Gadu ta kai hii pei sëmbë u begi ën u de sa ko zuntu ku ën (Psalöm 65:2). Ma an ta haika hii begi. Te wan womi an ta libi bunu ku ën mujëë, nöö a sa mbei taa Gadu an haika dee begi fëën (1 Petuisi 3:7). Söseei te dee Isaëli sëmbë bi ta du dee zöndu u de nango nöömö, nöö Jehovah an bi ta haika dee begi u de. Ma aluwasi sëmbë du gaan zöndu seei, tökuseei Gadu o haika dee begi u de te de ta tjali u dee zöndu di de bi du. U ta fusutan gbelingbelin taa di begi di u ta begi Gadu da wan gaandi di u abi.​—Lesi Jesaaja 1:15; 55:7.

Luku di fëlön Gadu ta haika hii begi ö?

Begi da wan pisi u di dini di u ta dini Gadu, nöö fëën mbei Jehovah wanwan tö nöö u musu ta begi, u di hën mbei u (Mateosi 4:10; 6:9). U di u da zöndu libisëmbë, mbei u musu ta begi a di në u Jesosi biga a dëdë u dee zöndu fuu hedi (Johanisi 14:6). Jehovah an kë taa te u ta begi ën, nöö u ta taki di wan soni nöömö di u lei a hedi nasö di u sikifi buta a pampia liba. A kë fuu ta begi ën ku hii u hati.​—Lesi Mateosi 6:7; Filipi 4:6, 7.

Di Gadu di mbei u, sa jei te u ta begi ën a u hati dendu seei tu (1 Samuëli 1:12, 13). A kë fuu begi ën a hii okasi, kuma te u weki a mamate ku te u nango duumi a ndeti, söseei te woo njan, ku te fuka ta miti u.​—Lesi Psalöm 55:22; Mateosi 15:36.

A dë wan taanga soni u ko zuntu ku Gadu, u di u ta libi a sëmbë mindi di an ta biibi Gadu ku di ta wisiwasi di paamusi fëën taa a o tja fii ko a goonliba (2 Timoteo  3:1, 4; 2 Petuisi 3:3, 13). Fëën mbei u abi degihati u woto baaa ku sisa fanöudu, nöö de seei abi u fanöudu tu.​—Lesi Hebelejën 10:24, 25.

Di nama di u ta nama ku sëmbë di lobi Gadu ta heepi u u ko zuntu ku Gadu. Dee komakandi u Jehovah Kotoigi ta heepi u u feni taanga u di biibi u wotowan.​—Lesi Loomë 1:11, 12.

I sa ko zuntu ku Jehovah te i ta pakisei fundu u dee soni dee i lei a di Wöutu fëën. Pakisei andi i sa lei u dee soni a du, dee lai a ta da u, ku dee paamusi fëën. Te u ta pakisei fundu u dee soni aki ku te u ta begi Gadu faa heepi u fuu ko fusutan dee soni aki möön bunu, nöö woo dë ku tangi a hati da di lobi ku di köni u Gadu.​—Lesi Josua 1:8; Psalöm 1:1-3.

Te i ta futoou Gadu ku te i ta biibi ën ufö i sa ko zuntu ku ën. Biibi dë kuma wan soni di i paandi di i musu ta sölugu faa göö bunu. Sö a dë taa hii juu i musu ta sölugu di biibi fii u di joo ta pakisei baka andi bi mbei taa i bi ko abi sö wan biibi.​—Lesi Mateosi 4:4; Hebelejën 11:1, 6.

Jehovah ta booko hën hedi ku dee sëmbë dee lobi ën. A sa tjubi de da hii soni di bi sa poi di biibi u de ku di houpu di de abi u libi teego (Psalöm 91:1, 2, 7-10). A ta bai u fuu luku bunu ku fasi u libi di sa mbei wa dë gösöntu möön ku di sa mbei taa wa ta piizii möön tu. Jehovah ta lei u di möön bunu fasi u libi.​—Lesi Psalöm 73:27, 28; Jakobosi 4:4, 8.