Hiniwan fuu musu kai pakisei luku un së woo tei. Ee woo dini Jehovah naa woo dini Saatan ku dee taku jeje fëën. Wa sa dë a dee tu së tuu. A dë wan köni soni u dini Jehovah!

Kumafa u si, dee taku jeje lobi u tjötjö sëmbë, nöö de ta ganjan sëmbë tu. Ma na sö Jehovah dë e. A lobi libisëmbë leti kumafa wan tata lobi dee mii fëën. Hën da di Sëmbë di ta da u ’hii bumbuu soni’ (Jakobosi 1:17). An ta mombi u na wan bumbuu soni, aluwasi di soni dë o tja lasi ko dëën.​—Efeise 2:4-7.

Pakisei andi Jesosi, di Womi Mii u Gadu, bi du a goonliba aki. A bi mbei tapabukama ko ta fan, nöö a bi mbei bookowojoma ko ta si soni tu. A bi kula kököbëma ku lanma. A bi bai taku jeje puu a sëmbë liba, nöö a bi kula hiniwan sooti pei siki di sëmbë bi abi. Jesosi bi weki dëdë sëmbë seei tu ku di kaakiti u Gadu.​—Mateosi 9:32-35; 15:30, 31; Lukasi 7:11-15.

Gadu an ta du bödjëë soni, a ta konda tuutuu soni da u hii juu. An ta ganjan na wan sëmbë.​—Nöbu 23:19.

Leti kumafa adjaansi wosu ta kisi wënwën, sö Saatan ta kisi milionmilion sëmbë u biibi sösö soni ku mindimindi woto. Dee sëmbë aki ta fëëë dëdë. De ta fëëë dee taku jeje. De ta booko de hedi ku siba, maaka u soni di o pasa, tapa ku obia soni. Dee soni de ta biibi ku dee guwenti di kumutu a dee mindimindi woto u Saatan Didibi, ta kisi de hoi gingin. Na wan u dee soni aki sa kisi dee futuboi u Gadu.

Jehovah abi makiti gaanfa möön Saatan. Ee i dini Jehovah, a o tjubi i u dee taku jeje an du hogi ku i (Jakobosi 4:7). Wisi an o kisi i. Haika wan woto di bi pasa a Nigeliaköndë: Dii gaan wisima bi kai soni manda a ventu u kii wan Kotoigi u Jehovah u di an bi kë go disa de köndë. Di dee wisi u de an wooko, hën wan u dee wisima ko fëëë tee taa a go begi di Kotoigi faa dëën piimisi.

Ee dee taku jeje ta kaakei i, i sa kai Jehovah nëën në, nöö a o tjubi i (Nöngö 18:10). Ma ee i kë u Gadu tjubi i, nöö i musu disa gbelin hii soni di nama ku obia wooko ku di dini u taku jeje. Di soni dë dinima u Gadu u di awooten Efeise bi du. De bi pii hii dee obia buku u de ko zunta, hën de tjuma de fiaa puu (Tjabukama 19:19, 20). Futuboi u Gadu musu du di wan seei soni a di ten aki. Ee i abi tapa, obia tatai, limbobaka obia, piki fijëkëfijëkë, obia buku ku hii woto soni di nama ku obia wooko, nöö i musu tuwë hii dee soni dë.

Ee i kë mbei Gadu hati piizii, nöö an tjika taa i disa poipoi biibi nöö ja ta du hogi möön. Ma i musu biinga u dini Gadu a wan bumbuu fasi. Di Bëibel ta lei u andi ku andi u musu du:

Saatan ku dee taku jeje abi sëmbë a goonliba di ta lei wotowan, nöö de ta du hogi tu. Ma Jehovah abi sëmbë aki tu. De da dee Jehovah Kotoigi (Jesaaja 43:10). A pasa seibi milion Kotoigi di dë a goonliba aki. Hii de tuu ta pooba u du bunu soni, nöö de ta lei sëmbë tuutuu soni. A sömëni köndë i sa miti de a di Könuköndë zaal teka de o kisi i hoi ku wai.

Di wooko u de, hën da de ta heepi wotowan u dini Gadu. De sa lei i soni u Bëibel a i pisi, de sa heepi i fii ko sabi unfa i musu dini Jehovah a di fasi di ta kai ku ën. Ja a’ fu paka de u dee soni dë. Ku piizii dee Kotoigi ta lei sëmbë di tuutuu lei u Bëibel biga de lobi sëmbë, nöö de lobi Jehovah Gadu tu.