöö Gadu kë taa u musu haika Jesosi, nöö u musu ta du dee soni a lei u ee u kë feni di libi u teego. Fëën mbei di Bëibel taki taa: "Ee wan sëmbë i ta biibi a di Womi Mii u Gadu i si dë, nöö i abi di libi u teego kaa. Ma ee wan sëmbë ja kë biibi ën, nöö ja o feni di libi dë möönsö.”—Johanisi 3:36.

¹²Tuutuu dinima u Gadu an dë wan pisi u di goonliba. Di Jesosi bi dë a kuutu a di tiima u Loomë de kai Pilati, nöö a bi taki taa: "Di könuköndë u mi an dë wan pisi u di goonliba aki” (Johanisi 18:36, NW). Aan toobi na un köndë dee tuutuu bakama u Jesosi ta libi, de dë sëmbë di dë a di Könuköndë tii fëën basu. Fëën mbei de an ta mökisi deseei na wan tësitësi seei ku dee politiki soni u di goonliba aki. De an ta tei na wan së a dee toobi u di goonliba aki. Ma dee dinima u Jehovah an ta tapa wotowan u go a wan politiki paatëi, de aan toobi tu ee wan sëmbë kë taa wotowan musu sitëm dëën. Söseei de an ta tapa sëmbë u go sitëm tu. Ma hii fa dee tuutuu dinima u Jehovah an ta mökisi deseei ku politiki, tökuseei de ta hoi deseei a dee wëti u di köndë. Faandi mbei? Biga di Wöutu u Gadu ta piki de taa de "musu ta saka a dee tii u lanti basu” (Loomë 13:1). Te lanti kë taa de musu du wan soni di an ta kai ku dee soni Gadu kë taa de musu du, nöö dee tuutuu dinima u Gadu ta du kuma dee apösutu di bi taa: "Masa Gadu buka hën u musu piki möön gaanfa möön libisëmbë buka.”—Tjabukama 5:29; Maikusi 12:17.

¹³Dee tuutuu bakama u Jesosi ta paaja di buka taa di Könuköndë u Gadu da di wan kodo tii di sa heepi libisëmbë. Jesosi bi taki a fesi taa: "Ma nöö di bunu buka u di Njunjun Tii u Gadu [Könuköndë, NW] musu paaja te dou hii goonliba e, be hii föluku musu jei. Nöö baka u di dë ufö di ten u dë aki o kaba” (Mateosi 24:14). Dee tuutuu bakama u Jesosi Keesitu an ta da sëmbë taanga u de futoou taa libisëmbë tii sa heepi de ku dee fuka u de, ma de ta paaja di buka taa di Könuköndë u Gadu da di wan kodo tii di sa heepi libisëmbë (Psalöm 146:3). Jesosi bi lei u fuu begi u di bumbuu tii dë di a bi taki taa: "Be di könuköndë fii ko. Be di kë fii pasa a goonliba aki leti kumafa a ta pasa a hemelköndë ala” (Mateosi 6:10, NW). Di Wöutu u Gadu bi taki a fesi taa di Könuköndë u hemel "o booko hii dee könuköndë aki pisipisi, nöö a o kaba de. Di könuköndë seei o tan u nöömö”.—Daniëli 2:44.

¹⁴ Te i luku dee soni dee u taki aki, nöö hakisi iseei: ’Undi u dee keiki ta lei wotowan soni di dë a di Bëibel? Undi u de ta mbei wotowan sabi taa di në u Gadu da Jehovah? Na un keiki sëmbë ta lobi wotowan kumafa Gadu kë? Undi u de ta biibi a Jesosi? Un keiki abi sëmbë di an dë wan pisi u di goonliba aki? Nöö un keiki ta paaja di buka taa di Könuköndë u Gadu da di wan kodo tii di sa heepi libisëmbë ku dee fuka u de? U hii dee keiki dee dë a goonliba, undi u de ta du hii dee soni aki?’ Te i luku ën te i kaba, nöö dee Jehovah Kotoigi nöö ta du hii dee soni aki.—Jesaaja 43:10-12.

ANDI JOO DU?

¹⁵ Ee i kë taa Gadu feni i bunu, nöö an tjika nöö taa i ta biibi taa a dë. Di Bëibel ta taki taa dee taku jeje seei ta biibi taa Gadu dë (Jakobosi 2:19). A dë limbolimbo u si taa de an ta du di kë u Gadu, nöö Gadu an ta feni de bunu tu. Ee u kë taa Gadu feni u bunu, nöö wa musu biibi nöö taa a dë, ma u musu du di kë fëën tu. U musu kaba ku falisi biibi, nöö u musu tei di tuutuu biibi.

