WOTO 6
Un houpu dë da dee dëdë sëmbë?
1. Un bunu buka nama ku dee dëdë sëmbë?
Di Jesosi bi dou a di foto Betania di dë zuntu ku Jelusalen, nöö hën mati Lazalosi bi dëdë fö daka kaa. Baka di dë Jesosi bi go a di geebi ku Maita ku Malia, dee sisa u di womi di dëdë. Te u de kë mëni, wanlö gaan hia sëmbë bi ko zunta a di kamian. Pakisei fa Maita ku Malia bi wai seei di Jesosi weki Lazalosi ko a libi baka!—Lesi Johanisi 11:21-24, 38-44.
Maita bi sabi di bunu buka di bi taki u dee dëdë sëmbë taa de o weki baka. A bi sabi taa Jehovah o toona weki dee dëdë sëmbë u de sa libi a goonliba baka.—Lesi Jöpu 14:14, 15.
2. Andi ta pasa ku wan sëmbë te a dëdë?
Gadu bi piki Adam taa: „Doti mi bi tei mbei i, nöö a goondoti joo toona go baka.”—KENESESI 3:19.
Libisëmbë mbei ku doti (Kenesesi 2:7; 3:19). U kuma libisëmbë an abi wan akaa, nöö na wan soni dë a libisëmbë sinkii dendu di ta libi go dou baka te de dëdë. Te wan sëmbë dëdë, nöö di töönzön fëën an ta wooko möön, söseei dee pakisei fëën ta lasi go. Fëën mbei Lazalosi an bi taki na wan soni di a miti di a dëdë, biga dee dëdë sëmbë an sabi na wan hojo soni möön.—Lesi Psalöm 146:4; Pleikima 9:5, 6, 10.
Gadu ta tjuma sëmbë ku faja baka te de dëdë u? U di di Bëibel ta lei taa dëdë sëmbë an sabi na wan hojo soni möön, mbei di lei di de ta lei taa sëmbë nango tjuma a didibi faja da wan lei di ta poi Gadu në. An ta ko a Gadu pakisei seei u tjuma sëmbë a faja, biga a dë wan soni di a ta buuse.—Lesi Jelemia 7:31.
Luku di fëlön Andi ta pasa ku wan sëmbë te a dëdë?
3. Dee dëdë sëmbë sa fan ku u ö?
Dee dëdë sëmbë an sa fan, söseei de an sa jei na wan soni tu (Psalöm 115:17). Ma so u dee engel abi hogihati, de sa fan ku sëmbë, nöö de ta du kuma de da dee sëmbë di dëdë (2 Petuisi 2:4). Jehovah an kë fuu pooba u fan ku dëdë sëmbë.—Lesi Detolonomi 18:10, 11.
4. Ambë ku ambë o toona weki baka?
Sömëni milion sëmbë di dëdë o toona weki baka u libi a goonliba aki. Söseei sëmbë di an bi sabi Gadu ku di bi ta du hogi o toona weki baka tu.—Lesi Tjabukama 24:15.
Sëmbë di o toona weki baka o kisi di okasi u ko lei dee tuutuu woto u Gadu, söseei u lei taa de ta biibi a Jesosi u di de ta piki ën buka (Akoalimbo 20:11-13). Dee sëmbë dee o toona ko a libi baka, nöö di o ta du bunu soni, o libi u teego a goonliba.—Lesi Johanisi 5:28, 29.
5. Andi di wekibaka ta lei u u Gadu?
Di manda di Gadu bi manda di Womi Mii fëën ko dëdë da u, hën jabi di pasi da dëdë sëmbë u de sa toona ko a libi baka. Hën da di wekibaka ta lei u taa Jehovah lobi u, söseei taa a abi bunuhati fuu tu. Un sëmbë fii di dëdë i bi o kë si te dee dëdë sëmbë o toona weki baka?—Lesi Johanisi 3:16; Loomë 6:23.
