Di Könuköndë u Gadu da wan tii di dë a Gadu Köndë ala. A o puu hii dee tii u di goonliba aki, nöö a o tii a de kamian, söseei a o mbei di kë u Gadu pasa a liba ala ku goonliba aki. A dë wan bunu buka taa Gadu o tei di Könuköndë fëën u du hii dee soni aki. Abiti möön, di Könuköndë u Gadu o mbei libisëmbë feni di bumbuu tii di de bi kë sensi ten kaa. A o mbei hii sëmbë di ta libi a goonliba ko dë wan.​—Lesi Daniëli 2:44; Mateosi 6:9, 10; 24:14.

Wan könuköndë musu abi wan könu. Jehovah buta di Womi Mii fëën, Jesosi Keesitu kuma Könu u di Könuköndë fëën.​—Lesi Akoalimbo 11:15.

Luku di fëlön Andi da di Könuköndë u Gadu?

Di Womi Mii u Gadu da di möön bunu Könu, u di a lobi sëmbë, söseei a lobi letifasi u libi (Johanisi 1:14). Nöö a abi makiti tjika u heepi sëmbë tu u di a o dë a liba ala ta tii goonliba aki. Di a toona weki baka, a hopo go a Gadu Köndë go sindo a Jehovah letimaun së ta wakiti faa dëën makiti (Hebelejën 10:12, 13). Te u kaba fëën, Gadu bi dëën makiti faa bigi tii.​—Lesi Daniëli 7:13, 14.

Wan kulupu sëmbë di de ta kai „dee santawan”, o dë a Gadu Köndë u tii makandi ku Jesosi (Daniëli 7:27). Dee fosu santawan di Gadu bi tei bi dë dee tuutuu apösutu u Jesosi. Te kuma tide Jehovah ta tei womi ku mujëë di ta hoi  deseei nëën u dë santawan. Leti kumafa Jesosi bi toona weki baka u libi kuma wan jeje, sö nöö a ta pasa ku de tu.​—Lesi Johanisi 14:1-3; 1 Kolenti 15:42-44.

Un mëni sëmbë o go a Gadu Köndë? Jesosi bi kai dee sëmbë dë wan „piki hipi” (Lukasi 12:32). Te u kaba fëën de o dë 144.000 sëmbë. De o tii di goonliba makandi ku Jesosi.​—Lesi Akoalimbo 14:1.

Di Könuköndë u Gadu bigi tii a di jaa 1914. * Di fosu soni di Jesosi du di a toon Könu, bi dë taa a vinde Saatan ku dee taku jeje fëën ko a goonliba. Saatan hati bi ko boonu seei, nöö hën mbei a bi bigi tja fuka ko a hii di goonliba (Akoalimbo 12:7-10, 12). Sensi di ten dë, hën hogi ko ta pasa ku sëmbë möön hia. Feti, gaan hangi, siki, ku goon di ta seki ta latja kamian ko dë pisi u di „maaka” di ta lei taa di Könuköndë o tii hii di goonliba.​—Lesi Lukasi 21:7, 10, 11, 31.

Di peleikiwooko di ta du a hii goonliba mbei taa di Könuköndë u Gadu, tja gaan hia sëmbë u hii peipei nasiön ko a wan nöunöu kaa. Milionmilion sakafasi sëmbë ta ko toon sëmbë di ta saka deseei a di Könuköndë u Gadu basu di Jesosi ta tii. Di Könuköndë u Gadu o tjubi de te a o poi di hogi goonliba aki. Fëën mbei hii sëmbë di kë feni bunu u di Könuköndë u Gadu musu lei u dë sëmbë di ta piki Jesosi buka.​—Lesi Akoalimbo 7:9, 14, 16, 17.

A wan pisiten u 1000 jaa, di Könuköndë o kaba du di wooko di Gadu bi abi a pakisei da libisëmbë. Hii di goonliba o ko toon wan paladëisi. Te u kaba fëën Jesosi o buta di Könuköndë nëën Tata maun dendu baka (1 Kolenti 15:24-26). I sabi wan sëmbë di i bi o kë konda soni u di Könuköndë u Gadu da u?​—Lesi Psalöm 37:10, 11, 29.