Di tuutuu Gadu hën mbei hii soni. An abi wan bigi, söseei an abi wan kaba tu (Psalöm 90:2). Nëën di bunu buka di dë u feni a di Bëibel kumutu ko (1 Timoteo 1:11). U di Gadu hën da u libi, mbei hën wanwan tö u musu dini.​—Lesi Akoalimbo 4:11.

Na wan sëmbë si Gadu wan daka u di Gadu da wan jeje. Wan jeje da wan sootu pei libi di hei möön hii libilibi soni di dë a goonliba aki (Johanisi 1:18; 4:24). Ma tökuseei u sa ko sabi dee fasi u Gadu te u ta luku dee soni dee a mbei. Dee peipei fuuta ku dee peipei folo ta lei u di lobi ku di köni di Gadu abi. Di bigi di mundu bigi ta lei u fa Gadu abi kaakiti tjika.​—Lesi Loomë 1:20.

U sa ko lei sabi dee fasi u Gadu möön bunu te u ta lesi di Bëibel. A ta konda da u andi Gadu lobi ku andi an lobi, unfa a ta libi ku sëmbë ku andi a ta du te sëmbë ta du hogi nasö bunu.​—Lesi Psalöm 103:7-10.

Jesosi bi taki taa: „U Tata di dë a liba ala, be di në fii ko santa e” (Mateosi 6:9, NW). Hii fa Bëibel ta kai Gadu di Makiti Gadu u mundu nasö di Kaba Heiwan, tökuseei a abi wan kodo në nöö. A hiniwan töngö de ta kai ën woto fasi. A Saamakatöngö de guwenti u kai ën „Jehovah”. Ma so sëmbë ta kai ën „Yahweh”.​—Lesi Psalöm 83:18.

A sömëni Bëibel de puu di në u Gadu, hën de buta Masa nasö Gadu nëën kamian. Ma di de bi sikifi di Bëibel, di në u Gadu bi dë söwan 7000 pasi a di Bëibel dendu. Jesosi bi  mbei sëmbë ko sabi di në u Gadu te a bi ta lei de soni u Gadu.​—Lesi Johanisi 17:26, dee wöutu a basu.

Luku di fëlön Gadu abi wan në u?

U di pena ta miti hii sëmbë a goonliba, mbei u sa taki taa Jehovah da wan Gadu di an ta booko hën hedi ku u ö? So sëmbë ta feni taa a ta mbei u ta pena u luku andi woo du. Ma na sö a dë tuutuu e.​—Lesi Jakobosi 1:13.

Gadu ta lei u taa a ta si libisëmbë u soni u di a da u di gaandi u du andi useei kë. U ta lei taa u ta si di gaandi dë kuma wan gaan soni u di u ta tei ën u dini Gadu ö? (Josua 24:15). Ma sömëni sëmbë ta du hogi ku wotowan, nöö hën mbei hia sëmbë ta pena sö. Jehovah ta tjali seei u si fa sëmbë an ta libi ku wotowan a wan letifasi.​—Lesi Kenesesi 6:5, 6.

Jehovah da wan Gadu di ta booko hën hedi ku u. A kë fuu piizii u di libi. Abiti möön a o puu pena, söseei dee sëmbë dee ta tja pena ko. Ma a sabi bumbuu faandi mbei a ta da pasi taa pena dë u wan pisiten jeti. A Woto 8, woo ko sabi faandi mbei a da pasi.​—Lesi 2 Petuisi 2:9; 3:7, 13.

Jehovah ta kai u fuu ko zuntu ku ën u di woo ta begi ën. A ta buta pakisei a hiniwan fuu apaiti (Psalöm 65:2; 145:18). A dë kabakaba u da u paadon. A ta si dee möiti dee u ta mbei faa sa feni u bunu, aluwasi so juu u ta mbei föutu seei. Hën da hii fa u da zöndu sëmbë, tökuseei u sa ko dë gaan mati u Gadu tuutuu.​—Lesi Psalöm 103:12-14; Jakobosi 4:8.

U di Jehovah da u libi, mbei u musu lobi ën möön hii woto sëmbë (Maikusi 12:30). Te i ta lei Gadu taa i lobi ën u di i ta lei möön soni fëën, ta du andi a ta hakisi i, nöö joo ko möön zuntu ku ën.​—Lesi 1 Timoteo 2:4; 1 Johanisi 5:3.