Bunuhati sëmbë dë a hii keiki. A dë wan bunu njunsu u sabi taa Gadu ta si dee lö sëmbë dë, nöö a ta booko hën hedi ku de tu. Ma a tjali taa gaansë u dee keikima, de ta du dee möön gaan hogi soni (2 Kolenti 4:3, 4; 11:13-15). Kumafa u ta jei a njunsu, nöö so keikima ta tei së ku dee sëmbë dee ta du hogihati soni u fia ku lanti u wan köndë, de ta tei së a di kii di sëmbë ta kii wan hii lö kaba, de ta tei së a di feti di köndë ta feti ku woto köndë, söseei a di pena di de ta pena piki mii ku di duumi di de ta duumi ku de. Na piki tjali a ta tja ko da dee bunuhati sëmbë dee ta biibi a Gadu!​—Lesi Mateosi 24:3-5, 11, 12.

Tuutuu biibi ta hopo di në u Gadu, ma poipoi biibi ta da Gadu sen. Poipoi biibi ta lei sëmbë soni di an sikifi a Bëibel, soni kuma dee poipoi lei di de ta lei di nama ku Gadu, ku soni u dëdë sëmbë di na tuu. Ma Jehovah kë taa sëmbë ko sabi tuutuu soni fëën.​—Lesi Ezekiëli 18:4; 1 Timoteo 2:3-5.

Kölöku taa poipoi keiki an sa ganjan Gadu taa de lobi ën, u di a dë gbelingbelin u si taa de lobi di goonliba u Saatan (Jakobosi 4:4). Di Wöutu u Gadu ta kai hii dee poipoi biibi „Di Gaan Babilon”. Babilon bi dë di awooten köndë ka poipoi biibi bi bigi baka di Gaan Wata u di ten u Noa. Abiti möön te u sëmbë kë mëni, Gadu o poi dee keiki di ta ganjan sëmbë ku di ta pena libisëmbë.​—Lesi Akoalimbo 17:1, 2, 5, 16, 17; 18:8.

 Ma woto bunu njunsu dë jeti. Jehovah an ta fëëkëtë dee bunuhati sëmbë dee dë paajapaaja a hii dee poipoi keiki u goonliba. A ta hai de puu a dee keiki dë u di a ta mbei de ko sabi di tuutuu lei fëën.​—Lesi Mika 4:2, 5.

Jehovah ta booko hën hedi ku sëmbë di kë ko sabi di tuutuu lei ku sëmbë di kë du bunu soni. A ta da de di taanga u kumutu disa poipoi keiki. Sëmbë di lobi Gadu dë kabakaba u tooka soni a de libi u mbei Gadu feni de bunu.​—Lesi Akoalimbo 18:4.

A di fosu jaahöndö, di dee bunuhati sëmbë bi jei di bunu buka a dee apösutu, nöö de bi tei ën ku wai seei. Jehovah bi lei de wan njunjun fasi u libi, wan fasi u libi di bi mbei de abi möön piizii, söseei de bi ko abi wan maaka ku wan houpu a de libi. De da bumbuu sëmbë di u sa waka a de baka a di ten aki, biga de bi tei di bunu buka u di de bi buta Jehovah a di fosu kamian a de libi.​—Lesi 1 Tesalonika 1:8, 9; 2:13.

Ku wai Jehovah ta kai dee sëmbë dee kumutu disa poipoi keiki u ko nama ku dee gaan hia dinima fëën. Ee i tei di suti kai u Jehovah, nöö joo ko dë mati ku ën, joo ko nama ku wan gaan kulupu u woto dinima u Jehovah di abi lobi, söseei joo feni teego libi tu.​—Lesi Maikusi 10:29, 30; 2 Kolenti 6:17, 18.

Di sitaafu di dee poipoi keiki o kisi da wan bunu buka u jei. A o tja böö ko a di pena di de ta pena sëmbë a hii di goonliba. Poipoi biibi an o sa ganjan sëmbë nöiti möön, söseei de an o sa paati sëmbë ku sëmbë möön tu. Hii sëmbë di o dë a libi o dë wan ta dini di wan kodo tuutuu Gadu makandi.​—Lesi Akoalimbo 18:20, 21; 21:3, 4.