Di Gadu di mbei u köni möön u. Leti kumafa wan lobihati tata ta booko hën hedi ku dee mii fëën, sö nöö Gadu dë wan tata di ta booko hën hedi ku u. Söseei an bi mbei u fuu tii useei (Jelemia 10:23). Leti kumafa wan mii abi di tii fëën mama ku ën tata fanöudu, sö nöö hii u tuu abi di tii u Gadu fanöudu (Jesaaja 48:17, 18). Dee wëti u Bëibel ta tii u, nöö di tii dë, dë kuma wan kado di Gadu da u.​—Lesi 2 Timoteo 3:16.

Dee wëti u Jehovah ta lei u di möön bunu fasi u libi a di ten aki, söseei de ta lei u andi u sa du u feni di libi u teego a di ten di ta ko. U di Gadu hën mbei u, mbei a fiti taa u musu dë ku tangi a hati u di fasi fa a ta tii u.​—Lesi Psalöm 19:7, 11; Akoalimbo 4:11.

So u dee möön fanöudu lei u Bëibel ta lei u andi Gadu kë fuu du a so okasi. Ma Bëibel abi wëti tu di ta taki gbelingbelin u so soni di u musu du (Detolonomi 22:8). U musu abi di köni u sa fusutan andi wan lei u Bëibel kë taki, söseei unfa u sa fiti ën a u libi (Nöngö 2:10-12). Wë di Bëibel ta lei u taa di libi dë wan kado di Gadu da u. Di fanöudu lei aki sa tii u te u dë a wooko, a wosu, söseei te u nango a wan kamian. A ta heepi u fuu luku bunu ku di libi fuu, söseei ku di libi u wotowan.​—Lesi Tjabukama 17:28.

Jesosi bi taki u dee tu möön fanöudu wëti. Di fosuwan ta tja ko a limbo taa Gadu mbei  libisëmbë u ko sabi ën, u lobi ën, söseei u dini ën ku hii de hati. Nöö di fosu wëti musu dë u si a hii dee soni dee u ta buta taa woo du (Nöngö 3:6). Dee sëmbë dee ta hoi di wëti aki sa ko dë mati ku Gadu, de o feni tuutuu piizii, nöö de o feni teego libi tu.​—Lesi Mateosi 22:36-38.

Di u tu wëti sa heepi u fuu ta libi bunu ku wotowan (1 Kolenti 13:4-7). Te u ta hoi di u tu wëti aki, hën da u ta libi ku sëmbë kumafa Jehovah ta libi ku de.​—Lesi Mateosi 7:12; 22:39, 40.

Dee wëti u Gadu ta lei sëmbë u wan wosudendu unfa lobi sa mbei de ko dë wan (Kolosën 3:12-14). Söseei Gadu Wöutu ta tjubi sëmbë u wan wosudendu u di a ta taki u wan woto fanöudu wëti di musu tii u. Di wëti dë ta taki taa di toou libi musu dë u nöömö.​—Lesi Kenesesi 2:24.

Te u ta libi kumafa di Bëibel ta lei u, nöö a o tjubi u ku dee soni u abi, söseei a o mbei u ta fii bunu. Wë sö a dë taa so basi ta suku wookoma di ta hoi dee wëti u Gadu, wëti di ta lei de taa de an musu fufuu, söseei taa de an musu malëngë (Nöngö 10:4, 26; Hebelejën 13:18). Di Wöutu u Gadu ta lei u taa u musu dë tifihedi ku dee soni di u abi fanöudu u tan a libi, söseei taa u musu si di matifasi fuu ku Gadu taa a dë di möön gaan fanöudu soni möön gudu.​—Lesi Mateosi 6:24, 25, 33; 1 Timoteo 6:8-10.

Te u ta hoi dee wëti u Bëibel, nöö de sa heepi u u dë gösöntu (Nöngö 14:30; 22:24, 25). Kuma te u ta hoi di wëti u Gadu taa wa musu bebe dööngö, nöö a ta tjubi u da siki di sa kii u, ku gaan makei di u sa kisi (Nöngö 23:20). Jehovah ta da u pasi taa u sa bebe daan, ma wa musu bebe ën pasa maaka (Psalöm 104:15; 1 Kolenti 6:10). Dee wëti u Gadu ta tja wini ko da u u di de ta lei u taa na ku dee soni di u ta du nöö u musu ta luku bunu, ma u musu luku bunu söseei ku dee soni dee u ta pakisei (Psalöm 119:97-100). Hën mbei tuutuu Keesitu sëmbë an ta lesipeki dee wëti u Gadu u di de kë wini da deseei nöö, ma de ta du sö u tja gafa ko da Jehovah.​—Lesi Mateosi 5:14-16.