WOTO 03
I sa biibi dee soni dee sikifi a di Bëibel ö?
Di Bëibel paamusi u sömëni soni, nöö a abi sömëni lai. Kandë i kë sabi seei andi da dee soni dee a ta lei u, ma kandë i ta hakisi iseei ee dee soni dee sikifi nëën da soni di i sa biibi tuutuu. I sa biibi dee soni dee sö wan gaandi buku paamusi u ö, söseei i sa biibi dee lai dee sikifi nëën u? I sa biibi tuutuu te di Bëibel ta taki taa woo sa abi wan bunu libi nöunöu kaa, söseei a di ten di ta ko u? Milionmilion sëmbë ta biibi dee soni aki. Boo luku ee iseei sa biibi de tu.
1. Dee soni dee sikifi a di Bëibel da tuutuu soni ö?
Di Bëibel seei ta taki taa dee soni dee sikifi nëën da „tuutuu soni” (Peleikima 12:10). A ta taki u tuutuu soni di bi pasa, nöö dee sëmbë dee bi dë a dee woto bi dë tuutuu sëmbë tu. (Lesi Lukasi 1:3; 3:1, 2.) Gaansë u dee sëmbë dee ta sikifi soni fu awooten ku dee ta öndösuku soni fu awooten ta taki taa dee soni dee sikifi a di Bëibel dë sö tuutuu. De ta taki tu taa dee sëmbë ku dee kamian di kai a di Bëibel bi dë tuutuu.
2. Faandi mbei u sa taki taa di Bëibel an gaandi poi?
Sömëni pasi di Bëibel bi taki u soni di sëmbë an bi sabi a di pisiten di de bi ta sikifi ën. A ta taki u soni di könima ko sabi. Sömëni sëmbë an bi ta biibi dee soni di di Bëibel bi taki u dee soni dë. Ma dee könima u di ten aki taki taa dee soni di di Bëibel taki dë sö tuutuu. Hii juu i sa biibi dee soni dee sikifi nëën.—Psalöm 111:8.
3. Faandi mbei u sa biibi dee soni di di Bëibel ta taki u di ten di ta ko?
Di Bëibel abi tjabukama woto a di ta taki u soni di an pasa jeti (Jesaaja 46:10). Di Bëibel bi taki finifini u so soni di bi o pasa gaanduwe a fesi, nöö de bi pasa tuutuu. Di Bëibel ta taki finifini u di fasi fa soni bi o dë a di ten fuu aki tu. A di woto aki woo luku wantu tjabukama woto u Bëibel. Di fasi fa de pasa tuutuu o foondo i seei!
WOTO SONI DI I SA LEI
Luku unfa dee soni di könima ko sabi ta kai ku di Bëibel, nöö öndösuku wantu u dee tjabukama woto u Bëibel luku.
4. Dee soni dee könima ko sabi ta kai ku di Bëibel
Fosufosu nöö gaansë u dee sëmbë bi ta biibi taa di goonliba ta hëngi a wan soni. Pëë di FËLÖN.
Luku andi bi sikifi a di buku Jöpu söwan 3500 jaa pasa. Lesi Jöpu 26:7, nöö piki di hakisi aki:
-
Unfa Jöpu bi du ko sabi taa di goonliba ’an hëngi a na wan soni’, nöö andi di soni aki ta lei u?
Söwan 200 jaa pasa, hën libisëmbë bi ko fusutan taa di sonu ta hai di wata a goonliba aki tja go a liba ala, nöö di wata dë ta toona kai ko a goonliba aki kuma tjuba. Tökuseei luku andi di Bëibel bi taki söwan 3500 jaa pasa. Lesi Jöpu 36:27, 28, nöö piki dee hakisi aki:
-
Unfa i feni di soni di di Bëibel ta taki u di fasi fa di wata nango a liba ala ta toona ko a goonliba aki?
-
Dee tëkisi dee i lesi djunsu dë mbei i ko ta möön biibi dee soni dee sikifi a di Bëibel ö?
5. Di Bëibel bi taki a fesi u gaangaan soni di bi o pasa
Lesi Jesaaja 44:27–45:2, nöö piki di hakisi aki:
-
Andi di Bëibel bi taki finifini fëën söwan 200 jaa a fesi u di booko di de bi o booko di foto Babilon kaba a sösö?
Dee soni di de sikifi fu awooten ta lei taa Könu Silosi u Pëlsia ku dee sodati fëën bi wini di foto Babilon tei a di jaa 539 Bifö Keesitu. De bi mbei di wata u di lio di bi lomboto di foto kule go a wan woto së. Baka di dë, hën de denda go a di foto u di dee gaan döö bi dë jabijabi, hën de wini di foto tei söndö u de feti. Nöunöu a pasa söwan 2500 jaa di di foto Babilon dë bookobooko. Luku andi di Bëibel bi taki a fesi.
Lesi Jesaaja 13:19, 20, nöö piki di hakisi aki:
-
Unfa di soni di pasa ku di foto Babilon ta lei taa di tjabukama woto aki pasa tuutuu?
6. Di Bëibel bi taki a fesi u dee soni dee u ta si ta pasa a di ten aki
Di Bëibel ta kai di ten fuu aki „dee lasiti daka” (2 Timoteo 3:1). Luku andi di Bëibel bi taki a fesi u di ten fuu aki.
Lesi Mateosi 24:6, 7, nöö piki di hakisi aki:
-
Unfa di Bëibel bi taki taa soni bi o dë a dee lasiti daka?
Lesi 2 Timoteo 3:1-5, nöö piki dee hakisi aki:
-
Un fasi di Bëibel taki taa sëmbë bi o abi a dee lasiti daka?
-
Undi u dee fasi aki i ta si a sëmbë a di pisiwata ka i ta libi?
SO SËMBË TA TAKI TAA: „Libisëmbë hën sikifi di Bëibel.”
-
Andi ii bi o taki taa da di möön gaan soni di ta lei taa di Bëibel ta taki tuutuu soni?
ANDI I LEI?
Dee soni di de sikifi fu awooten, dee soni di könima öndösuku, ku dee tjabukama woto, ta lei i taa i sa biibi dee soni dee sikifi a Bëibel.
Andi i bi o piki?
-
Di Bëibel ta taki u soni di pasa tuutuu ö?
-
Andi da wantu soni di könima ko sabi di ta kai ku di Bëibel?
-
I si kuma di Bëibel ta taki a fesi andi o pasa a di ten di ta ko u? Faandi mbei i taki sö?
WOTO SONI DI I SA LUKU
Soni sikifi a di Bëibel di an ta kai ku dee soni di könima ko sabi ö?
„Bijbel e taki den srefi sani di sabiman e taki?” (Woto a di website fuu)
Andi da wantu soni di ta lei taa u ta libi a dee „lasiti daka”?
„6 Bijbel profeititori di e kon tru” (A Waktitoren, 1 u sebitaa-liba 2011)
Di fëlön aki ta lei unfa dee tjabukama woto u Bëibel dee bi nama ku Giikiköndë bi pasa tuutuu.
Di woto aki ta lei unfa dee tjabukama woto u Bëibel bi heepi wan womi faa tooka di fasi fa a bi ta si di Bëibel.
„Mi no ben e bribi taki wan Gado de” (A Waktitoren, Nö. 5 2017)
a Tjabukama woto da bosikopu di kumutu a Gadu, di ta taki u soni di o pasa a di ten di ta ko.