Jesosi bi tooka u libisëmbë, u di a bi ta libi kuma wan jeje a Gadu Köndë ufö de bi pai ën a goonliba aki (Johanisi 8:23). Hën da di fosu soni di Gadu mbei, nöö a bi heepi Gadu mbei hii woto soni. Hën da di wan kodo sëmbë di Jehovah seei mbei, nöö fëën mbei a fiti taa de ta kai ën di „wan kodo” Womi Mii u Gadu (Johanisi 1:14). Jesosi bi dë kuma Basia u Gadu, nöö fëën mbei de ta kai ën „di Wöutu”.​—Lesi Nöngö 8:22, 23, 30; Kolosën 1:15, 16, NW.

Gadu bi manda di Womi Mii fëën ko a goonliba aki di a tei di libi fëën a liba ala buta go a Malia bëë dendu, wan Dju mujëë di an bi duumi ku manu wan daka. Fëën mbei Jesosi tata an bi dë libisëmbë (Lukasi 1:30-35). Jesosi bi ko a goonliba (1) u lei sëmbë dee tuutuu woto u Gadu, (2) u lei u unfa u sa waka nëën baka u du di kë u Gadu hii fa fuka ta miti u so juu, söseei (3) u da di telutelu libi fëën kuma wan „[lusu] paima”.​—Lesi Mateosi 20:28.

Wan lusupaima da wan möni di de ta paka u puu wan sëmbë a dëdë maun (Ëkisodesi 21:29, 30). An bi dë a Gadu pakisei taa sëmbë bi musu ta gaandi ta dëdë. Unfa u du sabi di soni dë? Gadu bi piki di fosu womi Adam taa ee a bi du di soni di Bëibel ta kai zöndu, nöö a bi o dëdë. Fëën mbei ee Adam an bi du zöndu an bi o dëdë (Kenesesi 2:16, 17; 5:5). Kumafa di Bëibel taki, Adam hën „tja dëdë ko” da hii  libisëmbë a goonliba. Sö wë Adam tja zöndu ko da dee bakamii fëën a goonliba, nöö di zöndu mbei de ko ta dëdë. Fëën mbei u abi wan lusupaima fanöudu u puu u a dëdë basu.​—Lesi Loomë 5:12; 6:23.

Ambë bi o sa paka wan lusupaima u puu u a dëdë basu? Te u dëdë, hën da u ta paka u dee zöndu fuu seei nöö. Na wan zöndu libisëmbë sa paka da dee zöndu u wotowan.​—Lesi Psalöm 49:7-9.

Jesosi an bi dë kuma u, ma a bi abi wan telutelu libi söndö föutu. Fëën mbei di a dëdë, an dëdë u di a du zöndu, ma a dëdë da dee zöndu u wotowan. Gadu lei taa a lobi u gaanfa seei u di a bi manda di Womi Mii fëën ko dëdë da u. Jesosi seei lei u taa a lobi u u di a piki hën Tata buka, söseei u di a da hën libi u dee zöndu fuu hedi.​—Lesi Johanisi 3:16; Loomë 5:18, 19.

Luku di fëlön Faandi mbei Jesosi dëdë?

Di Jesosi bi dë a goonliba a bi ta kula siki sëmbë, a bi ta weki dëdë sëmbë, söseei a bi da hën libi u puu sëmbë a zöndu ku dëdë basu. Dee soni a bi du dë ta lei u andi a o du a di ten di ta ko da hii libisëmbë di ta piki Gadu buka (Mateosi 15:30, 31; Johanisi 5:28). Baka di Jesosi dëdë, hën Gadu weki ën faa libi kuma wan jeje (1 Petuisi 3:18). Hën Jesosi bi go sindo a Gadu letimaun së ta wakiti u Jehovah dëën di makiti u tii kuma Könu a hii di goonliba (Hebelejën 10:12, 13). Nöunöu Jesosi dë Könu ta tii a liba ala, nöö dee bakama fëën ta paaja di bunu buka dë a hii di goonliba.​—Lesi Daniëli 7:13, 14; Mateosi 24:14.

Abiti möön Jesosi o wooko ku di makiti fëën kuma Könu u puu pena ku dee sëmbë dee ta tja pena ko. Hii dee sëmbë dee ta buta biibi a Jesosi u di de ta piki ën buka o feni di libi u teego a di paladëisi a goonliba.​—Lesi Psalöm 37:9-11.