Jehovah da womi ku mujëë di goonliba u de sa libi nëën. Hën da di tankamian fuu. Fëën mbei Gadu an bi mbei di fosu womi ku ën mujëë, Adam ku Eva, u de pai miii fuu Gadu Köndë, biga Gadu bi mbei engel u libi ku ën ala kaa (Jöpu 38:4, 7). Ma Gadu bi tei di fosu womi, hën a butëën a wan hanse paladëisi di a bi kai di djai u Eden (Kenesesi 2:15-17). Jehovah bi da Adam ku dee bakamii fëën di houpu u ta piizii u di libi nango nöömö a goonliba.​—Lesi Psalöm 37:29; 115:16.

Bigibigi di djai u Eden nöö bi dë wan paladëisi. Di fosu womi ku ën mujëë bi musu pai miii fuu di goonliba. Te u kaba fëën, de bi musu dë basi u hii di goonliba, nöö de bi musu mbei a ko toon wan paladëisi tu (Kenesesi 1:28). Di goonliba an o poi wan daka. A o dë di tankamian u libisëmbë u nöömö.​—Lesi Psalöm 104:5.

Luku di fëlön Faandi mbei Gadu mbei di goonliba?

Adam ku Eva bi pasa Gadu buka, hën Jehovah puu de a di djai u Eden. De bi lasi di Paladëisi, nöö na wan sëmbë bi sa toona seti ën baka. Di Bëibel ta taki taa: „A disa goonliba a dee hogi sëmbë maun.”​—Jöpu 9:24.​—Lesi Kenesesi 3:23, 24.

Jehovah fëëkëtë di soni di a bi abi a pakisei a di bigi da libisëmbë u? Nönö! A abi hii makiti. Hii soni a taki ta pasa tuutuu (Jesaaja 45:18). A o mbei libisëmbë lö ko dë baka kumafa a bi kë sensi di bigi.​—Lesi Psalöm 37:11, 34.

Di Paladëisi o toona seti baka te Jesosi o ta tii kuma di Könu di Gadu buta. A di feti de ta kai Amagedon, Jesosi  o mbei dee engel u Gadu kii hii dee sëmbë dee an ta piki Gadu buka. Baka di dë, Jesosi o söötö Saatan 1000 jaa longi. Dee sëmbë u Gadu o kumutu libilibi u di Jesosi o tii de, söseei a o tjubi de. De o piizii u libi u teego a di Paladëisi di o dë a goonliba aki.​—Lesi Akoalimbo 20:1-3; 21:3, 4.

Na un ten Gadu o puu hogi a goonliba? Jesosi bi da „wan maaka” u lei na un ten di kaba bi o zuntu. Di fasi fa soni ta waka a goonliba ta mbei libisëmbë ta dëdë, nöö a ta lei u taa u ta libi a ’di ten u di kaba’.​—Lesi Mateosi 24:3, 7-14, 21, 22.

A di pisiten u dee 1000 jaa di Jesosi o dë a Gadu Köndë ta tii di goonliba, a o puu hii pena (Jesaaja 9:6, 7; 11:9). Boiti taa Jesosi o tii kuma Könu, a o wooko kuma Kaba Hei Mindima, nöö a o puu dee zöndu u dee sëmbë dee lobi Gadu. Gadu buta Jesosi u puu siki, gaandi ku dëdë.​—Lesi Jesaaja 25:8; 33:24.

Dee sëmbë dee ta piki Gadu buka o libi a di Paladëisi (1 Johanisi 2:17). Jesosi bi manda dee bakama fëën go suku sëmbë di abi sakafasi, nöö de bi musu lei de andi de bi musu du u Gadu bi sa feni de bunu. A di ten aki, Jehovah ta seeka milionmilion sëmbë u de sa libi a di Paladëisi di o dë a goonliba aki (Sefanja 2:3). A dee Könuköndë zali u Jehovah Kotoigi, sëmbë ta lei u ko dë möön bunu manu, möön bunu tata, söseei u ko dë möön bunu mujëë ku möön bunu mama. Mama ku tata ku miii tuu ta dini Gadu makandi, söseei de ta lei ko sabi fa de sa feni wini u di bunu buka.​—Lesi Mika 4:1-4.