¹⁶ Di apösutu Paulosu bi lei u taa wa musu mökisi useei ku falisi biibi. A bi sikifi taa: "Un musu hai kumutu a dee oto sëmbë dendu. Un musu buta unu seepi apaiti da mi. Wan musu nama ku na wan soni di an dë limbolimbo e. Nöö te un libi sö kaa, nöö mi o tei unu ku wai seei”, sö Jehovah taki (2 Kolenti 6:17; Jesaaja 52:11). Fëën mbei dee tuutuu bakama u Keesitu ta koti pasi da soni di nama ku falisi biibi.

¹⁷ Di Bëibel ta lei u taa hii dee peipei fasi u falisi biibi dë wan pisi u "di Gaan Babilon” (Akoalimbo 17:5).* Di në aki ta mbei u mëni di fosuten foto u Babilon ka falisi biibi bigi baka di di Gaan Wata bi ko a di ten u Noa. Sömëni u dee soni di falisi biibi ta lei ku dee guwenti u de, kumutu u di fosuten Babilon. Dee Babilon sëmbë bi ta dini soni di bi ta djei dii gadu a wan. A di ten fuu aki, gaansë u dee keiki ta lei sëmbë taa Gadu dë dii sëmbë a wan. Ma di Bëibel ta lei u gbelingbelin taa wan kodo tuu Gadu nöö dë, Jehovah, nöö Jesosi Keesitu da di Womi Mii fëën (Johanisi 17:3). Dee Babilon sëmbë bi ta biibi söseei taa libisëmbë abi wan akaa di an sa dëdë. Di akaa dë ta libi go dou te wan sëmbë dëdë, nöö a sa tjuma u nöömö a wan faja. A di ten aki, gaansë u dee keiki ta lei sëmbë taa u abi wan akaa di an sa dëdë, nöö di sa tjuma a didibi faja.

¹⁸ U di dee lei u di fosuten Babilon paaja a hii di goonliba, mbei u sa taki taa di Gaan Babilon da hii dee falisi keiki u goonliba tuu tja ko a wan. Nöö Gadu bi taki a fesi taa hii dee falisi biibi dë o poi kaba a sösö söndö taa de dë ku ën mëni (Akoalimbo 18:8). I ta si faandi mbei a dë taanga fanöudu taa i puu iseei a hiniwan keiki di nama ku di Gaan Babilon ö? Jehovah Gadu kë taa i musu "kumutu nëën dendu” hesihesi u di nöunöu di ten dë jeti.—Akoalimbo 18:4.

¹⁹ So sëmbë an o kë ta nama ku i möön u di i kaba ku falisi biibi. Ma te i ta dini Jehovah makandi ku dee sëmbë fëën, nöö dee bunu dee i sa feni, o hia möön dee soni i bi sa lasi. Leti kuma dee fesiten bakama u Jesosi dee bi tuwë woto soni disa u waka nëën baka, sö nöö iseei o feni gaan hia baaa ku sisa a di lei. Joo ko dë wan u dee tuutuu bakama u Keesitu, hën da joo ko a wan gaan famii dendu di abi milionmilion sëmbë a hii di goonliba, di abi tuutuu lobi da de na de. Nöö joo ko abi di waiti houpu u libi u teego "a di ten di ta ko” (Maikusi 10:28-30). Kandë baka wan pisiten, dee sëmbë dee bi disa i u di biibi fii hedi, o ko lei andi di Bëibel ta lei, nöö de o toon dinima u Jehovah.

²⁰ Di Bëibel ta lei u taa abiti möön Gadu o tja wan kaba ko a di hogi goonliba aki, nöö a o buta wan njunjun goonliba nëën kamian ka hogilibi an o dë möön. Nöö di Könuköndë fëën, hën o ta tii di goonliba (2 Petuisi 3:9, 13). A o dë wan suti goonliba seei! A di njunjun goonliba dë, wan kodo biibi nöö o dë, hën da di tuutuu biibi. Di möön bunu soni di i sa du nöunöu aki hën da te i ta du dee soni dee dë fanöudu fii nama ku dee tuutuu dinima u Gadu, na sö nö?

*  Ee i kë sabi möön fini faandi mbei di Gaan Babilon da hii dee falisi keiki u goonliba tuu tja ko a wan, nöö luku Woto fanöudu soni.