Gadu bi mbei dee bakamii u di tata Abahamu ko toon wan nasiön, hën a da de wanlö wëti. A bi kai di nasiön dë „Isaëli”, nöö hën a bi da di faantiwöutu u hoi di tuutuu fasi u dini ën, söseei u hoi di Wöutu fëën (Psalöm 147:19, 20). Di nasiön u Isaëli bi o tja bunu ko da sëmbë u hii pei nasiön.​—Lesi Kenesesi 22:18.

Gadu bi tei dee Isaëli sëmbë u dë kotoigima fëën. Dee woto u de ta lei sëmbë gbelingbelin unfa de sa feni wini te de ta hoi dee wëti u Gadu (Detolonomi 4:6). Te sëmbë ta öndösuku dee woto u dee Isaëli sëmbë, nöö de sa ko sabi di tuutuu Gadu.​—Lesi Jesaaja 43:10, 12.

Bakaten Gadu an bi feni dee Isaëli sëmbë bunu möön, hën mbei Jehovah bi tei di kemeente u Keesitu sëmbë buta a de kamian (Mateosi 21:43; 23:37, 38). A di ten aki tuutuu Keesitu sëmbë di tei di kamian u dee Isaëli sëmbë, dë kuma kotoigima u Jehovah.​—Lesi Tjabukama 15:14, 17.

Jesosi bi seeka dee bakama fëën u peleiki da hii pei nasiön sëmbë, söseei u mbei de ko toon bakama fëën tu. (Mateosi 10:7, 11; 24:14; 28:19, 20). Di wooko aki ta dou di maaka fëën di a musu dou a di kaba u di goonliba aki. U di fosu pasi sensi di libisëmbë dë a goonliba, Jehovah tja milionmilion sëmbë u hii pei nasiön ko a di tuutuu biibi (Akoalimbo 7:9, 10). Tuutuu Keesitu sëmbë dë wan ku deseei u da deseei taanga, nöö de ta heepi deseei makandi tu. A hii di goonliba de ta kisi di wan seei lei u Bëibel a dee komakandi u de.​—Lesi Hebelejën 10:24, 25.

Di ölganisaasi u Jehovah Kotoigi u di ten aki bigi a dee jaa baka di jaa 1870. Wan piki kulupu u Bëibel leima bi bigi tja dee tuutuu lei u Bëibel ko a limbo baka, di de an bi dë u jei möön. De bi sabi taa Jesosi bi seti di kemeente u Keesitu sëmbë u peleiki, hën mbei de bi bigi peleiki a hii di goonliba. A di jaa 1931, de bi tei di në Jehovah Kotoigi.​—Lesi Tjabukama 1:8; 2:1, 4; 5:42.

A di fosu jaahöndö, dee Keesitu kemeente a sömëni köndë bi ta feni wini u di tii di wan kulupu u baaa bi ta tii di wooko ku di bi ta si Jesosi kuma di Hedima u di kemeente (Tjabukama 16:4, 5). Sö nöö a di ten aki Jehovah Kotoigi a hii goonliba ta feni wini u di tii di wan kulupu u baaa di sabi soni, ta tii di wooko. Di kulupu u baaa dë u ta kai di Tii Kulupu. De ta luku hii dee bëikantoo u Jehovah Kotoigi di ta puu buku ko a woto töngö, di ta doloki buku, söseei di ta paati buku u lei soni u Bëibel di dë a möön leki 600 töngö. Fëën mbei di Tii Kulupu sa da sëmbë u möön leki 100.000 kemeente a hii goonliba degihati di kumutu u di Bëibel ku Bëibel lai fa de musu du soni. A hii dee kemeente aki, womi sëmbë di dou dee maaka, ta dini kuma gaanwomi u kemeente. Dee womi aki ta booko de hedi a wan lobihati fasi ku dee sëmbë u Gadu di dë kuma sikapu fëën.​—Lesi 1 Petuisi 5:2, 3.

Jehovah Kotoigi seti u paaja di bunu buka, söseei u mbei sëmbë toon bakama u Jesosi. Leti kumafa dee apösutu bi ta peleiki a hii wosu, sö nöö u nango ta peleiki a hii wosu a di ten aki tu (Tjabukama 20:20). U seei dë kabakaba u lei bunuhati sëmbë di lobi dee tuutuu lei u Gadu, soni a Bëibel. Ma Jehovah Kotoigi an dë wan ölganisaasi nöö. U dë wan famii di abi wan lobihati Tata. U da baaa ku sisa di ta booko u hedi ku wotowan (2 Tesalonika 1:3). U di dee sëmbë u Jehovah seti u du soni di a feni bunu ku u di de seti u heepi wotowan, mbei de dë di möön piizii famii u hii di goonliba.​—Lesi Psalöm 33:12; Tjabukama 20:35.