WOTO 10
Unfa i sa ko sabi di tuutuu biibi?
1. Wan kodo tuutuu biibi nöö dë u?
„Un musu mëni unu seei bunu ku dee sëmbë dee ta waka ta ganjan sëmbë taa de ta tja Gadu buka.”—MATEOSI 7:15.
Jesosi bi lei dee bakama fëën soni u wan kodo biibi nöö, di tuutuu biibi. A dë kuma wan pasi di ta tja sëmbë go feni teego libi. Jesosi bi taki taa: „biti sëmbë ta feni” di pasi dë (Mateosi 7:14). Di fasi u dini di ta kai ku di Wöutu u Gadu, di Bëibel, hën nöö Gadu ta feni bunu. Hii dee tuutuu dinima u Gadu abi di wan seei biibi.—Lesi Johanisi 4:23, 24; 14:6; Efeise 4:4, 5.
Luku di fëlön Gadu ta wai ku hii dee peipei fasi fa sëmbë ta dini ën u?
2. Andi Jesosi bi taki u dee ganjanganjan Keesitu sëmbë?
„Dee lö sëmbë dë taa de sabi Masa Gadu, ma i ta si a di libi u de taa na tuu seei.”—TITUSI 1:16.
Jesosi bi taki taa ganjanganjan tjabukama bi o poi di tuutuu lei u dee tuutuu Keesitu sëmbë. A ta djei kuma de dë tuutuu dinima u Gadu. De ta bai taa dee keiki u de da tuutuu Keesitu sëmbë keiki. Ma i sa ko sabi ambë de dë tuutuu. Unfa sö? Wë di tuutuu biibi nöö ta mbei sëmbë ko toon tuutuu Keesitu sëmbë di abi bumbuu fasi ku di ta tja deseei a wan fasi di fiti, di woto sëmbë ta si gbelingbelin.—Lesi Mateosi 7:13-23.
3. Unfa i sa ko sabi dee tuutuu dinima u Gadu?
Buta pakisei a dee feifi maaka aki di sa mbei i ko sabi de:
-
Tuutuu dinima u Gadu ta lesipeki di Bëibel taa a dë di Wöutu u Gadu. De ta mbei taanga möiti u libi ku dee mama wëti fëën. Fëën mbei di tuutuu biibi tooka u woto biibi di ta wooko ku libisëmbë pakisei (Mateosi 15:7-9). Tuutuu dinima u Gadu ta fiti dee soni di de ta peleiki da wotowan a deseei libi.—Lesi Johanisi 17:17; 2 Timoteo 3:16, 17.
-
Dee tuutuu bakama u Jesosi ta bigi Gadu në, Jehovah. Jesosi bi bigi Gadu në u di a bi mbei sëmbë ko sabi di në. A bi ta heepi sëmbë u ko sabi Gadu, söseei a bi lei de u begi be di në u Gadu ko santa (Mateosi 6:9). Un pei keiki ta mbei sëmbë ko sabi di në u Gadu a di kamian ka i ta libi?—Lesi Johanisi 17:26; Loomë 10:13, 14.
-
Tuutuu Keesitu sëmbë ta peleiki di Könuköndë u Gadu. Gadu bi manda Jesosi ko u paaja di bunu buka u di Könuköndë. Di Könuköndë u Gadu da di wan kodo houpu da libisëmbë. Jesosi bi konda soni fëën te dou di daka di a dëdë (Lukasi 4:43; 8:1; 23:42, 43). A bi taki taa dee bakama fëën bi o paaja di buka u di Könuköndë tu. Ee wan sëmbë ko ta konda soni u di Könuköndë u Gadu da i, nöö na undi u dee keiki joo pakisei wante taa a dë?—Lesi Mateosi 24:14.
-
Bakama u Jesosi an dë wan pisi u di hogi goonliba aki. I sa ko sabi de u di de an ta nama ku politiki nasö ku feti di sëmbë ta feti u seeka köndë (Johanisi 17:16; 18:36). Söseei de an ta libi kuma dee sëmbë u di goonliba aki di ta du hogi soni ku di abi taku fasi.—Lesi Jakobosi 4:4.
-
Tuutuu Keesitu sëmbë abi tuutuu lobi da de na de. De lei a di Wöutu u Gadu taa de musu lesipeki hii pei lö sëmbë. Sëmbë u poipoi keiki ta da maun u heepi köndë feti ku woto köndë, ma tuutuu dinima u Gadu an ta du sö (Mika 4:1-3). Ma tuutuu Keesitu sëmbë dë woto fasi u di de ta tei de ten ku dee gudu de abi u heepi wotowan, söseei u da de taanga.—Lesi Johanisi 13:34, 35; 1 Johanisi 4:20.
4. I sa si di tuutuu biibi sabi ö?
Un pei keiki ta lei sëmbë soni di kumutu a di Wöutu u Gadu, ta bigi Gadu në nasö ta peleiki di Könuköndë u Gadu kuma di wan kodo houpu da libisëmbë? Un pei kulupu sëmbë i sabi di lobi wotowan ku di an ta hulu ku feti? Undi u de i pakisei?—Lesi 1 Johanisi 3:10-12.
