Di Paladëisi a goonliba
Jehovah o puu hii dee hogi soni Saatan bi du. Jehovah mbei Jesosi toon Könu u hii di goonliba. Te a o tii, a o mbei di goonliba toon wan paladëisi.—Daniëli 7:13, 14; Lukasi 23:43.
Jehovah paamusi u dee soni aki:
-
NJANJAN O DË TE A HIA: „Di goonliba seei o ta da njanjan. Gadu, di Gadu fuu, o da u bunu.” „Te a hia njanjan o fuu goonliba. A dee kuun hedi seei njanjan o dë pasa maaka.”—Psalöm 67:6; 72:16.
-
NA WAN FETI O DË MÖÖN: „Dee sëmbë o, un ko luku andi Jehovah du. Un ko luku unfa a mbei gaan foombo soni pasa a goonliba. Gadu ta mbei feti kaba a goonliba palalaa te dou.”—Psalöm 46:8, 9.
-
NA WAN TAKUHATI SËMBË O DË MÖÖN: „De o kii dee hogidu sëmbë puu . . . Wan sati pisiten nöö fika, nöö di hogi sëmbë na o dë möön. Joo luku di kamian ka a bi dë, ma an o sai dë möön.”—Psalöm 37:9, 10.
-
SIKI, TJALI, NASÖ DËDË AN O DË MÖÖN: „A di ten dë, dee wojo u dee bookowojoma o ko ta si soni, söseei dee jesi u dee bookojesima o ko ta jei soni. A di ten dë, di lanma o ta subi kuun kuma djangafutu, nöö di buka u di tapabukama o jabi, ta bai ta kai wolo u piizii hedi.”—Jesaaja 35:5, 6.
„Masa Gadu o ta libi ku libisëmbë awaa . . . nöö a o feki hiniwan u de wojowata puu. Këë an o ta kisi de möön. Dëdë ku tjali ku kusumi an o dë a de dendu möön tu. Söseei sinkii hati an o dë möön seei, kwetikweti, biga dee awoo soni dee bi dë tuu pasa go kaa.”—Akoalimbo 21:3, 4.
Jehovah an dë kuma Saatan ku dee taku jeje, an ta mindi soni. Hii soni a paamusi musu u ko tuu (Lukasi 1:36, 37). Jehovah lobi i, nöö a kë fii libi a di Paladëisi di a o mbei. Fëën mbei suku dee Jehovah Kotoigi baka fii ko sabi möön soni u dee waiti tuutuu woto dee dë a Gadu Wöutu. Ee i fiti di tuutuu lei a i libi, nöö ja o ta biibi mindimindi woto ku dee sösö soni sëmbë ta biibi möön. Söseei joo ko sabi dee fanöudu soni, nöö sëmbë an o sa feni i ganjan möön. Bakaten joo kumutu a di sitaafu u zöndu ku dëdë tu. Leti kumafa Jesosi bi taki: ’Joo sabi sondi gbelingbelin leti kumafa a dë a Gadu wojo, nöö dee soni dë o mbei i ko fii kumutu a di saafu i sai dë.’—Johanisi 8:32.
Kandë i lobi dee woto aki tu
ESSENTIAL BIBLE TEACHINGS
Andi da di Könuköndë u Gadu?
Di Jesosi bi ta du di diniwooko fëën, nöö a bi ta lei sëmbë soni u di Könuköndë u Gadu möön gaanfa. Sömëni höndöhöndö jaa kaa dee bakama fëën ta begi u di Könuköndë dë musu ko.
