WOTO 08
I sa ko dë Jehovah mati
Jehovah kë fii ko sabi ën möön bunu. Faandi mbei? A kë taa i musu ko sabi dee fasi fëën, di fasi fa a ta du soni, ku dee soni dee a abi a pakisei u du. Nöö di soni dë o mbei joo kë ko dë wan mati fëën. I sa ko dë wan mati u Gadu tuutuu ö? (Lesi Psalöm 25:14.) Andi i sa du fii sa ko dë wan mati u Gadu? Di Bëibel ta piki dee hakisi aki, nöö a ta lei u faandi mbei Jehovah da di möön bunu Sëmbë di u sa tei kuma mati.
1. Andi Jehovah kë taa i musu du?
„Ko zuntu u Gadu, nöö a o ko zuntu fii tu” (Jakobosi 4:8). Andi di soni dë kë taki? Jehovah ta kai i fii ko dë wan mati fëën. So sëmbë an ta biibi taa de sa dë mati u Gadu, u di de an ta si ën. Ma a di Wöutu fëën di Bëibel, Jehovah ta piki u hii soni di u musu ko sabi u dee fasi fëën, fuu sa ko zuntu ku ën. Te u a ta lesi di Bëibel, nöö u ku Jehovah o ko dë möön gaan mati, hii fa wa si ën wan daka.
2. Faandi mbei Jehovah da di möön bunu mati di i sa abi?
Na wan sëmbë lobi i sö kumafa Jehovah lobi i. A kë fii ta dë waiwai, nöö a kë fii ta hakisi ën faa heepi i ku hiniwan soni di i abi fanöudu. I sa ’tuwë hii dee fuka fii da Gadu, biga a ta booko hën hedi ku i’ (1 Petuisi 5:7). Hii juu Jehovah ta dë kabakaba u heepi dee mati fëën, u da de kötöhati, söseei u haika de.—Lesi Psalöm 94:18, 19.
3. Andi u musu du ee u kë ko dë Jehovah mati?
Jehovah lobi hii sëmbë, „ma a dë gaan mati ku dee bunuhati sëmbë” (Nöngö 3:32). Jehovah kë taa dee mati fëën musu ta mbei möiti u ta du bunu soni, nöö de buuse soni di a ta buuse. So sëmbë ta si kuma nöiti de an o sa hoi hii dee wëti u Jehovah. Ma Jehovah sabi andi u sa du ku andi wa sa du. A ta dë mati ku hiniwan sëmbë di lobi ën tuutuu, söseei di ta mbei möiti u du soni di ta kai ku ën.—Psalöm 147:11; Tjabukama 10:34, 35.
WOTO SONI DI I SA LEI
Boo luku woto soni di sa heepi i fii ko dë wan mati u Jehovah, söseei joo si faandi mbei hën da di möön bunu mati di i sa abi.
4. Abahamu bi dë Jehovah mati
Di woto u Abahamu (di de bi ta kai Abam tu) di dë a Bëibel, ta lei u andi a kë taki u dë wan mati u Gadu. Lesi di woto u Abahamu a Kenesesi 12:1-4, nöö piki dee hakisi aki:
-
Andi Jehovah bi hakisi Abahamu faa du?
-
Andi Jehovah bi paamusi Abahamu?
-
Andi Abahamu bi du di Jehovah hakisi ën di soni dë?
5. Andi Jehovah ta hakisi dee mati fëën u de du?
U ta tei ën u bigi te dee mati fuu ta du soni da u.
-
Unfa i bi o kë u dee mati fii libi ku i?
Lesi 1 Johanisi 5:3, nöö piki di hakisi aki:
-
Andi Jehovah ta hakisi dee mati fëën u de du?
Ee u kë piki Jehovah buka, nöö u musu tooka di fasi fa u ta tja useei nasö dee fasi fuu. Lesi Jesaaja 48:17, 18, nöö piki di hakisi aki:
-
Faandi mbei Jehovah kë u dee mati fëën piki hën buka?
Wan bunu mati o ta piki u soni fuu du di o tja wini ko da u, söseei di o heepi u u hogi an miti u. Di wan seei soni Jehovah ta du ku dee mati fëën
6. Dee soni di Jehovah ta du u heepi dee mati fëën
Jehovah ta heepi dee mati fëën u de sabi unfa de musu libi ku dee bookohedi u de. Pëë di FËLÖN, nöö piki di hakisi aki.
-
Unfa Jehovah bi heepi di mujëë a di fëlön te pakisei bi ta möön ën, söseei unfa a bi heepi ën faa bi sa ko dë bööböö?
Lesi Jesaaja 41:10, 13, nöö piki dee hakisi aki:
-
Andi Jehovah paamusi taa a o du da hii dee mati fëën?
-
I si kuma Jehovah sa ko dë wan bunu mati fii ö? Faandi mbei i taki sö?
Leti kumafa dee bunu mati fii ta heepi i te i abi heepi fanöudu, sö nöö Jehovah o ta heepi i tu
7. U ku Jehovah musu ta fan fuu ku ën sa dë mati
Te tu sëmbë abi di guwenti u ta fan ku deseei, nöö de ta ko dë gaan mati. Lesi Psalöm 86:6, 11, nöö piki dee hakisi aki:
-
Unfa u sa ta fan ku Jehovah?
-
Unfa Jehovah ta fan ku u?
U ta fan ku Jehovah te u ta begi ën, nöö a ta fan ku u te u ta lesi di Bëibel
SO SËMBË TA TAKI TAA: „Libisëmbë an sa ko dë mati ku Gadu.”
-
Un tëkisi i bi o tei u lei wan sëmbë taa u sa ko dë Jehovah mati?
ANDI I LEI?
Jehovah kë ko dë wan mati fii, nöö a o heepi i fii ko zuntu ku ën.
Andi i bi o piki?
-
Unfa Jehovah ta heepi dee mati fëën?
-
Faandi mbei Jehovah kë u dee mati fëën ta piki hën buka?
-
I si kuma Jehovah ta hakisi dee mati fëën hia soni poi ö? Faandi mbei i taki sö?
WOTO SONI DI I SA LUKU
Lesi di woto aki fii si unfa di dë di i ku Gadu sa ko dë mati sa mbei i ko abi wan bunu libi.
„Yehovah—Wan Gado di warti fu sma sabi en” (A Waktitoren, 15 u bakajailiba, 2003)
Lesi di woto aki fii si andi i sa du fii sa ko dë wan mati u Gadu.
„Fa mi kan tron Gado mati?” (Sani di yongusma e aksi—Piki di kan yepi den, Pisi 2, kapitel 35)
Lesi di woto aki fii si unfa wan mujëë bi ko abi wan möön bunu libi di a ko dë mati ku Jehovah.
Luku di fëlön aki fii si andi wantu njönkuwan ta taki u di dë di de ku Jehovah dë mati.